O a Painia Tudei ena Dua na Gauna?
1. Na itavi dokai cava era marautaka e levu, na cava era cakava eso?
1 Ena veiyabaki sa sivi, era marautaka e vica vata na udolu na veiqaravi vakatabakidua na itavi dokai ni ‘veivakavulici kei na nodra vunautaka na itukutuku vinaka.’ (Caka. 5:42) Ia eso era sa cegu ena painia ena vuku ni so na ituvaki. Ke o a painia tudei tu, o rawa ni vakalewa tale na kemu ituvaki ena gauna qo, mo raica kina se sa rawa mo painia tale?
2. Na cava mera dikeva tale kina na kedra ituvaki ena gauna qo o ira era a painia tu?
2 Veisau na iTuvaki: De dua sa sega ni vakalatilati na ituvaki o a cegu kina na painia. Me kena ivakaraitaki, rairai o a cegu na painia ni o sega ni yacova na 90 na aua e lavaki e veivula, o rawa ni painia tale ni sa 70 ga na aua e lavaki? O sa sega soti ni osooso vakalevu ena cakacaka saumi se na nomu itavi vakavuvale me vaka na gauna o cegu kina ena painia? E dua na tacida yalewa a cegu ena painia ni tautauvimate, ia a tekivu tale ni sa yabaki 89. Ni sa sivia e dua na yabaki e sega ni bau curu e valenibula, a nanuma kina me sa painia tale!
3. Na cava mera cakava na lewenivuvale me vukei kina e dua me painia?
3 O a rairai sega ni painia, ia e dua ena nomu vuvale a cegu ena painia me rawa ni qarava e dua na lewenivuvale, me vaka beka e dua vei rau na itubutubu sa qase sara. (1 Tim. 5:4, 8) Ke vaka kina, e rawa beka vei iko kei na vo ni vuvale mo dou vukei koya sa cegu ena painia? Vakacava mo dou veivosakitaka? (Vkai. 15:22) E yaga vakalevu ena nona painia e dua ena vuvale nira veitokoni na kena vo.
4. Na cava mo cakava ke sega ni rawa mo painia tale ena gauna qo?
4 Ke o sega ni painia tale ena vuku ni kemu ituvaki, mo kua ni yalolailai. E marautaka o Jiova na nomu tu vakarau mo painia tale. (2 Kor. 8:12) Mo vakayagataka ena nomu cakacaka vakaitalatala ena gauna qo na iwalewale ni vunau o vulica ni o se painia voli. Masulaka na nomu nakinaki qai yadrava eso na sala e veisau kina na kemu ituvaki. (1 Joni 5:14) Ena rairai dolava vei iko o Jiova “e dua na katuba levu ni cakacaka” mo rawa ni marautaka tale na cakacaka vakapainia tudei!—1 Kor. 16:9.