Ra Taroga na iTabagone . . .

Vidio ni iVakatagi​—Rawa Vakacava Meu Digia Vakayalomatua?

“Keu sega ni kila vinaka e dua na mataqiriqiri se sere e vakaraitaki mai, au dau veisautaka na porokaramu ni vidio.”​—Casey.

VIDIO NI IVAKATAGI​—era raica e vuqa na itabagone ni oqo e dua na ka ni veivakalasai vinaka. Me vaka ga e vakaraitaka na ulutaga ena tabana e 15, e vuqa na vidio ni ivakatagi era vakaraitaka na ka ni veiyacovi dukadukali kei na itovo kaukaua.a Ke vakaraitaki gona ena ka ni veivakalasai na veika e vakatabuya na Kalou, e sega ni dodonu vua na lotu Vakarisito me sarava. Ia e sega nira ca kece na vidio ni ivakatagi. De so ena vinaka. E so tale era sega sara beka ni ca. Ia, na vidio vaka oya era na rairai vakaraitaka na veika e veisaqasaqa kei na Vosa ni Kalou.

Ke rau vakadonuya na nomu itubutubu mo sarava na vidio ni ivakatagi, e dodonu mo digia vakayalomatua qai vakayagataka na ‘lomamu e vakavulici’ ena iVolatabu mo vakalewa kina na ka e vinaka se ca. (Iperiu 5:14, VV) Na ivakavuvuli vakaivolatabu cava ena vukei iko e ke? Oqo e so na tikinivolatabu kei na kena ivakamacala e rawa ni vukei iko.

Vosa Vakaibalebale 4:23: “Vakatawa [taqomaka] vakavinaka sara na yalomu; ni sa taka maikina nai vurevure ni bula.” E tiko beka e so na nomu iyaya talei me vaka na iyaya ni qito, se na iyaya ni ivakatagi? O na saga sara ga me maroroi vinaka me vinaka tu ga kina na kedra ituvaki. O na sega ni biuta tu e gaunisala me sega ni dua e vakaraica, se mo biuta tu mada ga vakalekaleka, de qai dua e vakacacana se butakoca. Io, o na taqomaka. Me vaka tale ga oya na nomu vakatulewa mo taqomaka kina na lomamu, mo kua ni galeleta mada ga na veika rerevaki me vaka na ka ni veivakalasai ca.

Efeso 2:1, 2: “A sa vakabulai kemudou [na Kalou], oi kemudou ka mate tu e na caka cala kei nai valavala ca; dou a muria tiko eliu me vaka nai valavala kei vuravura oqo, ni dou a muria tiko na nodra turaga era sa kaukauwa e na macawa, a yalo sa cakacaka tiko e lomadra era sa dautalaidredre.” Na “macawa” oya na yalo ni vuravura oqo, na vakasama kei na ivakarau e uqeta na ivalavala tawavakalou. Na yalo oqo e laurai ena vuqa na vidio ni ivakatagi qai veibasai sara ga kei na yalo ni Kalou, o koya e vakatubura na itovo me vaka na reki, vakacegu, kei na ivalavala malua.​—Kalatia 5:22, 23.

2 Timoci 2:22: “Dro tani mai na gagadre ca vakacauravou.” Na saravi ni iyaloyalo ni veiyacovi​—kevaka mada ga e lekaleka​—ena vakacaudreva na gagano. Era vakadinata e vuqa na itabagone ni dredre nira guilecava na iyaloyalo vaka oya; e rawa nira vakasamataka vakalevu. E vakadinata e dua na gonetagane o Dave, na nona a sarava e dua na iyaloyalo ni ivakatagi e vakasisila: “Ena gauna au dau rogoca kina na sere oya, au dau vakasamataka lesu na ka au sarava.” Na saravi ni iyaloyalo vaka oya e rawa ni vakavurea na gagadre ni veiyacovi vakasisila.​—1 Korinica 6:18; Kolosa 3:5.

Vosa Vakaibalebale 13:20: “Ko koya era veitokani vata kei na lialia ena rusa.” Tarogi iko mada, ‘Au na sureti ira beka mai vale na dau vakayacora na itovo voravora, itovo vakasisila, vakatevoro, kei ira na daumateni?’ Na nomu saravi ira tiko ena retioyaloyalo e tautauvata sara ga kei na nomu sureti ira ina nomu vale. E ‘veivakarusai’ beka ke o cakava oya? E dikeva o Kimberly: “Au dau raica e so na goneyalewa ena gauna ni soqo nodra vakadamurimuria na isulusulu se na danisi veivagarogaroi era se qai sarava ga mai ena vidio.” O sa na rairai raica na ka vata ga oya. Nodra vakadamurimuri o ira na sega ni kauaitaka na ivakatagedegede ni Kalou, era sa vakaraitaka sara tu ga kina na itabagone oqo nira sa tekivu “rusa” tiko yani vakamalua. O koya gona mo kakua ni ‘vakailala kei ira era sa ca.’​—1 Korinica 15:33.

Same 11:5: “Sa vakatovolea na tamata yalododonu ko Jiova: ia na tamata lomaca kei koya sa vinakata nai valavala kaukauwa, sa cati koya na yalona.” Kevaka eda sarava na iyaloyalo ni vakacaca, itovo kaukaua qai lolovira, sega li ni vakaraitaka oya nida ‘tokona na ivalavala kaukaua’?

Ka ni Bolebole na Digidigi Vakayalomatua

Ni “sa koto ga vua na vu-ni-ca ko ira kecega na kai vuravura,” oya na vuna sa qai dredre ga kina na kunea na ka ni veivakamarautaki e sega kina na vakasama kei na ivalavala ni vuravura. (1 Joni 5:19) E so na porokaramu ni vidio ni ivakatagi era vakaraitaki ga kina na veika e sega ni vinaka. Kevaka mada ga e sega soti sara ni vakasisila se voravora na porokaramu e saravi, e se vakalevulevuya tiko ga na yalo ni vuravura ena vuqa na gauna. E dikeva e dua na daunivakatagi me baleta e dua na porokaramu ni vidio ni ivakatagi kilai levu, “e sa veisau na porokaramu ni ivakatagi me porokaramu e uqeti kina ‘e dua na ivakarau ni bula.’”

Kena irairai ni rawarawa na kena iwali: Kevaka e ca na iyaloyalo, veisautaka na porokaramu. Na ka ga e leqa oya ni dodonu mo qarauna na nomu sarava na veiporokaramu tale e so ni retioyaloyalo. E levu na porokaramu e vakamatailalaitaka sara ga na ivalavala kaukaua se itovo vakasisila se vakaraitaki ira na tamata nira vakayacora na ivalavala tawasavasava. Ia, e votivoti se vuturitaki na kena via marautaki na sarava na vidio, ni gauna vata oya e vuki veisautaki tiko ga na porokaramu. Ena so na gauna ni qai veisautaki na porokaramu sa yaco oti na leqa. Sa kabi ena vakasama na iyaloyalo vakasisila. Ia, o rawa ni vakadeitaka ni na vakalougatataka na Kalou o Jiova na sasaga o cakava mo taqomaka kina na lomamu.​—2 Samuela 22:21.

E tiko tale e so na ivukevuke e rawa ni yaga. E kaya o Casey, o koya a cavuti taumada, na ka e yaga vua: “E dau tabaki mai liu ena vidio na yaca ni mataqiriqiri kei na sere. Sa dui tu ga na ka era kilai kina na dui mataqiriqiri, o sa na kila ga na mataqiriqiri se sere e ca. Ni qai tabaki ga mai na kena au kila ni ca, au dau veisautaka sara na porokaramu, ena gauna ga e tabaki mai kina.”

‘Tukuna na Ka Dina ena Lomamu’

Kevaka mada ga o kila vinaka tu na ivakavuvuli vakaivolatabu, e se rawa tiko ga ni o vakalaiva me yaco na ka e ca. Ena sala cava? Ena nomu vakadonui iko ga ena so na iulubale. (Jemesa 1:22) E kaya vei keda na iVolatabu ni itokani i Jiova o koya e “vosa dina tiko mai vu ni yalona.” (Same 15:2) Mo dina vakataki iko. Kakua ni vakaisini iko. Kevaka o raica ni donu vei iko nomu sarava tiko na porokaramu e sega ni vinaka, tarogi iko mada, ‘Ena vakadonuya beka o Jiova na ka au sarava tiko oqo?’ Nanuma tiko ni sega wale ga ni ka ni bolebole na kilai ni ka vinaka kei na ka ca, ia na nomu vakatulewataka mo cakava na ka e dodonu! Mo raica na nomu veiwekani kei Jiova ni talei cake sara mai na ka ni veivakalasai cava ga.​—2 Korinica 6:17, 18.

E sega ni rauta me tukuni tu ga vakararaba meda digidigi vakayalomatua. E rawa ni seavu yani na ka o nakita ke o sega ni dei. E tukuna vei keda na iVolatabu na nona nakita na tamata ni Kalou o Jope me yalodina tiko ga vei watina. E kaya: “Au sa ia oti na veiyalayalati kei na mataqu; me’u qai via nanuma vakacava e dua na goneyalewa?” (Jope 31:1) Vakasamataka mada oya! A cakava o Jope e dua na veiyalayalati, se na ka e vakadeitaka vakaikoya, oya me yalana na ka e raica na matana. E rawa tale ga ni o cakava vaka kina. Me dei na nomu inakinaki​—mo yalataka mo kua ni raica na ka e ca. Tuvanaka na ka mo yalana. Masulaka. Mo qai dina ina nomu veiyalayalati, rawa ni o vola ke o nanuma ni na vukei iko. Kevaka o gadreva e so na veivuke, vakacava mo drau veitalanoa kei na dua o nuitaka e sa qase—kena ivakaraitaki o rau na nomu itubutubu?

Nodra kila e so na itabagone lotu Vakarisito na kena leqa, era vakadeitaka mera kua tale ni qai sarava na vidio ni ivakatagi. Vakayagataka na lomamu e vakavulici ni o vakatulewa. Me savasava tiko ga na nomu lewaeloma. Kevaka o dei tiko ga ena ka ni veivakalasai e vinaka qai veivakabulabulataki, o na sega ni vakaleqai, ena dei tale ga na nomudrau veiwekani kei Jiova.

[iVakamacala e ra]

[iYaloyalo ena tabana e 20]

E so na vidio era sega soti sara ni ca era se cuqena tiko ga na vakasama e veivakacaraki

[iYaloyalo ena tabana e 21]

Nakita ni o na sega ni sarava na veika e sega ni vakadonuya na Kalou