A Dua ga na Turaga Vinaka o Jisu?

Ka e Kaya na iVolatabu

E kilai ena levu tale na ka o Jisu. E vakadinadinataki ni rogo duadua o koya ena ivolatukutuku ni kawatamata. Dikeva na veika era tukuna eso na daunitukutuku makawa kei na dauvolaivola me baleti Jisu:

“O Jisu na kai Nasareci . . . e kilai levu duadua ena itukutuku ni veigauna.”—H. G. Wells, daunitukutuku makawa ni Urope.

“E sega ni dua a bau bula e vuravura me veiuqeti vakalevu me vakataki [Jisu], qai yaga tiko ga ni toso na gauna.”—Kenneth Scott Latourette, daunitukutuku makawa ni Mereke, dauvolaivola tale ga.

Na iVolatabu e vakaraitaka na vuna e tamata rogo duadua kina o Jisu. Ni tarogi ratou nona imuri o Jisu ena nodratou nanuma me baleti koya, e sauma vakadodonu e dua vei ratou: “O kemuni na Karisito, na Luve ni Kalou bula.”—Maciu 16:16.