Na Yalo ni Veimurimuri Kei na Nomu iTavi Dokai ni Vunau
1 Na veimurimuri e dua na igu kaukaua—na veimurimuri vinaka se kena e ca. O ira noda itokani dauveiqaravi i Jiova era vakayaloqaqataki keda meda cakava na cakacaka vinaka. (Iper. 10:24) Ia, o ira na wekada tawa vakabauta, itokani vakacakacaka, itokani e koronivuli, o ira eda tiko veitikivi, se so tale era na sagai keda tiko ga meda cakava na ka e veicalati kei na ivakavuvuli vakarisito. Era na rairai ‘beitaka vakailasu na noda ivalavala vinaka vei Karisito.’ (1 Pita 3:16) Eda na vunau tiko ga vakacava ke mani kaukaua sara na veivakamuai cala eda na sotava?
2 Lewenivuvale: Na tagane vakawati e sega ni iVakadinadina i Jiova ena sega ni vinakati watina kei iratou na luvena me ratou lai vunau. E yaco oqo ena dua na vuvale mai Mexico. Eratou tiko ena dina e dua na yalewa vakawati kei na vitu na luvena. Dua na gauna a tusaqati iratou o tamadratou baleta ni sega ni vinakati iratou nona vuvale me ratou lai vunau se ratou veisoliyaka na ivola vakaivolatabu e veivale. E kaya ni oqo e cakacaka beci. Ia, eratou tudei tu ga nona veitinani ena qaravi Jiova qai dau wasoma tiko ga na nodratou cakacaka vakaitalatala. Toso na gauna, e raica na turaga oqo na yaga ni kena muri na ituvatuva vakalou ni cakacaka vakavunau, mani yalataki koya vei Jiova. E 15 taucoko na yabaki e tauri koya me qai ciqoma na ka dina, a rawa beka ni ciqoma na ka dina ke ratou a sega ni vosota na nona veitinani, nodratou cakava na itavi dokai me ratou vunau?—Luke 1:74; 1 Kor. 7:16.
3 iTokani Vakacakacaka: Era na sega soti ni taleitaka e so na nomu itokani vakacakacaka na nomu dau vunau vei ira. E kaya e dua na tacida yalewa ni gauna e tubu kina e nona vanua ni cakacaka na veivosakitaki ni iotioti ni veisiga, e a vakalialiai baleta ni a vakatura o koya mera wilika na Maciu wase 24. Oti ga e vica na siga, e tukuna vua e dua rau cakacaka vata ni sa wilika oti na wase ni iVolatabu oya qai drukataka na ka e wilika kina. E solia sara vua na tacida yalewa e dua na ivola, mani tuvanaki me rau vuli iVolatabu vakaveiwatini. Tini ga ena rua na kaloko ena mataka lailai na imatai ni nodratou vuli oya. Ni oti ga na ikatolu ni vuli, rau sa tiko sara ena soqoni, vakalailai ga rau sa muduka na nodrau vakatavako, rau sa tekivu lako sara ena cakacaka vakaitalatala. Ena sega ni yaco na veisau oqo ke a sega ni saga me vunautaka na nona inuinui na tacida yalewa, se vakaevei?
4 iTokani e Koronivuli: E sega ni ka vou vei ira na itabagone iVakadinadina na yalo ni veimurimuri era sotava e koronivuli ra qai madua ni so tale na itabagone era dau vakayalolailaitaki ira nira vunau. E kaya e dua na itabagone lotu Vakarisito mai Mereke: “Au dau rere ni vunau vei ira noqu icaba baleta niu madua nira na vakalialiai au.” Mani bese ni vunau vei ira vaka kina ena yalava ni ivavakoso. O na tudei vakacava nira temaki iko na nomu icaba? Vakararavi vei Jiova, ena qai vakadonui iko o koya. (Vkai. 29:25) Kua ni maduataka nomu vakayagataka na Vosa ni Kalou ena nomu cakacaka vakaitalatala. (2 Tim. 2:15) Na itabagone e tukuni mai cake e masu vei Jiova me vukei koya me rawa ni vakamacala kina vei ira nona itokani e koronivuli. Sa tekivu me vunau tawalokuci sara e koronivuli, vuavuaivinaka nona vunau, sega ni bera nona vosa vei ira kece ga e kila. E tinia: “O ira na itabagone oya era gadreva ra vinakata tale ga na inuinui e se bera mai, e vakayagataki keda gona o Jiova meda vukei ira.”
5 O Ira Eda Tiko Veitikivi: Era na tiko beka e so eda tiko veitikivi se o ira eda veikilai era sega ni taleitaki keda baleta noda lotu kei na ka eda vakabauta. Ke o rerevaka na ka era tukuna, tarogi iko mada: ‘Era kila beka na ka dina e basika ina bula tawamudu? Na cava meu cakava mera na vakarorogo kina?’ E kaya e dua na ivakatawa ni tabacakacaka ni rawa ni vakayacoka na noda vunau vei ira eda tiko veitikivi ke lekaleka ga qai vakawasoma na noda vakamacala vei ira. Masuti Jiova me solia vei iko na kaukaua kei na vuku mo vakasaqarai ira tiko ga kina na lomadina.—Fpai. 4:13.
6 Era na marau na dauveitusaqati nida soro vei ira, ia ena vinaka beka vei ira oya—se vei keda? Era tusaqati Jisu o ira sara mada ga era koro vata. E vosota tale ga na gaga ni nodratou vosa na tacina vakacabecabe. Ia e kila ni rawa wale ga ni vukei iratou ke yalodina tiko ga ena cakacaka e talai koya mai kina na Kalou me mai cakava. O koya gona, e vosota o Jisu “ni sa vosavakacacataki koya vakalevu ko ira na tamata ca.” (Iper. 12:2, 3) Meda cakava tale ga o keda. Tu vakarau mo vakayagataka vakalevu na nomu gauna mo vunautaka kina na itukutuku ni Matanitu ni Kalou. Ni o cakava oqo, “ko na vakabulai iko, kei ira talega era sa rogoci iko.”—1 Tim. 4:16.