Me Marautaki na Vula ni iVakananumi!
1. Na cava e dua na sala eda rawa ni marau kina vakalevu ena vula ni iVakananumi sa roro tiko mai qo?
1 O na rawa ni marau vakalevu ena Maji, Epereli kei na Me. Ena sala cava? Qori noda vakarabailevutaka noda cakacaka vakaitalatala, ke rawa meda painia veivuke. Sala cava ena vakamarautaki iko kina vakalevu qori?
2. Nida vakarabailevutaka noda cakacaka vakaitalatala, sala cava eda na marau kina vakalevu?
2 Vakalevutaka Nomu Marau: E buli keda o Jiova meda vakila na marau kei na vakacegu ena noda sokaloutaki koya nida vakaceguya na noda bula vakayalo. (Maciu 5:3) E buli keda tale ga meda rawa ni vakila na marau nida solika. (Caka. 20:35) E vukei keda na cakacaka vakaitalatala meda sokaloutaka na Kalou da qai dauveivukei. Nida vakaitavi gona vakalevu ena cakacaka vakaitalatala, eda na qai marau ga vakalevu. Na levu tale ga ni noda vunau, eda na qai maqosa vakalevu. Nida maqosa, eda na nuidei kina da qai sega ni taqaya vakalevu. Ena levu kina na gauna meda vunau da qai tauyavutaka na vuli iVolatabu. Na ka kece qori ena marautaki kina vakalevu na cakacaka vakaitalatala.
3. Na cava e vula vinaka kina ni painia na Maji kei na Epereli?
3 E vula vinaka dina ni painia veivuke na Maji kei na Epereli nida rawa ni digia kina meda rawata ga e 30 se 50 na aua. Kuria qori, ena Vakarauwai ni ika22 ni Maji, me lai yaco sara ena siga ni iVakananumi ena Moniti na ika14 ni Epereli, eda na veisureti tiko ena iVakananumi. Ena vakilai na marau ena ivavakoso nira “lomavata” ena cakacaka qori e levu me tarai kina na yalava ena kena levu e rawa ena dua na gauna lokuci.—Saka. 3:9.
4. Na cava meda cakava ke da via painia veivuke?
4 Vakavakarau Rawa Qo: Ke o se bera ni cakava qori, dikeva tale mada nomu ituvatuva, qai raica na veiveisau o rawa ni cakava mo vakarabailevutaka kina nomu cakacaka vakaitalatala ena loma ni dua na vula se sivia. Mo masulaka. (Jeme. 1:5) Veivosakitaka kei ratou na nomu vuvale kei na so tale ena ivavakoso. (Vkai. 15:22) O na rawa tale ga ni vakila na marau e vu mai ena painia veivuke, dina ke o rairai sega ni bulabula vinaka vakayago se o cakacaka saumi.
5. Na cava ena yaco ke da vakarabailevutaka noda cakacaka vakaitalatala ena vula ni iVakananumi sa roro tiko mai qo?
5 O Jiova e vinakata mera marau na nona dauveiqaravi. (Same 32:11) Nida gumatua meda vakarabailevutaka noda cakacaka vakaitalatala ena vula ni iVakananumi sa roro tiko mai qo, eda na sega ni marau ga kina vakalevu, ia ena marau tale ga na Tamada vakalomalagi.—Vkai. 23:24; 27:11.