Kua ni Rere na Vunau ena Yalava ni Bisinisi
1. Na cava meda kua kina ni yalolailai ke da dau rere na vunau?
1 O dau rere na vunau ena yalava ni bisinisi? Ke vaka kina, kua ni yalolailai, a vinakati mada ga vua na yapositolo o Paula me “doudou” me rawa ni vunautaka kina na itukutuku vinaka. (1 Ces. 2:2) Eda na veivosakitaka mada eso na ituvaki e dau vakadredretaka na noda vunau ena yalava qori, kei na sala e rawa ni wali kina.
2. Na cava meda kua ni leqataka kina nida na vakasosani ira na tamata cakacaka?
2 Au na veivakasosani? E levu vei ira na cakacaka ena bisinisi era qaravi ira na lewenivanua era namaka nira na vakasosani. E dau kena ivakarau mera na veikauaitaki ga nira kila nida na rairai volivoli. Ni maqosa na noda isulusulu, da matadredredre qai veikauaitaki, era makutu ni mai qaravi keda ena veidokai.
3. Na cava meda cakava meda kua kina ni veivakasosani vei ira na volivoli?
3 Au na Vunau Nira Rai tu na Volivoli? O rawa ni lako ena gauna e lala tu kina na sitoa, de dua ena mataka ni se qai dola. Ke osooso o manidia se vunivola, waraka sara me oti na ka erau cakava qai vosa vei rau. Ia me lekaleka ga na nomu ivakamacala.
4. Na cava eda rawa ni kaya vei ira ena yalava ni bisinisi?
4 Na Cava Meu Tukuna? Ke le vica toka era cakacaka, vosa vei nodra iliuliu. O rawa ni kaya: “E dredre me keimami sotavi ira na daunibisinisi ena nodra itikotiko, keitou mai sikovi kemuni kina ena nomuni vanua ni cakacaka. Au kila ni oni cakacaka tiko, ena lekaleka ga na ka au tukuna.” Meda kua ni nanumi cala nida dua na dauvolivolitaki, ena vinaka meda kua ni tukuna na cau, vakavo sara ke taroga o koya se tokoni vakacava noda cakacaka. O rawa ni kerea vua na manidia mo veivosaki vakalekaleka kei ira na nona tamata cakacaka, ia ena vakatau se mataqali bisinisi vakacava. E rawa ni o vakayagataka na iucu ni veivosaki sa cavuti oti. Ia ke osooso o koya, vakamacala ga vakalekaleka qai solia vua e dua na tikidua. De dua o na sega ni vosa rawa vei ira na tamata cakacaka qai tukuni mo biuta toka na ivola ena vanua era dau vakacagicagi kina se dua tale na vanua.
5. Na cava eso na vuna meda nuidei kina na vunau ena yalava ni bisinisi?
5 Erau doudou ni vunau ena yalava ni bisinisi o Jisu kei Paula, o rawa tale ga ni cakava qori. (Maciu 4:18-21; 9:9; Caka. 17:17) Kerei Jiova mo kua ni taqaya, mo doudou tale ga. (Caka. 4:29) Vakacava mo cakacaka vakavunau mada ena yalava ni bisinisi, ni dau vakavudua sara me lala?