Me Bibi Vei Keda na Yaca i Jiova

1-2. Eda kila vakacava ni bibi duadua vei Jisu na yaca i Jiova?

E BIBI duadua vei Jisu na yaca i Jiova. O koya duadua ga e vakatakila vinaka na yaca i Tamana. Eda vulica ena ulutaga sa oti, ni yalorawarawa o Jisu me mate ena yaca i Jiova, e vakaraitaka tale ga ni donu na ka kece e cakava. (Mari. 14:36; Iper. 10:​7-9) Ni cava tale ga na Duanaudolu na Yabaki ni Veiliutaki i Jisu, ena yalorawarawa me solia lesu na lewa kece vei Jiova me vakarokorokotaki kina na yacana. (1 Kor. 15:​26-28) Na nona lomana na yaca ni Kalou e dusia tale ga ni volekati Tamana. Eda vakadinadinataka sara ga ena ka e cakava o Jisu ni lomani Jiova vakalevu.

² E lako mai vuravura o Jisu ena yaca i Tamana. (Joni 5:43; 12:13) E vakatakila na yaca qori vei ratou nona imuri. (Joni 17:​6, 26) E veivakavulici ena yaca i Jiova, e cakamana tale ga kina. (Joni 10:25) E kerei Jiova mada ga o Jisu me taqomaki ratou nona tisaipeli “ena vuku ni yaca[na].” (Joni 17:11) Ke sa va qori na levu ni nona raica vakabibi na yaca i Jiova o Jisu, ena rawa ni kaya vakacava e dua ni imuri dina i Karisito ke sega mada ga ni kila se vakayagataka na yaca i Tamana?

3. Na cava eda na veivosakitaka ena ulutaga qo?

³ Nida lotu vaKarisito da qai saga vagumatua meda muria na weniyava i Jisu, eda na mareqeta na yaca i Tamana. (1 Pita 2:21) Eda na vulica ena ulutaga qo, na sala era vakatokai kina ena yaca i Jiova o ira na kacivaka “na itukutuku vinaka . . . ni Matanitu ni Kalou.” (Maciu 24:14) Eda na veivosakitaka tale ga na sala e bibi kina vei keda yadua na yaca i Jiova.

“DUA NA ILAWALAWA ME VAKATOKAI ENA YACANA”

4. (a) Na ilesilesi cava e tukuna o Jisu vei ira nona tisaipeli ni bera ni lesu i lomalagi? (b) Na taro cava e basika kina?

⁴ Ni vakarau lesu i lomalagi o Jisu, e kaya vei ratou nona tisaipeli: “Dou na rawata na kaukaua ni sobuti kemudou na yalo tabu, dou na qai tukuni au e Jerusalemi, e Jutia taucoko, e Samaria, kei na veivanua yawa sara kei vuravura.” (Caka. 1:8) Ena vunautaki gona na itukutuku vinaka ena veivanua kece, sega ni o Isireli ga. Toso na gauna, era na yaco mera imuri i Jisu na tamata mai na veiyasa i vuravura. (Maciu 28:​19, 20) Ia e kaya o Jisu: “Dou na qai tukuni au.” Vakacava ena vinakati ga mera kila na tisaipeli vou qori na yaca i Jiova, se mera ivakadinadina ga i Jisu? Ena saumi na taro qori ena ka e yaco ena Cakacaka wase 15.

5. Eratou vakaraitaka vakacava na yapositolo kei ira na qase e Jerusalemi ni vinakati mera kila na tamata kece na yaca i Jiova? (Raica tale ga na iyaloyalo.)

⁵ Ena 49 G.V., ratou bose vata na yapositolo kei ira na qase e Jerusalemi mera veivosakitaka na ka mera cakava na lewe ni Veimatanitu era sega ni cili mera dua na lotu vaKarisito. Ni sa mai cava na bose, e qai kaya o Jemesa na taci Jisu vakacabecabe: “Sa vakamacalataka vinaka o [Pita] na imatai ni gauna e golevi ira kina na veimatanitu na Kalou me digitaka e dua na ilawalawa me vakatokai ena yacana.” Na yaca i cei e tukuna tiko qo o Jemesa? E cavuta tale ga na ka e vola na parofita o Emosi: “Mera vakasaqarai Jiova . . . na tamata era vo tu mai, wili kina o ira kece na lewe ni veimatanitu, o ira era vakatokai ena yacaqu, e kaya o Jiova.” (Caka. 15:​14-18) Era na sega wale ga ni vulici Jiova na tisaipeli vou qori, ia era na ‘vakatokai tale ga ena yacana.’ Kena ibalebale era na vakatakila na yaca ni Kalou, era na kilai tale ga nira matataki koya.

6-7. (a) Na cava e lako mai kina i vuravura o Jisu? (b) Na cava tale e dua na ka bibi e okati kina?

⁶ Na ibalebale ni yaca i Jisu e “Dauveivakabulai o Jiova,” e vakayagataki koya tale ga o Jiova me vakabulai ira era cakacakataka nodra vakabauta. E lako mai vuravura o Jisu me solia na nona bula ena vukuda na kawatamata. (Maciu 20:28) Ni sauma na ivoli, e rawa kina ni bula na kawatamata qai rawata na bula tawamudu.​—Joni 3:16.

⁷ Na cava me vakabulai kina na kawatamata? Baleta na ka e yaco ena were o Iteni. Eda vulica ena ulutaga sa oti ni rau talaidredre vei Jiova na imatai ni noda itubutubu o Atama kei Ivi, rau sega kina ni bula tawamudu. (Vkte. 3:​6, 24) Ia e okati tiko kina e dua na ka e bibi sara mai na noda vakabulai na kawatamata ivalavala ca. Qori na kena vakaucacataki na yaca i Jiova. (Vkte. 3:​4, 5) Kena ibalebale na nodra vakabulai na kawa i Atama kei Ivi e veisemati vinaka kei na dua na ka e bibi sara, qori na vakarokorokotaki ni yaca i Jiova. Ni matataki Jiova o Jisu qai vakatokai ena yacana, e ganiti koya vinaka me vakarokorokotaki Jiova.

8. Na cava e vinakati mera kila na vakabauti Jisu?

⁸ E vinakati mera kila o ira na vakabauti Jisu, qori o ira na Jiu kei ira na lewe ni Veimatanitu ni vakabulai ira na Kalou o Jiova, na Tamai Jisu. (Joni 17:3) Kena ikuri, me vakataki Jisu, era na vakatokai ena yaca i Jiova. Ena vinakati tale ga mera kila na bibi ni kena vakarokorokotaki na yaca qori, ni vakatau sara ga kina nodra vakabulai. (Caka. 2:​21, 22) Ena vinakati gona vei ira kece na imuri i Jisu mera vulica na veika me baleti Jiova kei Jisu. Sa rauta me tukuna o Jisu ena itinitini ni nona masu ena Joni 17: “Au sa vakatakila vei ratou na yacamuni au na vakatakila tiko ga, me rawa ni ratou veilomani ena loloma vata ga oni lomani au kina, meu duavata tale ga kei ratou.”​—Joni 17:26.

“O KEMUNI NA NOQU IVAKADINADINA”

9. Eda na vakaraitaka vakacava ni bibi duadua vei keda na yaca i Jiova?

⁹ O ira kece na imuri dina i Jisu, e dodonu mera kauaitaka na kena vakarokorokotaki na yaca i Jiova. (Maciu 6:​9, 10) E dodonu mera raica ni ka bibi duadua vei ira na yaca qori. Me laurai sara ga qori ena ka era cakava. Ia eda na vakaitavi vakacava ena kena vakarokorokotaki na yaca i Jiova, se vakalasuya nona vakaucacataka o Setani?

10. Na veilewai cava e vakamacalataki tiko ena Aisea 42 ina 44? (Aisea 43:9; 44:​7-9) (Raica tale ga na iyaloyalo.)

¹⁰ E laurai ena Aisea wase 42 ina 44 na bibi ni noda itavi ena kena vakarokorokotaki na yaca i Jiova. E vakamacalataki ena vica na wase qori ni veilewaitaki tiko se o cei na Kalou dina. E bolei ira na kalou qori o Jiova mera vakadinadinataka ke ra kalou dina. O Jiova e kacivi ira tale ga na ivakadinadina mera vakadinadinataka na nodra kalou. Ia e sega ni dua e cakava rawa!​—Wilika Aisea 43:9; 44:​7-9.

11. Na cava e tukuna o Jiova vei ira nona tamata ena Aisea 43:​10-12?

¹¹ Wilika Aisea 43:​10-12. E kaya o Jiova me baleti ira nona tamata: “O kemuni na noqu ivakadinadina, . . . o yau ga na Kalou.” E tarogi ira o Jiova mera sauma qo: “E dua tale na Kalou, se o yau ga?” (Aisea 44:8) E ka dokai gona meda sauma na taro qori nikua. Eda vakadinadinataka ni Kalou dina o Jiova ena ka eda tukuna kei na ka eda cakava. E cecere duadua na yacana. E laurai ena noda ivakarau ni bula nida lomani Jiova dina, eda yalodina tale ga vua, se mani vakacava na levu ni veivakatovolei i Setani. Ena sala qori, eda sa tokoni Jiova tiko nida vakarokorokotaka na yacana.

12. E vakayacori vakacava na parofisai ena Aisea 40:​3, 5?

¹² Nida tokona na yaca i Jiova se na kena irogorogo, eda sa vakatotomuri Jisu Karisito. E parofisaitaka o Aisea ni na basika e dua ena “caramaka [se, “vakarautaka,” vmr.] na sala i Jiova.” (Aisea 40:3) E vakayacori vakacava qori? E vakarautaka na sala vei Jisu o Joni na Dauveipapitaisotaki. E lako mai o Jisu ena yaca i Jiova qai vosa tale ga ena yaca qori. (Maciu 3:3; Mari. 1:​2-4; Luke 3:​3-6) E parofisaitaki tale ga: “Ena vakatakilai na lagilagi i Jiova.” (Aisea 40:5) Ena sala cava? Ni lako mai vuravura o Jisu, e vakatotomuri Jiova vinaka sara ga, e vaka ga e lako mai vuravura o Jiova.​—Joni 12:45.

13. Eda na vakatotomuri Jisu vakacava?

¹³ Me vakataki Jisu, eda vakadinadinataki Jiova. Eda vakatokai ena yacana qai tukuna vei ira kece eda sotava nona cakacaka veivakurabuitaki. Meda dua gona na ivakadinadina vinaka, e bibi meda tukuna tale ga na itavi bibi i Jisu ena kena vakarokorokotaki na yaca i Jiova. (Caka. 1:8) O Jisu na iVakadinadina levu i Jiova, eda na vakatotomuria nona ivakaraitaki. (Vkta. 1:5) Ia vakacava o keda, cava mada na ibalebale ni yaca i Jiova vei keda?

IBALEBALE NI YACA I JIOVA VEI KEDA

14. Me vaka e tukuni ena Same 105:​3, eda raica vakacava na yaca i Jiova?

¹⁴ Eda sakitaka na yaca i Jiova. (Wilika Same 105:3.) E marautaka vakalevu o Jiova nida sakitaka na yacana. (Jere. 9:​23, 24; 1 Kor. 1:31; 2 Kor. 10:17) Eda raica ni ka dokai noda rokova na yacana qai tokona na kena irogorogo. Meda kua ni madua ni tukuna vei ira eda cakacaka vata, vuli vata, ira eda tiko veitikivi kei ira eso tale nida iVakadinadina i Jiova! E vinakata na Tevoro meda kua ni tukuna na yaca i Jiova vei ira eso tale. (Jere. 11:21; Vkta. 12:17) E vinakata o Setani kei ira nona parofita lasu meda guilecava na yaca i Jiova. (Jere. 23:​26, 27) Ia nida lomana na yaca i Jiova, eda na marau tiko “ena siga taucoko.”​—Same 5:11; 89:16.

15. Na cava na ibalebale ni noda kaciva na yaca i Jiova?

¹⁵ Eda na masuta se kaciva tiko ga na yaca i Jiova. (Joeli 2:32; Roma 10:​13, 14) Na cava na ibalebale ni noda kaciva na yaca i Jiova? Eda na sega wale ga ni kila na yacana se vakayagataka. Ia eda na kilai koya vinaka sara ga, eda na nuitaki koya, eda na rai vua me vukei keda qai dusimaki keda. (Same 20:7; 99:6; 116:4; 145:18) Kena ikuri, eda na tukuna na yacana kei na nona itovo vei ira eso tale, eda uqeti ira mera veivutuni qai cakava na veiveisau mera vakadonui kina.​—Aisea 12:4; Caka. 2:​21, 38.

16. Eda na vakalasui Setani vakacava?

¹⁶ Eda na tu vakarau ni vakararawataki ena yaca i Jiova. (Jeme. 5:​10, 11) Eda vakaraitaka ni lasulasu o Setani nida yalodina tiko ga vei Jiova ena gauna dredre. Ena gauna i Jope, qo na veibeitaki e tukuna o Setani me baleti ira na qaravi Jiova: “Ena solia na tamata na ka kece e tu vua me bula kina.” (Jope 2:4) E kaya o Setani nida qaravi Jiova tiko ga ni rawarawa na bula, ia eda na biuti Jiova nida sotava na leqa. E vakalasuya na veibeitaki qori na turaga yalodina o Jope. Eda rawa tale ga ni cakava qori nikua, ke saga mada ga o Setani me vakayalolailaitaki keda. Eda na sega vakadua ni biuti Jiova. Eda nuidei ni o Jiova ena taqomaki keda tiko ga ena vuku ni yacana.​—Joni 17:11.

17. Me vaka e tukuni ena 1 Pita 2:​12, cava e dua tale na sala eda vakalagilagia kina na yaca i Jiova?

¹⁷ Eda na doka na yaca i Jiova. (Vkai. 30:9; Jere. 7:​8-11) Nida matataki Jiova qai vakatokai ena yacana, eda na rawa ni vakacaucautaka na yacana se vakarogorogocataka. (Wilika 1 Pita 2:12.) Ya na vuna, eda na gumatua kina meda vakacaucautaki Jiova ena ka eda tukuna kei na noda itovo. Nida cakava qori, eda sa vakalagilagia tiko na yaca i Jiova nida ivalavala ca.

18. Na cava e dua tale na sala meda vakaraitaka kina ni bibi duadua vei keda na yaca i Jiova? (Raica tale ga na ivakamacala e ra.)

¹⁸ Eda kauaitaka vakabibi na yaca i Jiova, sega ni keda irogorogo. (Same 138:2) Na cava e bibi kina qori? Nida lomana na yaca i Jiova, ena rawa ni vakaleqa na keda irogorogo.a Kena ivakaraitaki, e tu vakarau o Jisu me vakamaduataki qai vakamatei ni beitaki me daubasulawa, me rawa ni vakarokorokotaka tiko ga na yaca i Jiova. E ‘sega ni dua tu na ka vua me vakamaduataki,’ e vakaraitaka qori ni sega ni kauaitaka na nodra rai eso tale me baleti koya. (Iper. 12:​2-4) E bibi duadua ga vua me cakava na loma i Jiova.​—Maciu 26:39.

19. Na cava nomu rai me baleta na yaca i Jiova? Na vuna?

¹⁹ Eda sakitaka na yaca i Jiova, e ka dokai tale ga nida vakatokai meda iVakadinadina i Jiova. Qori na vuna, eda na tu vakarau meda vosota nodra vosabeci keda eso tale. E bibi duadua vei keda na yaca i Jiova, sega ni keda irogorogo. Koya gona, meda vakadeitaka mada ga meda vakacaucautaka tiko ga na yaca i Jiova, ke saga mada ga o Setani me vakayalolailaitaki keda. Nida cakava qori, eda vakaraitaka tiko ni bibi duadua vei keda na yaca i Jiova me vaka ga e cakava o Jisu.