Ra iTabagone​—Moni Vorata na iDre ni Veimurimuri

‘Nomuni vosa me vakamasima, moni kila kina na ka moni tukuna vua na tamata yadua.’—KOLO. 4:6.

1, 2. Na cava na nodra rai e levu na itabagone me baleta na nodra raici nira duatani, na cava na vuna?

E KENA rairai ni o sega wale ga ni dau rogoca ni tukuni na “idre ni veimurimuri,” ia o sa sotava sara ga ena dua na gauna. De a uqeti iko e dua mo cakava na ka o kila ni cala. Na cava o vakila ni yaco qori? “Eso na gauna au dau kaya ga meu yali vakasauri,” e tukuna o Christopher e yabaki 14, “se meu sa vakataki ira ga na vo ni noqu icaba e koronivuli, meu kua kina ni duatani.”

² E va tale ga qori na nomu rai ena so na gauna me baleta na nodra veivakamuai na nomu icaba? Ke vaka kina, cava na vuna? De dua o vinakata mera ciqomi iko, e sega ni cala qori. O ira mada ga na uabula era vinakata tale ga mera ciqomi. E sega ni dua vei keda—gone se qase—e vinakata me cati. Ia o ira mada ga e dodonu tu ga na ka era cakava era sega ni dau taleitaki. O Jisu mada ga a dau cakava na ka dodonu, ia a qai cati. Eso era qai yaco mera nona imuri, ia eso tale era cata na Luve ni Kalou ra qai “sega ni dokai koya.”—Aisea 53:3.

Na Kaukaua ni iDre ni Veimurimuri

3. Na cava e rawa ni vakaleqai iko kina na nomu via muria na ka era dau cakava na nomu icaba?

³ Eso na gauna o na temaki mo muria na ka era cakava na nomu icaba ni o sega ni vinakata mo cati. Ia e cala sara ga na rai va qori. O ira na lotu vaKarisito mera kua ni ‘vagonegonea, mera kuitaki voli ena biau.’ (Efeso 4:14) E dau rawarawa na nodra vakamuai na gonelalai. Ia mo nanuma tiko ke o itabagone, o na uabula ena dua na gauna. Koya gona, ke o vakabauta ni na vinaka vei iko na nona ivakatagedegede o Jiova, mo dei sara tiko kina. (Vkru. 10:12, 13) Ke o sega ni cakava qori, era sa na vakatulewa tu ga vei iko eso tale. Ena gauna ga o vakamalumalumu kina ena ka era tukuna eso mo cakava, o sa vaka sara ga na nodra bobula.—Wilika 2 Pita 2:19.

4, 5. (a) A rawai vakacava o Eroni ni vakasaurarataki me cakava na ka e cala, na cava o vulica kina? (b) Na iwalewale cava soti era na vakasaurarataki iko kina na nomu icaba mo cakava na ka ca?

⁴ Ena dua na gauna, o Eroni na tuakai Mosese a vakamalumalumu ena ka era tukuna vua na kai nona. Nira vakasaurarataki koya na Isireli me bulia e dua na nodra kalou, a vakamuria sara na ka era tukuna. Ia na ka e cakava qo e sega ni vakaraitaka ni tamata rerere. Ni bera ni yaco na ituvaki qo, a tokoni Mosese o Eroni ni lai vosa vei Fero, na iliuliu kaukaua duadua e Ijipita. A tukuna ena doudou o Eroni vei Fero na itukutuku ni Kalou. Ia a qai vakamalumalumu nira vakasaurarataki koya na kai nona, o ira na Isireli, me cakava na ka era vinakata. Io, e kaukaua dina na idre ni veimurimuri! A rawarawa cake vei Eroni me kua ni vakamalumalumu vua na tui kei Ijipita, ia a dredre me cakava qori vei ira na kai nona.—Lako 7:1, 2; 32:1-4.

⁵ Me vaka ga e laurai ena ivakaraitaki i Eroni, na idre ni veimurimuri e sega ni yalani ga vei ira na gone, se vua e dua e via caka ca tu ga. O ira mada ga na dau via caka vinaka me vakataki iko ga, era rawa ni vakila tale ga na idre ni veimurimuri. Era na rairai saga na nomu icaba mera vakasaurarataki iko mo cakava e dua na ka ca, de dua era na tukuna mo cakava na ka era kila ni o sega ni dau cakava, era veibeitaki se veivakatanini. Se mani vakacava na kena iwalewale e vakayacori kina, e sega ni dau rawarawa me vorati na idre ni veimurimuri. Ia mo cakava rawa qori, e vinakati mo vakadeitaka sara ga qo ni dina na ka o vakabauta.

“Ni Dau Vakadeitaka se o Cei Dina o Kemuni”

6, 7. (a) Na cava e bibi kina mo vakadeitaka ni dina na ka o vakabauta, o rawa ni cakava vakacava qori? (b) Na taro cava soti o rawa ni taroga me vakaukauataka na nomu vakabauta?

⁶ Mo rawa ni vorata na idre ni veimurimuri, e vinakati mo vakadeitaka ni donu na ka o vakabauta kei na ivakatagedegede o muria. (Wilika 2 Korinica 13:5.) De o dau mamadua, ia ena vakadoudoutaki iko na dei ni nomu vakabauta. (2 Tim. 1:7, 8) Ia o koya mada ga e doudou ena via dredre toka me valataka na ka e sega ni vakabauta sara mai vu ni lomana. Koya gona, vakacava mo vakadeitaka rawa mada e liu ni dina na ka o sa vakavulici kina ena iVolatabu? Mo tekivu mada e liu ena nomu dikeva eso na yavu ni ivakavuvuli. Me kena ivakaraitaki, o vakabauta na Kalou, o sa rogoca tale ga eso nira vakaraitaka na vuna era vakabauta kina ni bula dina tiko na Kalou. E vinaka gona mo taroga: ‘Au vakadeitaka vakacava ni bula dina tiko na Kalou?’ E sega ni tukuni me vakavurea vei iko na vakatitiqa na taro qori, ia me vakaukauataka ga na nomu vakabauta. E vinaka mo taroga tale ga: ‘Au kila vakacava ni uqeti vakalou na iVolatabu?’ (2 Tim. 3:16) ‘Na cava au vakabauta kina nida sa donuya tu qo na “iotioti ni veisiga”?’ (2 Tim. 3:1-5) ‘Au vakadeitaka vakacava ni na vinaka vei au na ivakatagedegede i Jiova?’—Aisea 48:17, 18.

⁷ De o na sega ni via taroga eso na taro va oya ni o leqataka ni o na sega ni kila na kena isau. Qo e vaka ga na nomu sega ni via raica na ivakatakilakila ni waiwai ni nomu motoka, ni o ririkotaka ni o na raica ni sa “maca”! Ena vinaka mo kila ni sa sega tiko na waiwai ena taqe baleta mo cakava kina e dua na ka. Koya gona, e vinaka mo dikeva na vanua e luluqa tiko kina na nomu vakabauta, o qai vakavinakataka me rawa ni dei tiko ga.—Caka. 17:11.

8. Vakamacalataka na sala o na vakadeitaka sara ga kina ni vukutaki mo muria na ivakaro ni Kalou me baleta na veidauci.

⁸ Dikeva mada e dua na ivakaraitaki. E uqeti iko na iVolatabu mo “dro tani mai na veidauci.” E vinaka mo taroga: ‘Na cava e ka vukutaki kina meu muria na ivakaro oya?’ Vakasamataka mada na vuna era na via vakayacora kina na nomu icaba na ivalavala va oya, kei na vuna ‘e sa valavala ca sara tiko ga kina e yagona’ e dua e dauveidauci. (1 Kor. 6:18) Vakalewa vinaka na vuna kece qori, qai taroga: ‘E vinaka me muri na ka e tukuna na iVolatabu se na ka era cakava na noqu icaba? Ena yaga meu vakaitavi ena veiyacovi tawakilikili?’ Vakasamataka vinaka na tikina qo qai taroga: ‘Na cava ena yaco keu vakaitavi ena veiyacovi tawakilikili?’ Era na rairai ciqomi iko na nomu icaba, ia vakacava na gauna o na tiko kina kei rau na nomu itubutubu se o ira na nomu itokani lotu vaKarisito ena Kingdom Hall? Vakacava na gauna o na via masu kina vua na Kalou? O vinakata dina mo vakaleqa na nomu veiwekani kei na Kalou mo vakalomavinakataki ira ga kina na nomu icaba e koronivuli?

9, 10. Mo rawa ni yalodei ni o maliwai ira na nomu icaba, ena yaga vakacava na nomu vakadeitaka ni dina na ka o vakabauta?

⁹ Ke o dua na itabagone, o sa donuya tu qo ena dua na gauna o sa “yalomatua” tiko mai kina. (Wilika Roma 12:1, 2.) Vakayagataka na nomu bula vakaitabagone mo vakasamataka kina vakabibi na ibalebale ni nomu dua na iVakadinadina i Jiova. Ni o vakasama vakatitobu va qori, o na vakadeitaka kina ni dina na ka o vakabauta. Ni o sotava gona na idre ni veimurimuri, ena totolo ga na nomu tukuna na ka o vakabauta o qai cakava ena nuidei. O na vakataki koya na tacida goneyalewa a tukuna: “E ivakarau tu ni noqu bula na noqu dau vorata na idre ni veimurimuri, qo au vakaraitaka tiko ga kina na ka au vakabauta, niu na dei tale ga kina. Au vakaraitaka tale ga kina ni talei qai bibi vei au na noqu lotu, qai gole vakatabakidua sara ga kina na noqu vakasama, na noqu isausau, noqu itovo kei na noqu bula kece.”

¹⁰ Io, e ka ni sasaga mo dei ena ka o kila ni donu. (Luke 13:24) O na rairai vaqaqa ke yaga na nomu cakava qori. Ia nanuma tiko qo: Ke ra raica eso ni vaka o kere veivosoti tiko se madualaka na ka o vakabauta, era na kidava totolo qo, sa na qai kaukaua ga na nodra sasaga mera vakatovolei iko. Ia ke o vosa ena nuidei, o na kidacalataka na totolo ni nodra na sega ni vakasagai iko na nomu icaba.—Vakatauvatana Luke 4:12, 13.

‘Dauvakananuma na ka mo Kaya’

11. Ena yaga vakacava na nomu vakarautaki iko rawa mo vorata na idre ni veimurimuri?

¹¹ E dua tale na ikalawa bibi mo vorata kina na idre ni veimurimuri oya na nomu vakarautaki iko rawa. (Wilika Vosa Vakaibalebale 15:28.) Na noda vakavakarau e kena ibalebale nida na vakasamataka rawa na ituvaki eda kila ni rawa ni yaco. Ni o vakavakarau va qo, o na levea kina eso na ituvaki e rawa ni tini ena veileti. Me kena ivakaraitaki, kaya mada o taubale tiko e gaunisala o raica sara eso na nomu lewenikalasi era vakatavako tiko. E macala ga nira na rawa ni solia vei iko e dua na itibi tavako. Ni o sa kila rawa na leqa e rawa ni yaco, na cava mo cakava? E tukuna na Vosa Vakaibalebale 22:3: “O koya sa yalomatua sa kunea na ca, ka sa vunitaki koya.” Ke o muria e dua tale na gaunisala, o na sega ni sotava kina na leqa. E sega ni kena ibalebale qo ni o rerere, ia e ka vakayalomatua ga mo cakava.

12. Na cava o rawa ni cakava ke o tarogi ena dua na ka e rawa ni vakacudrui iko?

¹² Ia vakacava ke o sa sega sara ga ni levea rawa e dua na ituvaki va ya? Kaya mada ke dua na nomu icaba e sega ni vakabauta ni o se sega ni veiyacovi qai taroga: “O se sega dina ni veiyacovi?” E bibi ena ituvaki qo mo muria na ivakasala ena Kolosa 4:6: “Moni vosa ena yalovinaka ena gauna kece, me vakamasima, moni kila kina na ka moni tukuna vua na tamata yadua.” O koya gona, me vaka ga e vakamacalataki ena tikinivolatabu oya, na nomu sauma na mataqali taro va ya ena vakatau ena ituvaki o tu kina. E sega ni gadrevi mo sa vunau sara ga mai na iVolatabu. De dua e sa na rauta ga mo sauma vakadodonu. Me kena ivakaraitaki, ni o sauma na taro me baleta na nomu sa veiyacovi se sega, o rawa ni tukuna ga, “Sega” se “Vosota qori e noqu, au na qai vakatulewa ga kina.”

13. Na cava e vinakati kina na yalomatua ni vakanini iko e dua na nomu icaba?

¹³ E sega ni dau balavu na ivakamacala i Jisu, e levu na gauna e dau lekaleka ga, ia e rawati kina eso na ka vinaka. Na gauna mada ga a vakatarogi koya kina o Eroti, a sega sara ga ni tukuna e dua na ka. (Luke 23:8, 9) Na sala vinaka me dau saumi kina na taro ni veibeci oya meda galu. (Vkai. 26:4; Dauv. 3:1, 7) O na rairai siqema ni dua a dau vosavakacacataki iko e liu e via kila dina na ka o vakabauta, me kena ivakaraitaki na ka me baleta na veiyacovi tawakilikili. (1 Pita 4:4) Ena ituvaki qo, ena vinaka mo vakamacalataka sara vakavinaka na ka o vakabauta qai yavutaka ena iVolatabu. Kua ni o rere na vakamacala, dau ‘vakarau tu ena gauna kece mo vakamacala.’—1 Pita 3:15.

14. O na maqosataka vakacava na nomu sauma vakadodonu eso na ka o na vakasaurarataki kina?

¹⁴ Eso na ituvaki o rawa sara ga ni vosa vakadodonu me saumi kina na ka e caka vei iko. Ia mo maqosataka na kena icakacaka. Me kena ivakaraitaki, ke vakasaurarataki iko e dua na nomu icaba mo taura e dua na itibi, o rawa sara ga ni tukuna vua “Sega vinaka,” o qai rawa ni tomana “Au nanuma ni o vuku, o na sega ni vakatavako!” Raica na kena saumi lesu eke na ka o vakasaurarataki kina? A sega ni gadrevi mo vakamacalataka na vuna o sega ni vakatavako kina, ia na ka o tukuna ena lai lialiaci kina o nomu icaba se cava e vakatavako kina.a

15. Na gauna cava ena vinaka kina mo gole tani ga mai na nodra veivakamuai na nomu icaba, na cava na vuna?

¹⁵ Vakacava ke o saga mo vorata na nodra veivakamuai na nomu icaba, ia era se vakasagai iko ga? Ni yaco qori, e vinaka mo gole tani ga. Na dede ga ni nomu tiko, na kena rawarawa tale ga mo soro vei ira. E vinaka gona mo gole tani ga. Nomu cakava qori, e sega ni kena ibalebale ni o dadatuvu, ia o lewai iko ga vakamatau. O na sega gona ni vaka na bobula vei ira na nomu icaba, ia o vakamarautaka ga na loma i Jiova.—Vkai. 27:11.

‘Navunavuci e Yaga’

16. E rawa nira veivakasaurarataki vakacava eso era tukuna nira lotu vaKarisito?

¹⁶ Ia eso na gauna o ira sara ga na gone era tukuna nira qaravi Jiova e rawa nira veivakasaurarataki me vakayacori na ka e sega ni kilikili. Me kena ivakaraitaki, vakacava ke o yaco yani ena dua na soqo e tuvanaka e dua, o qai liaca ni sega ni tiko kina e dua na uabula me raica na ka e caka? Se vakacava ke kauta yani ena dua na soqo na alakaolo e dua na gone e tukuna ni lotu vaKarisito, ia eso vei kemuni na tiko ena soqo oya e se sega ni dodonu moni gunu? E levu na ituvaki e basika ena vinakati kina mo muria na ka e sa vakavulici kina na nomu lewaeloma ena iVolatabu. E tukuna e dua na itabagone lotu vaKarisito: “A saravi tiko e dua na iyaloyalo e levu kina na vosavosaca, keirau mani biubiu kei taciqu. Ia o ira na kena vo keimami sarasara vata tiko era dabe tu ga. Erau vakacaucautaki keirau na neirau itubutubu ena ka keirau cakava. Ia era cudru o ira na kena vo keimami sarasara vata ni keirau vakamadualaki ira.”

17. Ni o lako ena dua na soqo, na cava o rawa ni cakava mo muria tiko ga kina na ivakatagedegede ni Kalou?

¹⁷ Me vaka ga e laurai ena ivakaraitaki e sa cavuti oti, o se rawa tiko ga ni sotava eso na ka dredre ke o muria mada ga na nomu lewaeloma e vakavulici ena iVolatabu. Ia cakava ga na ka o kila ni donu. Mo navuca rawa tu na ka mo cakava. Ke o lako ena dua na soqo, vakasamataka rawa tu na sala mo biubiu kina ke yaco eso na ka tawanamaki. Eso na gone era sa dau tukuna rawa tu vei ira na nodra itubutubu mera lai kauti ira mai ena gauna ga era qiri yani kina. (Same 26:4, 5) Qori na ‘navunavuci e yaga.’—Vkai. 21:5.

‘Mo Reki ni o se Cauravou’

18, 19. (a) Na cava o rawa ni vakadeitaka kina ni vinakata o Jiova mo marau? (b) Na cava na rai ni Kalou me baleti ira era vorata na idre ni veimurimuri?

¹⁸ E buli iko o Jiova mo marautaka na bula, e vinakata gona mo marau. (Wilika Dauvunau 11:9.) Nanuma tiko ni o ira na nomu icaba era “marautaka na ivalavala ca e lekaleka wale na kena kamica.” (Iper. 11:25) Ia e vinakata na Kalou dina mo rawata e dua na ka e vinaka cake sara. E vinakata o koya me tawamudu na nomu marau. Ni o vakatovolei gona mo cakava e dua na ka o kila ni cala e mata ni Kalou, nanuma tiko ni ka e vinakata o Jiova mo cakava ena yaga ga vei iko ena veigauna se bera mai.

¹⁹ Ni o dua na itabagone, e vinaka mo kila tiko ke ra mani ciqomi iko mada ga na nomu icaba, e levu vei ira qori era na rairai guilecava na yacamu ni oti e vica na yabaki. Ia ni o vorata na idre ni veimurimuri, e raica vinaka tu qori o Jiova, ena sega tale ga ni guilecavi iko kei na nomu yalodina. Ena “dolava . . . na katuba ni lomalagi, ka sovaraka vei [iko] na ka ni veivakalougatataki, me na sautu dina sara.” (Mala. 3:10) Ni dauloloma tale ga o Jiova, ena solia na yalona tabu me vakaukauataki iko ena so na ka o se rairai lekata tiko ena gauna qo. Io, e rawa ni vukei iko o Jiova mo vorata na nodra veivakamuai na nomu icaba!

[iVakamacala e ra]

O se Nanuma Tiko?

• E kaukaua vakacava na idre ni veimurimuri?

• Ena yaga vakacava ena nomu vorata na idre ni veimurimuri na nomu vakadeitaka ni dina na ka o vakabauta?

• O rawa ni vakarautaki iko vakacava ina idre ni veimurimuri?

• O kila vakacava ni raica vakabibi o Jiova na nomu yalodina?

[iYaloyalo ena tabana e 8]

Na cava a vakadonuya kina o Eroni me bulia e dua na luve ni bulumakau koula?

[iYaloyalo ena tabana e 10]

Mo tu vakarau—dau vakasamataka rawa na ka mo tukuna