E Bibi Vei Jisu na Yaca i Jiova

1-2. (a) Na cava e cakava o Jisu ena bogi ni bera ni vakamatei? (b) Na taro cava eda na veivosakitaka ena ulutaga qo?

ENA bogi ni Lotulevu, Naisani 14, 33 G.V., sa voleka ni liumuritaki o Jisu, veilewaitaki, vakacalai, vakararawataki, qai vakamatei. Se qai vakayagataka oti sara ga e dua na ivakayakavi kei ratou na nona yapositolo yalodina ena dua na rumu ni tabavale e cake. Ni oti ga na ivakayakavi qori, e vakayaloqaqataki ratou nona yapositolo. Ni bera ni ratou biubiu mai na rumu qori, e cabora o Jisu e dua na masu e veiuqeti. E qai vola na yapositolo o Joni na masu qori ena Joni wase 17.

² Eda kila vakacava ena masu i Jisu na ka e kauaitaka tiko ena gauna ya? Eda kila vakacava ena masu qori na ka e bibi vua ena nona cakacaka vakaitalatala e vuravura? Meda veivosakitaka mada na isaunitaro qori.

“AU SA VAKATAKILA VEI RATOU NA YACAMUNI”

3. Na cava e tukuna o Jisu me baleta na yaca i Jiova? Cava e vakaibalebaletaka? (Joni 17:​6, 26)

³ E kaya o Jisu ena nona masu: “Au sa vakatakila vei ratou na yacamuni au na vakatakila tiko ga.” E kaya vakarua ni sa vakatakila na yaca i Jiova vei ratou na nona tisaipeli. (Wilika Joni 17:​6, 26.) Na cava e vakaibalebaletaka? Vakacava e vakatakila tiko e dua na yaca eratou se bera ni kila? Sega. Eratou Jiu na nona tisaipeli, kena ibalebale ratou sa kila vinaka tiko ni yaca ni Kalou o Jiova. Na yaca qori e basika vakavica na udolu ena iVolatabu vakaIperiu. E sega gona ni vakaibalebaletaka o Jisu na yaca ni Kalou, ia e tukuna tiko se mataqali Kalou vakacava. E vukei ratou nona tisaipeli me ratou kilai Jiova vinaka, nona inaki, ka e cakava, kei na nona itovo. E sega ni dua tale e kilai Jiova vinaka me vakatauvatani kei Jisu.

4-5. (a) Ena vakaibalebale vakacava vei keda na yacana e dua? Vakatauvatana. (b) Sala cava eratou mai kila kina na tisaipeli na yaca i Jiova?

⁴ Meda vakatauvatana: Kaya mada e dua na qase ena nomu ivavakoso na yacana o Tevita, e dauniveisele. Vica vata na yabaki nomu kilai koya vinaka tu. Ia dua na siga o qai tauvimate levu. O mani cicivaki e valenibula e cakacaka tiko kina na qase ni ivavakoso qori, e qaravi iko vinaka ni vakayagataka nona kila vakadauniveisele, o bula sara. Mai na ka kece e cakava qori, vakacava sa na vakaibalebale vakalevu vei iko na yacana? Io! Sa sega wale ga ni o Tevita na qase ni ivavakoso o kila, ia e dua na dauniveisele a vakabulai iko.

⁵ E va tale ga qori o ratou na tisaipeli i Jisu, ratou sa kila vinaka tu na yaca i Jiova. Ia sa qai vakaibalebale sara vei ratou na yaca qori ni ratou raica na ka e cakava o Jisu ena nona cakacaka vakaitalatala. Na cava eda kaya kina qori? Ni vakatotomuria vinaka sara ga o Jisu na itovo nei Tamana ena ka e tukuna kei na ka kece e cakava. E rawa gona ni ratou mai “kilai” Jiova vinaka na yapositolo i Jisu, ni ratou rogoca na ivakarau ni nona veivakavulici, ratou raica tale ga na ka e cakava vei ira na tamata.​—Joni 14:9; 17:3 vmr.

“NI YACAMUNI ONI A VAKATOKAI AU KINA”

6. Sala cava e vakatokai kina o Jisu ena yaca i Jiova? (Joni 17:​11, 12)

⁶ E masulaki ratou na nona tisaipeli o Jisu ni kaya: “Ni taqomaki ratou ena vuku ni yacamuni oni a vakatokai au kina.” (Wilika Joni 17:​11, 12.) Vakacava, kena ibalebale qori ni sa yaca i Jisu o Jiova? Sega. Dikeva ni kaya o Jisu ena nona masu me baleta na yaca i Jiova ni “yacamuni.” Kena ibalebale ya ni sega ni veisau na yaca i Jisu me o Jiova. Na cava ga e vakaibalebaletaka o Jisu ni sa vakatokai ena yaca ni Kalou? Kena imatai, o Jisu e nona italai o Jiova, e vosa tale ga ena vukuna. E lako mai ena yaca i Tamana, e cakamana tale ga kina. (Joni 5:43; 10:25) Kena ikarua, na ibalebale ni yaca i Jisu, “O Jiova na iVakabula.” Kena ibalebale, ni tiko ena yaca i Jisu na yaca i Jiova.

7. Sala cava e vosa kina o Jisu ena yaca i Jiova? Tukuna e dua na ivakaraitaki.

⁷ Kena ivakaraitaki, ena rawa ni talai nona mata e dua na iliuliu me vosa ena vukuna ni vakayagataka na yacana. Kena ibalebale, ni gauna e vosa kina o nona mata, ena tautauvata nona lewa kei na nona iliuliu. E va tale ga qori o Jisu, e matatataki Jiova qai vosa ena vukuna ni vakayagataka na yacana.​—Maciu 21:9; Luke 13:35.

8. Sala cava e tiko kina ‘vei’ Jisu na yaca i Jiova ni se tu mai lomalagi? (Lako Yani 23:​20, 21)

⁸ E kilai o Jisu me Vosa, e nona itavi gona me Gusunivosa i Jiova me vakasavuya na itukutuku kei na idusidusi vei ira na agilosi kei ira na tamata. (Joni 1:​1-3) Kena irairai, ni o Jisu ga na agilosi e tala o Jiova me liutaki ira na Isireli ena vanua talasiga. Qo na vuna e tukuna kina o Jiova vei ira na Isireli mera talairawarawa vua na agilosi qori: “Ni sa tiko vua na yacaqu.”a (Wilika Lako Yani 23:​20, 21.) Sala cava e tiko kina ‘vei’ Jisu na yaca i Jiova? Qori ena nona matataki koya, o koya duadua ga ena vakarokorokotaka qai vakadinadinataka na yaca qori.

“TAMAQU, MONI VAKALAGILAGIA NA YACAMUNI”

9. E bibi vakacava vei Jisu na yaca i Jiova? Vakamacalataka.

⁹ Me vaka eda sa veivosakitaka mai, ni se bera mada ga ni lako mai vuravura o Jisu, e ka bibi duadua vua na yaca i Jiova. Sa rauta ni gauna e mai bula kina e vuravura, e laurai tale ga ena ka e cakava ni se bibi tiko ga vua na yaca i Jiova! Ni sa voleka ni cava nona cakacaka vakaitalatala o Jisu, e kerei Jiova: “Tamaqu, moni vakalagilagia na yacamuni.” Oti ga qori, e sauma mai o Tamana ena domo levu mai lomalagi: “Au sa vakalagilagia oti, au na vakalagilagia tale.”​—Joni 12:28.

10-11. (a)  Sala cava e vakalagilagia kina o Jisu na yaca i Tamana? (Raica tale ga na iyaloyalo.) (b) Na cava e bibi kina me vakarokorokotaki qai vakadinadinataki na yaca i Jiova?

¹⁰ Sala cava e vakalagilagia kina o Jisu na yaca i Tamana? Dua oya ena nona vakaraitaka na itovo talei i Tamana, kei na ka e cakava vei ira eso tale. E vinakati me vakarokorokotaki na yaca i Jiova, qai vakadinadinataki na vinaka ni kena irogorogo.b E vakaraitaka o Jisu na kena bibi qori ena masu kilai levu e vakavulica vei ratou nona imuri. E kaya: “Tamai keimami mai lomalagi, me vakarokorokotaki na yacamuni.”​—Maciu 6:9.

¹¹ Na cava me vakarokorokotaki kina na yaca i Jiova qai vakadinadinataki? Ni o Setani na Tevoro e beci Jiova qai vakaucacataki koya ena were o Iteni. E kaya o Setani ni daulasulasu na Kalou o Jiova qai bureitaka tiko e dua na ka vinaka vei rau o Atama kei Ivi. (Vkte. 3:​1-5) E vaka me tukuna tiko ni cala na ka e cakava o Jiova. Na veibeitaki i Setani, e vakarogorogocataki Jiova, se na yacana. E cakava tale ga qori ena gauna i Jope, e kaya nida qaravi Jiova ga ni vakalougatataki keda tiko. E kaya tale ga na dauvakaucaca qori ni gauna eda na vakatovolei kina, eda na biuti Jiova nida sega ni lomani koya. (Jope 1:​9-11; 2:4) Eda na kila vakacava ni lasu o Jiova se o Setani? Ena vinakati me soli na gauna.

‘AU SOLIA NOQU BULA’

12. Ni lomani Jiova o Jisu, na cava e yalorawarawa me cakava?

¹² Ni lomani Jiova o Jisu, e vinakata me cakava na ka kece me vakarokorokotaka qai vakadinadinataka na yaca i Jiova. E kaya o Jisu: “[Au] solia noqu bula.” (Joni 10:​17, 18) Io, e yalorawarawa mada ga me mate ena yaca i Jiova.c Rau talaidredre vei Jiova na imatai ni tamata uasivi o Atama kei Ivi, rau qai to vei Setani. Kena veibasai o Jisu, e yalorawarawa ni mai bula e vuravura, qai vakaraitaka na levu ni nona lomani Jiova. E cakava qori o Jisu ni yalodina tu ga. (Iper. 4:15; 5:​7-10) E yalodina tu ga ena nona bula taucoko me yacova nona mate ena kaunirarawa. (Iper. 12:2) Ni cakava qori, e vakaraitaka kina ni lomani Jiova kei na yacana.

13. Na cava e ganiti Jisu vinaka kina me vakalasui Setani? (Raica tale ga na iyaloyalo.)

¹³ E laurai ena ivakarau ni bula kece i Jisu ni lasulasu o Setani, sega ni o Jiova! (Joni 8:44) E sega ni dua tale e kilai Jiova vinaka, o Jisu duadua ga. Ke dina mada ga na nona veibeitaki o Setani me baleti Jiova, ena kila vinaka qori o Jisu. Ia e dei tu ga ni vakadinadinataka na irogorogo kei Jiova, se na yacana. Ena gauna mada ga e nanumi kina ni biuti koya o Jiova, e bolea o Jisu me mate ia me kua ga ni cakitaka na Tamana dauloloma.​—Maciu 27:46.d

“AU SA . . . VAKAOTIA NA CAKACAKA ONI LESIA MEU CAKAVA”

14. E vakalougatataka vakacava o Jiova na yalodina i Jisu?

¹⁴ Ena bogi ni bera ni mate o Jisu, a masulaka: “Au sa . . . vakaotia na cakacaka oni lesia meu cakava.” E kila vinaka tu ni na vakalougatataka o Jiova na nona yalodina. (Joni 17:​4, 5) E sega ni matewale na nona nuitaki Tamana o Jisu. E sega ni vakalaiva o Jiova me tu ga na yagona ena ibulubulu. (Caka. 2:​23, 24) E vakaturi Jisu qai solia vua e dua na itutu cecere mai lomalagi. (Fpai. 2:​8, 9) Toso na gauna, sa qai tekivu veiliutaki vakatui ena Matanitu ni Kalou. Na cava ena cakava na Matanitu qori? E kaya vei keda na ikarua ni icegu ni Masu ni Turaga: “Me yaco mai na nomuni Matanitu. Me caka na lomamuni e vuravura me vaka e caka tiko mai lomalagi.”​—Maciu 6:10.

15. Na cava tale ena cakava o Jisu?

¹⁵ Ena dua na gauna mai qo, ena vala o Jisu kei ira na meca ni Kalou qai vakarusai ira na tamata ca ena Amaketoni. (Vkta. 16:​14, 16; 19:​11-16) Oti ga qori, ena kolotaki Setani ena “qara e sega ni vakabotona,” me kua tale ni veivakacalai. (Vkta. 20:​1-3) Ena vakalesuya tale mai o Jisu na vakacegu kei na bula uasivi ena loma ni Duanaudolu na Yabaki. Ena vakaturi ira na mate. Ena vakavuna me parataisi tale o vuravura. Sa na vakayacori na inaki i Jiova!​—Vkta. 21:​1-4.

16. Na cava ena yaco ena icavacava ni Duanaudolu na Yabaki?

¹⁶ Ena icavacava ni Duanaudolu na Yabaki, sa na oti vakadua na ivalavala ca kei na noda dui malumalumu. Eda sa na sega ni kerea me vosoti noda ivalavala ca ena vuku ni ivoli, sa na sega ni dua noda dauniveisorovaki kei na matabete. Na “iotioti ni meca me vakamalumalumutaki o mate [e vakavuna o Atama].” Sa na lala na ibulubulu. Era sa na vakaturi na mate. Era sa na uasivi na tamata kece e vuravura.​—1 Kor. 15:​25, 26.

17-18. (a) Na cava ena yaco ena icavacava ni Duanaudolu na Yabaki? (b) Cava ena cakava o Jisu ni sa oti na nona veiliutaki? (1 Korinica 15:​24, 28) (Raica tale ga na iyaloyalo.)

¹⁷ Na cava tale ena yaco ena icavacava ni Duanaudolu na Yabaki? Dua na ka vakasakiti ena yaco ena gauna qori. Sa na oti vakadua na kena veiletitaki tiko na vakarokorokotaki ni yaca i Jiova. Ena sala cava? Ena were o Iteni, e kaya tiko o Setani ni daulasulasu o Jiova, e sega tale ga ni yalololoma nona veiliutaki. Tekivu ena gauna qori, ena vakarokorokotaki tu ga na yaca i Jiova vei ira era dokai koya, era rokovi koya. Ena icavacava gona ni Duanaudolu na Yabaki, sa na qai vakadinadinataki na vinaka ni kena irogorogo. Ena vakaraitaka kina o Jiova ni dua na Tama vakalomalagi dauloloma.

¹⁸ Ena qai vakadinadinataki ena gauna qori ni lasu na veibeitaki nei Setani. Na cava ena cakava o Jisu ni sa na vakarau cava na nona veiliutaki? Vakacava, ena vakatotomuria na ka e cakava o Setani qai talaidredre vei Jiova? Sega! (Wilika 1 Korinica 15:​24, 28.) Ena solia lesu o Jisu vei Tamana na Matanitu, qai vakamalumalumu ena veiliutaki i Jiova. Io, e sega ni vakataki Setani o Jisu, ena tu vakarau ni solia na ka kece ni lomani Jiova. Ni sa na vakarusai vakadua o Setani, ena vakarokorokotaki qai vakadinadinataki na yaca i Jiova.

19. E raica vakacava o Jisu na yaca i Jiova?

¹⁹ Sa rauta me vinakata o Jiova me solia vei Jisu na yacana! E laurai sara ga vei Jisu ni vakatotomuri Tamana vinaka. E raica gona vakacava o Jisu na yaca i Jiova? E ka bibi duadua vua. E yalorawarawa me mate ena yaca qori, ena tu vakarau tale ga me solia lesu vei Jiova na veiliutaki ni sa cava na Duanaudolu na Yabaki. Eda na vakatotomuri Jisu vakacava? Eda na dikeva na kena isau ena ulutaga tarava.