Vunau “Vei Ira na Tamata Kece”
1. Sala cava e vaka kina na matai maqosa na daukaulotu vinaka?
1 E levu na nona iyaya ni cakacaka na matai maqosa, e kila vinaka tale ga na gauna me vakayagataka kina kei na kedra ivakavakayagataki. E levu tale ga na iyaya e tu ena vukei keda meda vakayacora na noda ilesilesi ni vunau. Me kena ivakaraitaki, e vakarautaki e levu na ulutaga ena brochure me vukei keda meda vunau “vei ira na tamata kece.” (1 Kor. 9:22) Na itoma ena noda cakacaka vakaitalatala qo e tiko kina na lisi ni so na brochure, e vakamacalataka se a vakarautaki me baleti cei qai tu tale ga kina eso na vakatutu ni kena soli.
2. Gauna cava eda rawa ni vakayagataka kina ena cakacaka vakaitalatala na brochure?
2 Gauna me Vakayagataki Kina na Brochure: Ena vakayagataka na matai na iyaya ena gauna e kila ni yaga kina. Eda na solia tale ga na brochure nida kila ni na yaga vua e dua, eda na sega ni qai solia ga ena vula me soli kina. Kena ivakaraitaki, ke da vunau vua e dua e sega ni lotu vaKarisito qai sega ni kauaitaka sara na iVolatabu da qai veisoliyaka tiko ena vula oya na ivola Kaya na iVolatabu, ena rairai yaga meda solia vua e dua na brochure veiganiti da qai solia na ivola Kaya na iVolatabu ke da raica ni sa tataleitaki.
3. Na cava meda maqosa kina ni vakayagataka na iyaya ni cakacaka vakavunau?
3 Na iVolatabu e vakacaucautaki ira na daugumatua se maqosa ena nodra cakacaka. (Vkai. 22:29) E sega ni dua tale na cakacaka nikua e bibi cake mai na “kena tukuni na itukutuku vinaka.” (Roma 15:16) Ke da vinakata meda vaka na “tamata cakacaka e sega ni dua na ka e maduataka” meda saga mada ga meda maqosa ena noda vakayagataka na noda iyaya ni cakacaka.—2 Tim. 2:15.