Na Koronivuli ni Vuli Vunau ni 2015 ena Vakavinakataka na Noda Veivakavulici

¹ E vola na daunisame o Tevita: “Me vinaka vei kemuni na vosa ni gusuqu, kei na vakanananu ni yaloqu, i Jiova, na noqu uluvatu, kei na noqui vakabula.” (Same 19:14) Eda vinakata tale ga me marautaka o Jiova na noda vosa nida vakamareqeta na noda itavi meda tukuna na ka dina ena ivavakoso kei na cakacaka vakaitalatala. Dua na sala e vakavulici keda kina o Jiova ena cakacaka vakaitalatala oya na Koronivuli ni Vuli Vunau. E caka e veimacawa na veivakavulici qo ena sivia na 111,000 na ivavakoso e veiyasa i vuravura. E vukei ira na mataveitacini e veiyasa i vuravura e duidui na nodra isususu mera dua kina na italatala ni itukutuku vinaka, me veivakauqeti na nodra veivakavulici, mera maqosa, mera doudou tale ga.—Caka. 19:8; Kolo. 4:6.

² Na ituvatuva ni koronivuli ni 2015 ena okati kina na veika e veivosakitaki ena ulutaga “Cava e Kaya na Vosa ni Kalou” (An Introduction to God’s Word) kei na “iVakamacala ni Vosa ena iVolatabu” (Glossary of Bible Terms), e tiko ena New World Translation, vaka kina na brochure iTukutuku Vinaka Mai Vua na Kalou! Kena ikuri, sa veisau na balavu ni gauna ni veitikina bibi mai na wili iVolatabu kei na Vosa Nb 1. Na veisau qo kei na idusidusi ena kena qaravi na itavi ena koronivuli ena veivosakitaki ena vica na parakaravu tarava.

³ Vetikina Bibi Mai na Wili iVolatabu: O ira na tagane era lesi ena itavi qo era na veivosakitaka ena loma ni rua na miniti e dua na tikina veiuqeti qai yaga ena tikinivolatabu mai na wili iVolatabu vakamacawa. Ena veivosakitaki e dua na tikina yaga kei na ivavakoso ena gauna yalataki ni vakarautaki vinaka na itavi. Oti era na vakamacala na lewe ni ivavakoso ena ono na miniti, me kua ni sivia na 30 na sekodi na nodra tukuna na tikina era taleitaka ena wili iVolatabu vakamacawa. E vinakati na vakavakarau kei na noda lewai keda vinaka meda vakamacala vakavinaka ena 30 na sekodi, ia qori e ka ni vuli vinaka vei keda. E rawa tale ga ni solia na gauna mera vakamacala eso tale ena ka era vulica mai na nodra vakekeli.

⁴ Vosa Nb. 1: Sa vakalailaitaki na gauna ni wili iVolatabu me kua ni sivia e tolu na miniti, ena lailai ga na ka e kovuti kina. O ira na lesi ena itavi qo mera vakatovotovo nira wilika vakavica vakadomoilevu, mera vakarogotaka donu na vosa, me taladrodro, me vakavotui kina na vakasama. Mera saga kece na tamata i Jiova mera wiliwili vakavinaka, ni tiki bibi ni noda sokalou na wili ivola. Dua na ka na noda marau ni levu vei ira na noda gone era kila vinaka na wili ivola! Mera vakavinavinakataki na itubutubu nira vukei luvedra vakayalololoma mera wiliwili vakavinaka.

⁵ Vosa Nb. 2: Ena lesi na itavi qo vei ira na tacida yalewa me lima na miniti. Me vakayagataki na usutu e lesi. Ke yavutaki ena New World Translation, me vakarautaki e dua na tikina me baleta na cakacaka vakavunau e yaga ina yalava. Ke yavutaki ena brochure iTukutuku Vinaka Mai Vua na Kalou!, ena lesi vei gonevuli e dua na ituvatuva, se na digia ga o koya e dua e koto ena tabana e 82 ni ivola Me Yaga Nomu Curu ena Koronivuli ni Vuli Vunau. Ena lesia na ivakatawa ni koronivuli na nona ivukevuke.

⁶ Vosa Nb. 3: Ena lesi na itavi qo vua e dua na tacida tagane se yalewa me lima na miniti. Ke lesi vua na tacida yalewa, me vakarautaki me vaka na Vosa Nb. 2. Ke lesi vua na tacida tagane, na ulutaga e yavutaki ena brochure iTukutuku Vinaka Mai Vua na Kalou! me soli me vaka na vunau ena ivavakoso. Me vakarautaka nona ivakamacala ena ulutaga e lesi kina, me digia na tikinivolatabu veiganiti, me vakaraitaka na sala e yaga kina na ulutaga oya.

⁷ Tikina Vou Vei Ira na Mataveitacini Tagane ena Vosa Nb. 3: Ke yavutaki ena New World Translation, me vakatasuasuataki me vaka na sokalou vakavuvale se cakacaka vakavunau. Kena ivakarau me lesia na ivakatawa ni koronivuli e dua na ivukevuke kei na ituvatuva. O koya na ivukevuke me dua ga e lewe ni nona vuvale se tacida tagane ena ivavakoso. E rawa ni okati kina eso tale na tikinivolatabu e vakabibitaka na ivakavuvuli vakaivolatabu e semavata kei na usutu. Eso na gauna ena lesi na qase ni ivavakoso ena itavi qo. Rawa nira digia na qase na nodra ivukevuke kei na ituvatuva. Macala ga ni na uqeti ira ena ivavakoso na nodra vakaraitaka na qase na iwalewale ni veivakavulici kei na lewe ni nodra vuvale se kei na dua na tacida tagane.

⁸ iVakasala ni Vosa: Ena vosa na ivakatawa ni koronivuli ena loma ni rua na miniti ni oti nona itavi o gonevuli me veivakacaucautaki, me yavutaka tale ga na nona ivakasala ena ivola Me Yaga Nomu Curu ena Koronivuli ni Vuli Vunau. Ni vakamacalataka na itavi nei gonevuli, ena sega ni tukuna na tikina me cakacaka kina o gonevuli. Ni oti na itavi yadua, me vakacaucautaki gonevuli na ivakatawa ni koronivuli, me tukuna na lesoni e cakacaka kina o gonevuli, vakamatatataka na tikina e vinaka kina o gonevuli ena lesoni oya, se vakamacalataka vakayalovinaka na tikina me kauai kina o gonevuli ena dua na gauna e muri.

⁹ Na ivakasala vei ira yadua na gonevuli e tiko ena tabana e 79 ina 81 ena nona ivola Vuli Vunau. Ni oti nona itavi o gonevuli, ena vola eso na ka na ivakatawa ni koronivuli ena nona ivola o gonevuli, qai tarogi koya se cakava na vakatovotovo ena lesoni e lesi kina. Me vakacaucautaki o gonevuli ena nona itavi se tukuni vua eso na vakatutu yaga ni oti na soqoni se dua tale na gauna. Nona vukei ena sala qo o gonevuli e dua na sala me toso kina vakayalo.—1 Tim. 4:15.

¹⁰ Ke sivia na nona gauna e dua na gonevuli, o koya na ivakatawa ni koronivuli se dua na ivukevuke e rawa ni sikinala, ni tukituki se vakayagataka e dua na lali, me vakaraitaki kina vakamatau ni sa sivia na nona gauna o gonevuli. Me kauai kina o gonevuli, me vakaotia na nona iyatuvosa qai biuta mai na buturara.—Raica na ivola Vuli Vunau, t. 282, para. 4.

¹¹ Era uqeti mera curu ena Koronivuli ni Vuli Vunau o ira sa rawata na kena ivakatagedegede. (Raica na ivola Vuli Vunau, t. 282, para. 6.) Na veivakavulici e vakarautaka na koronivuli qo e vukei ira na dauveiqaravi i Jiova mera vunautaka qai vakavulica na itukutuku vinaka ni Matanitu ni Kalou ena doudou, veidokai, kei na loloma. E macala ni marautaka o Jiova na nodra veivakacaucautaki o ira kece e yaga vei ira na veivakavulici vakalou qo!—Same 148:12, 13; Aisea 50:4.