Ra Taroga na iTabagone . . .

Au na Valuta Vakacava na iDre ni Veimurimuri?

“Veiyasana kece ga o dreti mo veimurimuri.”​—Jese, yabaki 16.

“Niu tubucake tiko, dua na ka au sa bau vorata dredre dina na idre ni veimurimuri.”​—Jonacani, yabaki 21.

SA DUA na ka kaukaua na idre ni veimurimuri. Ia kua ni leqa, e rawa ni valuti. Sega ni o koya ga oqori, o rawa sara ga ni moica na idre oya me yaga vei iko. Me caka vakacava?

Kena imatai, me kua ni vakalecalecavi ni dau veirawai dina na idre ni veimurimuri. Na cava e so tale na ikalawa yaga? Mo nuitaka na idusidusi ni Vosa ni Kalou. E kaya na Vosa Vakaibalebale 24:5: “Na tamata daukila ka sa vakaikuritaka na kaukauwa.” Na kilaka cava ena vakaukauataki iko mo valuta kina na veimurimuri? Ni se bera nida sauma oya, meda veivosakitaka taumada na leqa e rawa ni vakavuna mo rawai kina ena idre ni veimurimuri.

O na Leqa ke O Sega ni Tamata Yalodei

Dau ka ni bolebole vei ira na itabagone iVakadinadina i Jiova na idre oqo baleta ni tiki ni nodra bula mera lako yani e matanalevu mera lai wasea nodra vakabauta. (Maciu 28:19, 20) O dau vakila ni so na gauna e vaka me dredre mo vakamacalataka nomu vakabauta vei ira na nomu icaba? Sega ni o iko ga o vakila oqori. E kaya o Melania, sa yabaki 18: “Au nanuma ga ni na rawarawa meu kaya vei ira noqu icaba niu dua na iVakadinadina i Jiova, ia e sega ni vaka kina!” E kaya tale: “Gauna sara ga meu sa vakadeitaka e yaloqu niu na vakatakila niu iVakadinadina i Jiova, au mai datuvu tale yani.” Kena irairai ni ka e tarovi koya na nona rerevaki ira na nona icaba, e veivesuki na idre ni veimurimuri.

Ia e vakatakila na iVolatabu ni o ira mada ga na tamata e liu, e vakasakiti na nodra vakabauta, era dau datuvu ni tukuni koya na Kalou vei ira na tamata. Me kena ivakaraitaki, e kila na tamata gone o Jeremaia ni na vakalialiai qai vakacacani ke muria na ivakaro ni Kalou me vosa ena doudou. Kena ikuri, e sega vei Jeremaia na yalodei. Baleta na cava? E kaya o koya vua na Kalou: “Raica, ka’u sa sega ni kila vosa: ni’u sa gone ga koi au.” E ciqoma beka na Kalou nona kaya o Jeremaia ni se gone ga, ena sega ni rawata kina me vosa? Sega. E kaya ga vei koya na parofita oqo o Jiova: “Mo kakua ni kaya, Au sa gone ga.” Sega tale ni vakadaroya o Jiova na nona inaki me vakacolata vua na cauravou lomalomarua oqo e dua na ilesilesi bibi.​—Jeremaia 1:6, 7.

E rawarawa nida kuitaki ena idre ni veimurimuri ke da sega ni tamata yalodei, se da lomalomarua. Vakadinadinataki na tikina oqori ena dua na vakadidike. Ena 1937, a dua kina na nona vakatovotovo rogo e dua na saenitisi, na yacana o Muzafer Sherif. E biuti iratou vata e le vica ena dua na rumu buto, vakaraitaka vei iratou e dua na matanirarama lailai, qai taroga se vakacava na yawa ni vanua e toso kina na rarama oya.

Ia a sega ni bau toso na rarama; e caka e dua na icakacaka me nanumi kina ni toso. Duidui na ka eratou tukuna na tiko ena loma ni rumu ni ratou sa tarogi yadudua se cava eratou raica. Ia, eratou sa qai tarogi vata kece me ratou tukuna i cake na nodratou nanuma. Na cava e yaco? Eratou sega ni nuidei ena ka eratou nanuma, ratou mani veimurimuritaka kina na ka eratou vakamacalataka. Ni ratou vakatovolei vaka vica, sa qai veivolekati ga na nodratou isaunitaro me yacova ni sa duavata ga na ka eratou tukuna. E muri, ni ratou se baci kau vakatikitiki me ratou vakatarogi yadudua, eratou se veimurimuritaka tiko ga na nodratou isaunitaro.

Dua na tikina bibi e vakavotui ena vakatovotovo oya. Na tamata e sega ni yalodei e rawarawa ni sikalutu ena idre ni veimurimuri. Sa dua dina na ka ririkotaki oqo. Ni idre ni veimurimuri e rawa ni moica na noda rai ena so na ile bibi me vaka na veiyacovi ni se bera na vakamau, vakayagataki ni wainimate ni veivakamatenitaki, kei na veika meda vakaliuca ena noda bula. Ke da lai veimurimuritaka wale tu ga na veika vaka oya, ena rawa sara ga ni leqa kina noda bula mai muri. (Lako Yani 23:2) Na cava beka me caka?

Vakacava ke o tiko tale ga ena vakatovotovo oya, o qai kila deivaki ni sega ni toso na matanirarama? De o na sega ni rawai ena nodratou ivakamacala na kena vo. Io, e vinakati na yalodei. Ia na mataqali yalodei vakacava oqo, eda na rawata vakacava?

Mo Nuitaki Jiova

De o na rogoca e levu na ivakamacala me baleta na tarai cake ni yalodei. Ia e dau duidui sara na rai se sala cava me caka kina oqori, me vakacava tale ga na kena levu. Na ivakasala vakayalomatua oqo e tauca na iVolatabu: “Au sa kaya kina vei kemuni kece sara: Me kakua ni dua vei kemuni me sivia na nona nanuma me baleti koya vaka i koya. Ia me vakarauta ga na nomu vakasama me baleti kemuni ka mo ni dui lewai kemuni vakavinaka.” (Roma 12:3, VV) Dua tale na vakadewa ni tikina vata ga oqo e kaya: “Au via kaya me kua ni dua vei kemudou me nanuma ni sa dua dina na ka o koya, ia me raici koya ga ena rai vakayalomatua.”​—Charles B. Williams.

Ke da ‘raici keda ena rai vakayalomatua,’ eda na sega ni nanuma nida dua na ka, eda na sega ni dokadoka, se qaciqacia. Ena yasana adua, na rai vakayalomatua ena okati kina na noda bau nuitaki keda toka ena ka eda vakasamataka, kei na kena vakatulewataki toka vakavuku na noda bula. O koya e buli keda e solia vei keda na ‘yalomatua,’ na isolisoli talei. (Roma 12:1, NW) Nida vakasamataka tiko na tikina oqori, eda na sega ni vakatara tale e dua me vakatulewa ena vukuda. Ia e tiko e dua tale na mataqali yalodei ena qai taqomaki iko ga vakalevu.

A uqeti o Tui Tevita me vola: “Sai kemuni ga, na Turaga Jiova, ka’u sa nuinui tiko kina: oi kemuni ga ka’u a vakararavi kina ni’u a cauravou ka yacova na gauna oqo.” (Same 71:5) Io, a nuitaka vakaoti na Tamana vakalomalagi o Tevita, qai cakava oqori mai na gauna sara e se gone kina. E “cauravou ga” o koya ena gauna sa bolei ira kina na sotia ni Isireli o Koliaci, na tuwawa ni Filisitia. Era rere vakalevu na sotia. (1 Samuela 17:11, 33) De dua sa curumi ira kece na yalodatuvu. De ra veivosakitaka na vakaitamera i Koliaci kei na nona dau vala, ra qai veikayaka ni tamata lialia ga ena via vorati koya. A sega ni rawai Tevita na vosa ni veivakayalolailaitaki vaka oya. Baleta?

Dikeva mada na vosa i Tevita vei Koliaci: “Ko sa lako mai vei au ka vakaiseleiwau, ka vakamoto, ka vakaisasabai: ia koi au, ka’u sa lako mai vei iko e na yaca i Jiova ni lewe vuqa; o koya na Kalou ni nodra mataivalu na Isireli, o ira ko a daubolea.” (1 Samuela 17:45) A sega ni lecava o Tevita na levu i Koliaci, nona kaukaua, kei na nona iyaragi. Ia e dua na ka e sega vakadua ni lecava me vaka ga nona sega ni lecava ni tu i cake na lomalagi. E kila ni sega sara ga ni dua na ka o Koliaci ni vakatauvatani kei Jiova. Ke sa totaki Tevita o Jiova, na cava me rerevaki Koliaci kina? E dei na yalo i Tevita baleta ni vaka oya na nona nuitaka na Kalou. Se mani vakacava na levu ni nodra datuvu e so tale, ena sega ni muri ira.

Vakacava o iko, e vaka tale ga oya nomu nuitaki Jiova? E sega ni veisau o koya mai na gauna sara i Tevita. (Malakai 3:6; Jemesa 1:17) Na levu ga ni nomu vulici koya, na levu tale ga ni nomu nuitaka na ka kece e tukuna vei iko ena nona Vosa. (Joni 17:17) O na kunea e kea na idusidusi dei qai nuitaki mo na dusimaki kina ena nomu bula, mo na valuta tale ga kina na idre ni veimurimuri. Ni o sa nuitaki Jiova me ivakadei ni yalomu, e tiko e dua tale na ka mo cakava.

Me So na Nomu Daunivakasala Vinaka

E vakabibitaka na Vosa ni Kalou na yaga ni noda qara na veidusimaki vukutaki. “Na tamata daukila ka, ena rawata nai vakavuvuli vuku,” e kaya na Vosa Vakaibalebale 1:5. Rawa ni o golevi rau nomu itubutubu me rau dusimaki iko ni rau kauaitaki iko dina. E kila vinaka oqo o Indira. E kaya: “Na vu ni noqu muria tiko ga na ka dina me yacova mai qo baleta ga o rau na noqu itubutubu, ni rau dusimaki au e veigauna ena iVolatabu, rau vukei au tale ga meu raici Jiova dina.” Vaka tale ga oqori nodra nanuma e levu na itabagone.

Ke o lewe ni dua na ivavakoso vakarisito, e tiko tale ga kina e dua na ivukevuke totoka​—o ira na ivakatawa era lesi, se o ira na qase, kei na so tale na lotu Vakarisito matua. E kaya o Nadia, e dua na goneyalewa: “Au dau dokai iratou na qase ni noqu ivavakoso. Au se nanuma tu ga qo e dua nona ivunau na ivakatawa daulewa e vakamuai me ganiti keimami na itabagone. Oti na soqoni, keirau marau dina kei na noqu itokani baleta ni veika e vunautaka e sota sara ga kei na ka keirau vakila tiko.”

Dua tale na iyaragi kaukaua me valuti kina na idre ni veimurimuri ca oya na idre ni veimurimuri e vinaka. Ke o digitaki ira vinaka nomu ilala, era na vukei iko mo dei matua ena veika e yaga qai vinaka. Eda na digidigi vinaka gona vakacava? Nanuma tiko na ivakasala oqo: “Ena vuku mai ko koya sa malele vata kei ira na vuku: ia ko koya era veitokani vata kei na lialia ena rusa.” (Vosa Vakaibalebale 13:20) A digitaki ira ga na itokani vuku mai koronivuli o Nadia—o ira na tacina vakayalo era muria dei na ivalavala kilikili. E nanuma lesu: “Ke ra via wede mai na tagane e koronivuli, totolo ga ni keimami dau veivakaukauataki vakataki keimami.” O ira na itokani vinaka era na vakavotuya mai na noda itovo vinaka. Ena yaga dina na nomu sasaga mo vaqarai ira.

Mo kila tiko, ke o tara cake nomu nuitaki Jiova, qara nodra veidusimaki na lotu Vakarisito matua, digi ira tale ga vakavuku na nomu itokani, o na valuta rawa na idre ni veimurimuri. O na dua sara tale ga vei ira e uqeta na veimurimuritaki ni ka vinaka vei ira nomu itokani, mo vukei ira mera toka dei ga kei iko ena sala e basika ina bula.

[Tikina bibi ena tabana e 14]

Vakasaqarai ira na itokani vinaka, era lomana tale ga na Kalou kei na nona ivakatagedegede me vakataki iko

[iYaloyalo ena tabana e 14]

“Sa dau vakarusa na i vakarau vinaka ko ira na i tokani ca.”​—1 Korinica 15:33, VV

“Ena vuku mai ko koya sa malele vata kei ira na vuku.”​—Vosa Vakaibalebale 13:20