Eda Sega ni Tiko Taudua

1-2. (a) Na cava eda kaya kina nida sega ni tiko taudua nida sotava na ituvaki dredre? (b) Cava eda na veivosakitaka ena ulutaga qo?

NIDA sotava eso na ituvaki dredre, eda na rawa ni nanuma nida tiko taudua ena dua na waqa lailai ena wasawasa voravora. Ia eda sega ni tiko taudua. E raica na Tamada vakalomalagi dauloloma na leqa eda sotava tiko, ia e yalataka ni na vukei keda meda vosota. E veivakacegui na ka e yalataka o Jiova vei ira nona tamata yalodina, e kaya: “Au na vukei iko.”​—Aisea 41:10.

² Eda na veivosakitaka ena ulutaga qo na sala e vukei keda kina o Jiova (1) ni dusimaki keda, (2) ni vakarautaka na ka meda bula kina, (3) ni taqomaki keda, kei na (4) ni vakacegui keda. E vakadeitaka o Jiova ke dredre mada ga na ka eda sotava, ena sega ni guilecavi keda. Ena sega vakadua ni biuti keda. Eda sega gona ni tiko taudua.

E DUSIMAKI KEDA O JIOVA

3-4. E dusimaki keda vakacava o Jiova? (Same 48:14)

³ Wilika Same 48:14. E sega ni vinakata o Jiova meda dusimaki keda ga vakataki keda. E dusimaki keda vakacava na nona dausokalou yalodina nikua? Dua ni vakayagataka na iVolatabu. (Same 119:105) E vukei keda o Jiova ena nona Vosa uqeti vakalou, meda vakatulewa qai vakaraitaka na itovo eda na marau kina vakalevu nikua kei na veigauna se bera mai.a Kena ivakaraitaki, e vakavulici keda meda dau veivosoti, meda kua ni katona na ca, meda daudina ena ka kece, meda veilomani tale ga mai vu ni lomada. (Same 37:8; Iper. 13:18; 1 Pita 1:22) Nida vakaraitaka na itovo vakalou va qori, eda na dua na itubutubu vinaka, isa ni vakawati vinaka, itokani vinaka tale ga.

⁴ Kena ikuri, e okata o Jiova ena nona Vosa na kedra italanoa na tamata era vakataki keda, era sotava na ituvaki dredre qai tautauvata noda rai. (1 Kor. 10:13; Jeme. 5:17) Nida wilika na kedra italanoa qai muria na ka era cakava, ena yaga vei keda ena rua na sala. Dua, eda kila nida sega ni tiko taudua, eso tale ga era sotava na ituvaki eda sotava ra qai vosota rawa. (1 Pita 5:9) Kena ikarua, eda na vulica na sala meda vosota kina na ituvaki qori.​—Roma 15:4.

5. O cei tale e vakayagataka o Jiova me veidusimaki?

⁵ O Jiova e vakayagataki ira tale ga na tacida mera dusimaki keda.b Kena ivakaraitaki, era dau veisiko na ivakatawa ni tabacakacaka ena ivavakoso mera vakayaloqaqataki keda. E vakaukauataka noda vakabauta na nodra vunau qai vukei keda meda taqomaka tiko ga na duavata. (Caka. 15:40–16:5) O ira tale ga na qase ni ivavakoso era dau kauaitaka na nodra bula vakayalo na dautukutuku yadua. (1 Pita 5:​2, 3) O ira na itubutubu era dusimaka vakayalo na luvedra, era vukei ira mera dau vakatulewa vinaka, me vinaka tale ga nodra itovo. (Vkai. 22:6) O ira tale ga na yalewa lotu vaKarisito matua, era dau vukei ira na tacida yalewa gone ena nodra ivakaraitaki vinaka, veivakasalataki, kei na veivakayaloqaqataki.​—Taito 2:​3-5.

6. Na cava meda cakava me yaga kina vei keda na veidusimaki i Jiova?

⁶ Sa cakava o Jiova na nona itavi ni vakarautaka na veidusimaki e yaga vei keda. Eda na vakaraitaka vakacava nida vakavinavinakataka na ka e cakava? E kaya na Vosa Vakaibalebale 3:​5, 6: “Mo nuitaki Jiova ena lomamu taucoko, mo kua ni vakararavi ena nomu yalomatua.” Nida cakava qori, “ena vakadodonutaka na [noda] ilakolako o koya,” ya ni na taqomaki keda mai na levu na leqa, eda na marautaka tale ga na bula. Eda vakavinavinakataki Jiova vakalevu ni vakarautaka vakayalololoma na ivakasala e yaga sara ga vei keda!​—Same 32:8.

E VAKARAUTAKA O JIOVA NA KA MEDA BULA KINA

7. Na cava eso tale na ka e vakarautaka vei keda o Jiova? (Filipai 4:19)

⁷ Wilika Filipai 4:19. Me ikuri ni nona veidusimaki vakayalo o Jiova, e vakalougatataka noda sasaga meda rawata na kakana, isulu kei na vale. (Maciu 6:33; 2 Ces. 3:12) E dau kena ivakarau ga meda leqataka na ka meda bula kina, ia e uqeti keda o Jiova meda kua ni lomaocaocataka vakasivia qori. (Raica na study note ni Maciu 6:25.) Na vuna? Na Tamada o Jiova ena sega vakadua ni biuti ira nona dausokalou yalodina ena gauna era leqa kina. (Maciu 6:8; Iper. 13:5) Meda nuitaka gona na ka e tukuna ni na vakarautaka na ka meda bula kina.

8. Na cava e cakava o Jiova vei Tevita?

⁸ Dikeva na sala e vukei Tevita kina o Jiova. Ena gauna dredre e dro voli kina o Tevita, e vakarautaka o Jiova na ka me bula kina kei ira nona tamata. Ni vakasamataka lesu na sala e vukei koya kina o Jiova, e vola: “Au a gone, qo au sa qase, ia au sega ni raica e dua na yalododonu me biu wale tu, se ra vaqara madrai na luvena.” (Same 37:25) De dua o sa vakadinadinataka tale ga na sala e vukei iko kina vakayalololoma o Jiova kei ira na tacida ena gauna dredre.

9. E vukei ira vakacava nona tamata nikua o Jiova ni yaco na leqa tubukoso? (Raica tale ga na iyaloyalo.)

⁹ O Jiova e vukei ira tale ga nona tamata ena gauna ni leqa tubukoso. Kena ivakaraitaki, ni yaco na dausiga ena imatai ni senitiuri, era vakauta mai na lotu vaKarisito ena duidui vanua na nodra ka ni veivuke vei ira na mataveitacini era vakaleqai. (Caka. 11:​27-30; Roma 15:​25, 26) Nikua, era vakaraitaka tale ga na tamata ni Kalou na lomasavu va qori. Ni yaco na leqa tubukoso, e uqeti ira nona tamata o Jiova mera vakarautaka na kakana, wai, isulu, kei na wainimate vei ira na mataveitacini ena vanua qori. Era veivuke tale ga na timi ni tarataravaki mera vakavinakataka nodra vale kei na Vale ni Soqoni. E totolo tale ga nodra veivakacegui kei na veivakayaloqaqataki na mataveitacini vei ira na rarawa tiko.c

10-11. Na cava o vulica ena ivakaraitaki nei Borys?

¹⁰ E dau lomasavu tale ga o Jiova vei ira na sega ni sokaloutaki koya. Nikua, eda na qara na sala meda caka vinaka kina vei ira eda sega ni vakabauta vata. (Kala. 6:10) Nida cakava qori, e rawa kina nira mai qaravi Jiova. Dikeva mada na ivakaraitaki i Borys, e dua na qasenivuli liu e Ukraine. E sega ni tacida o Borys, ia e dau yalovinaka vei ira na gonevuli iVakadinadina i Jiova, e doka tale ga nodra vakabauta. Na gauna e dro kina mai na nona itikotiko ina dua tale na vanua me lai taqomaki kina, era vukei koya na mataveitacini. Toso na gauna, e tiko sara ena iVakananumi. Ni vakasamataka nodra vukei koya na tacida, e kaya: “Era kauaitaki au na iVakadinadina i Jiova, era karoni au tale ga. Au kalougata nira tiko.”

¹¹ Eda rawa tale ga ni vakatotomuria na Tamada vakalomalagi dauloloma nida lomani ira na vakaleqai tu, ke ra tacida mada ga se sega. (Luke 6:​31, 36) Eda nuitaka ni noda sasaga meda lomani ira na tamata e rawa nira mai tisaipeli kina i Karisito. (1 Pita 2:12) Ke ra mai kila na dina se sega, eda na marau ga nida soli ka.​—Caka. 20:35.

E TAQOMAKI KEDA O JIOVA

12. Na veitaqomaki vakacava e yalataka o Jiova ni na cakava vakailawalawa vei ira nona tamata? (Same 91:​1, 2, 14)

¹² Wilika Same 91:​1, 2, 14. Nikua, e yalataka o Jiova me taqomaki keda vakayalo. Ena sega ni vakatara me vakaleqa o Setani na sokalou dina. (Joni 17:15) Ena gauna tale ga ni “veivakararawataki levu,” eda nuidei ni na vakayacora o Jiova na ka e yalataka me taqomaki keda vakayalo, vakayago tale ga.​—Vkta. 7:​9, 14.

13. E taqomaki keda yadudua vakacava o Jiova?

¹³ E taqomaki keda yadudua vakacava o Jiova? E vakayagataka na iVolatabu me vukei keda meda kila na ka e donu mai na ka e cala. (Iper. 5:14) Nida muria na kena ivakavuvuli eda na taqomaki vakayalo, vakayago tale ga. (Same 91:4) Kena ikuri, e veitaqomaki o Jiova ni vakayagataka na ivavakoso. (Aisea 32:​1, 2) Nida veimaliwai gona kei ira na lomani Jiova, era muria tale ga na ivakavuvuli vakaivolatabu, eda na vakayaloqaqataki meda vorata na ka ca.​—Vkai. 13:20.

14. (a) Na cava ena sega ni taqomaki keda kina o Jiova mai na ituvaki dredre kece? (b) Cava e vakadeitaka vei keda na Same 9:10? (Raica tale ga na ivakamacala e ra.)

¹⁴ Ena gauna sa oti, o Jiova e dau taqomaki ira vakayago nona dauveiqaravi ena so na gauna. Ia e sega ni dau cakava e veigauna. Eso na gauna e dau yacovi keda “na ka e sega ni namaki.” (Dauv. 9:11) Kena ikuri, e vakatara o Jiova mera tusaqati na nona tamata qai vakamatei mada ga, me vakalasui kina na lasu nei Setani. (Jope 2:​4-6; Maciu 23:34) E va tale ga qori nikua. Ena sega ni kauta laivi o Jiova na ituvaki dredre kece eda sotava, ia eda vakadeitaka ni na sega vakadua ni biuti ira na lomani koya.d​—Same 9:10.

E VAKACEGUI KEDA O JIOVA

15. E vakacegui keda vakacava na masu, Vosa ni Kalou, kei ira na mataveitacini? (2 Korinica 1:​3, 4)

¹⁵ Wilika 2 Korinica 1:​3, 4. Eso na gauna, eda dau vakila na rarawa, lomaocaoca se nuiqawaqawa. De dua o sotava tiko e dua na ituvaki rarawataki o nanuma kina ni o sa tu taudua. Vakacava e dua e kila na ka o sotava tiko? Io, o Jiova. E sega wale ga ni kila na mosi eda sotava tiko, ia ena “vakacegui keda ena veika dredre kece eda sotava.” Ena sala cava? Nida vakamamasu vei Jiova, ena solia vei keda “na vakacegu ni Kalou e uasivia na vakasama kece.” (Fpai. 4:​6, 7) Ena vakacegui keda tale ga nida dau wili iVolatabu meda kila kina na rai i Jiova. Eda na kila ena iyau qori na nona loloma, nona vuku kei na inuinui, qori ena vakayaloqaqataki keda. E vakacegui keda tale ga na soqoni vaKarisito nida maliwai ira na tacida era lomani keda, qai veivakayaloqaqataki na ka eda vulica ena iVolatabu.

16. Na cava o vulica ena ivakaraitaki i Nathan kei Priscilla?

¹⁶ Meda kila na sala e veivakacegui kina o Jiova ni vakayagataka nona Vosa, meda dikeva mada nodrau ivakaraitaki o Nathan kei Priscilla mai Merika. Ena vica na yabaki sa oti, rau vakatulewataka me rau lai veiqaravi ena vanua e vinakati kina na dautukutuku. E kaya o Nathan: “Keirau nuitaki Jiova me na vakalougatataka neirau sasaga.” Ia ni rau yaco yani ena nodrau ilesilesi vou, rau sega ni namaka me rau tauvimate, rau leqa tale ga vakailavo. Rau mani lesu tale i Merika, ia rau se leqa tiko ga vakailavo. E kaya o Nathan: “Au sega ni kila na vuna e sega ni vakalougatataki keirau kina o Jiova me vaka keirau nanuma. Au sa lai nanuma ga niu a cakava e dua na ka ca.” Ia ni toso na gauna, sa qai liaca o Nathan kei Priscilla ni a sega ni biuti rau o Jiova. E kaya o Nathan: “Ena gauna dredre qori, na iVolatabu e vaka sara ga e dua na itokani vinaka ni vakayaloqaqataki keirau qai veidusimaki. Ni keirau vakasamataka na sala e vukei keirau kina o Jiova me keirau vosota mai na neirau vakasamataka tiko ga na ka dredre qori, e vakarautaki keirau ena ka dredre e tu mai liu.”

17. Sala cava e vakacegui kina na tacida yalewa o Helga? (Raica tale ga na iyaloyalo.)

¹⁷ O ira na mataveitacini era na vakacegui keda. Ena sala cava? Dikeva mada nona ivakaraitaki e dua na tacida yalewa o Helga, mai Hungary. Vica vata na yabaki nona sotava na ituvaki e yalolailai kina qai nanuma ni sa sega na kena yaga. Ia ni vakasamataka lesu, e raica na sala e vakacegui koya kina o Jiova ena vukudra na lewe ni ivavakoso. E vola: “E dau vukei au tu ga o Jiova ena gauna au oca kina ena vuku ni cakacaka saumi, niu qarava tiko na luvequ e tauvimate, kei na so tale na ituvaki. Ena loma ni 30 na yabaki qori, e dina tu ga o Jiova ena nona yalayala me vakacegui au e veisiga. E vakayaloqaqataki au na nodra vosa vakayalovinaka na mataveitacini kei na nodra dau vakavinavinaka. Na gauna sara ga au yalolailai tu kina, era dau vakau itukutuku mai ena talevoni, na card se ra dau vakavinavinaka.”

18. Eda na veivakacegui vakacava?

¹⁸ Nida dau veivakacegui, eda sa vakatotomuria tiko na noda Kalou. Eda na cakava vakacava? Eda rawa ni vosovoso ni vakarogoci ira, vosa vakayalovinaka vei ira, qai vukei ira ena so tale na ka. (Vkai. 3:27) Eda na saga meda vakacegui ira kece na rarawa tu, wili kina o ira na se bera ni qaravi Jiova. Nira lolosi o ira eda tiko veitikivi, era tauvimate se nuiqawaqawa, meda lai raici ira, vakarogoci ira, qai vakayaloqaqataki ira mai na iVolatabu. Nida vakatotomuri Jiova “na Kalou e dau vakacegui keda ena ka kece,” eda na sega wale ga ni vukei ira na tacida mera vosota na ka dredre, ia eda na vukei ira tale ga na se bera ni kilai Jiova mera mai qaravi koya.​—Maciu 5:16.

ENA VUKEI KEDA TU GA O JIOVA

19. Na cava e cakava vei keda o Jiova? Eda na vakatotomuri koya vakacava?

¹⁹ O Jiova e kauaitaki ira vakalevu na lomani koya. E sega ni biuti keda nida sotava na veika dredre. Me vaka ga na itubutubu dauloloma e kauaitaki luvena, o Jiova e kauaitaki ira tale ga na nona dausokalou yalodina. E dusimaki keda, vakarautaka na ka meda bula kina, taqomaki keda, e vakacegui keda tale ga. Eda na vakatotomuria na Tamada vakalomalagi dauloloma, nida tokoni ira na rarawa tiko qai vakayaloqaqataki ira. Ke da sotava mada ga na ituvaki dredre kei na rarawa, meda nuidei ni na sega ni biuti keda o Jiova. E yalataka: “Mo kua ni rere niu tokoni iko.” (Aisea 41:10) Eda nuidei sara ga! Io, eda sega ni tiko taudua.