Kua ni Datuvu ke o Vakasaurarataki

ITUVAKI DREDRE

“Ena gauna au se vuli kina ena paraimari e dau mositi au niu sega ni ciqomi vei ira na noqu itokani. Niu curu ena sekeniri au veisautaka na kequ irairai kei na noqu itovo meu taleitaki kina. Dua na ka na noqu vinakata me dua na noqu itokani, au mani muria na ka kece era tukuna na noqu icaba.”—Jennifer, yabaki 16.a

Era dau vakasaurarataki iko na nomu icaba mai koronivuli mo cakava na ka era vinakata? E tiko ena ulutaga qo eso na ivakasala ena yaga vei iko.

KA MO KILA

O na rawa ni caka ca ni o vakasaurarataki.

“Na ilala ca e vakacacana na itovo vinaka.”—1 Korinica 15:33.

“Keimami sa kila tu ni ca, ia keimami cakava ga me keimami vakalomavinakataki ira neimami icaba!”—Dana.

E sega ni bale ga vei ira na nomu icaba.

“Niu via cakava na ka e dodonu, e tiko ga vei au na ca.”—Roma 7:21.

“Dau bale ga vei au na noqu lai muria na ka era vinakata na noqu icaba, niu taleitaka na ka era veitalanoataka.”—Diana.

Ena vinaka nomu lewaeloma ni o sega ni muria na ka era tukuna na nomu icaba.

“Me vinaka na nomuni lewaeloma.”—1 Pita 3:16.

“Au dau rawai rawarawa vei ira na noqu icaba, ia qo au sa sega ni rerevaki ira, sa dei tale ga na noqu vakatulewa. Sega ni dua na ka e sivia na noda moce ena bogi ena lewaeloma vinaka.”—Carla.

KA O RAWA NI CAKAVA

Nira vakasaurarataki iko nomu icaba mo caka ca, qo eso na ka o rawa ni cakava:

Vakasamataka na ka ena yaco. O rawa ni taroga, ‘Vakacava keu tobo niu muria na ka era tukuna na noqu itokani? Na cava erau na tukuna na noqu itubutubu? Au na veivutunitaka na ka au cakava?’—iVakavuvuli vakaivolatabu: Kalatia 6:7.

“Erau dau tarogi au na noqu itubutubu, ‘Ke o muria na ka era tukuna, na cava ena yaco?’ Au sa qai kila kina na itinitini ca ni veimurimuri.”—Olivia.

Dei ena ka o vakabauta. O rawa ni taroga, ‘Na cava e cala kina keu cakava qo? Ena tarai ira vakacava eso tale?’—iVakavuvuli vakaivolatabu: Iperiu 5:14.

“Niu vakasaurarataki meu cakava e dua na ka niu se gone, au dau kaya ga sega se sauma ga vakalekaleka na vuna au sega ni cakava kina, qo au sa rawa ni vakamacalataka vakavinaka na vuna. Au dei ena ka au vakabauta me baleta na ka e dodonu kei na ka e cala. Sega ni dua tale ena vakatulewa kina.”—Anita.

Vakasamataka na kemu irogorogo. O rawa ni taroga, ‘Na cava au vinakata meu kilai kina?’ Nira vakasaurarataki iko na nomu icaba, o rawa ni taroga, ‘Keu cakava qo, au na rogorogoca kina?’—iVakavuvuli vakaivolatabu: 2 Korinica 13:5.

“Au sega sara ni kauaitaka vakabibi na ka era nanuma eso tale, au lomavakacegu ga ena ka au sa kilai kina. E levu na noqu itokani era taleitaki au.”—Alicia.

Kua ni lekaleka nomu rai. O ira o via vakalomavinakataka e koronivuli, o na sega ni bula vata kei ira ena vo ni nomu bula.

“Au sega ni bau kila na yacadra e vica na noqu itokani niu raica lesu na itaba mai koronivuli. Ia niu se vuli tiko, e bibi cake vei au na ka era tukuna mai na ka au vakabauta. Sa bau ka vakalialia dina!”—Dawn, sa yabaki 22 ena gauna qo.

Kila na ka mo cakava. E kaya na iVolatabu: “Moni kila . . . na ka moni tukuna vua na tamata yadua.”—Kolosa 4:6.

“Erau vukei keirau vakaveitacini na neirau itubutubu me keirau vakatasuasuataka na ituvaki dina e dau yaco, keirau na kila kina na ka me keirau cakava ke yaco na ituvaki qori.”—Christine.