Veisautaka Noqu Bula na Noqu a Coqa

TALANOATAKA O STANLEY OMBEVA

Ena 1982, a coqai au e dua na motoka. Au a qaravi vakavuniwai qai sega ni dede au sa tekivu cakava rawa tale na noqu cakacaka e veisiga, ia e se mosi tiko ga na dakuqu ena so na gauna baleta ni veisivi tu na noqu suitu. Ia, ni oti tale e 15 na yabaki, au a sotava e dua na ituvaki dredre duadua ena noqu bula qai vakatovolei tale ga kina noqu vakabauta.

NI BERA, vaka kina ni oti vakalailai na noqu coqa, au a bulabula vinaka tu. Au dau marautaka na vakaukauayago, oya na noqu ciciva e 10 ina 13 na kilomita ena veimuanimacawa, qito squash, kei na noqu cakava e so na cakacaka kaukaua. Au dau veivuke tale ga ena tara ni Kingdom Hall ni iVakadinadina i Jiova, kei na dua na Assembly Hall levu e Nairobi, Kenya, na vanua keitou vakaitikotiko kina.

Ena 1997, sa tekivu wasoma na mosi kaukaua ni mabuqu. E laurai ena vakadidike vakavuniwai ni sa veisivi tu na noqu suitu. A vakavuna oqo na noqu coqa me vaka au a vakamacalataka taumada.

Ni bera niu tautauvimate, au a cakacaka tu vakadauvolivolitaki. Na cakacaka oqo e vakarautaki kina na inisua e vauca na neitou qaravi vakavuniwai vakavuvale. E kena irairai niu a rawa ni rawati au vinaka ena vuravura ni bisinisi. Ia, ena loma ni 1998, au vakila ni sa tekivu nunu vakaca mai na mabuqu me yaco i yavaqu. Toso na gauna, au sa tautauvimate.

Sega ni dede, au sa vakacegui mai na noqu cakacaka sa mai muduki tale ga kina na neitou inisua. Ena gauna oya e se yabaki 13 kina o Sylvia na noqu ulumatua, qai se yabaki 10 o Wilhelmina na tacina. Niu sega ni cakacaka, keitou sa vakararavi sara tu ga ina kena isau e veivula o Joyce na watiqu. Ni keitou sotava na ituvaki vou oqo, keitou a veisautaka kina na neitou ivakarau ni bula, oya na neitou dau sega ni vakayagataka na ilavo ina veika e sega soti ni gadrevi. E rawa gona kina me keitou bula tiko.

Yalolailai

Au rawa ni kaya ni gauna au ciqoma kina na ituvaki au mai sotava tu oqo, au yalolailai, dau nanumi au ga, qai cudrucudru. So na gauna, au dau cudruvaka seu cata na veika lalai kece ga e tukuni. E vovoleka ni tauvi au na lomabibi. Eratou vakila kece na noqu lewenivuvale na noqu lomaocaoca. E mai sotava tu oqo o watiqu kei rau na luvei keirau yalewa e dua na ituvaki e vou vei iratou.

Ena gauna oya, au nanuma ni sa dodonu ga meu yalocataka vaka oya na veika au sotava. Au sa qai levu ga mai, e sega ni lako vinaka na noqu valelailai au qai sega tale ga ni tarova rawa na noqu suasua. Levu na gauna, au dau maduataka. Vakavuqa, e dau noqu ivalavala meu na toka duadua ga ena dua na tutu ni vale qai tagi toka. Ena so na gauna na levu ni noqu cudru e sa lai rairai lasa tale kina na mataqu. Au kila niu se sega tiko ga ni ciqoma na kequ ituvaki.

Niu dua na qase ni ivavakoso vakarisito ni iVakadinadina i Jiova, au dau vakasalataki ira vakalevu na noqu itokani lotu Vakarisito mera kua vakadua ni beitaki Jiova ina leqa era dau sotava. Ia, au sa mai lomatarotarotaka voli vakawasoma se ‘Cava e vakalaiva kina o Jiova me yacovi au na ituvaki oqo?’ Au dau vakayagataka na tikinivolatabu me vakataka na 1 Korinica 10:13 meu veivakayaloqaqataki qai veivakauqeti kina vei ira na tani, ia au vakila niu sa sega ni tutaka rawa na ituvaki au sa mai sotava tu oqo!

Dredre na Noqu Qaravi Vakavuniwai

A dredre dina na kunea na veiqaravi vakavuniwai vinaka. Ena loma ni dua ga na siga au na lai raica na vuniwai ni vakaukauayago, na chiropractor, kei na acupuncturist. Ke oti na mosi, sega ni dede au na vakila tale. Au mani lai raica kina e vica tale na vuniwai, wili kina e dua na vuniwai ni sui kei na dua na vuniwai ni mona. E duavata ga na ka era tukuna: Ni na dodonu meu sele me rawa ni malumu kina na mosi, me na kau laivi tale ga na sui e veisivi tiko. Ena vuku ni noqu vakabauta yavutaki vakaivolatabu, au vakamatatataka kina vei iratou na kenadau ena veiqaravi vakavuniwai niu na sega ni taura na dra se mani vakacava na ca ni kequ ituvaki.​—Cakacaka 15:28, 29.

A vakadonuya na imatai ni dauniveisele me seleti au ena nona na tava na dakuqu. A vakamacalataka ni ririkotaki toka na veisele vaka oqo. Ia, a sega ga ni vakadeitaka rawa na dauniveisele oqo ni na sega ni vakayagataka na dra. Au mani sega tale kina ni lesu vua.

Na ikarua ni dauniveisele a kaya ni na rawa wale ga ni yacova na noqu suitu ena nona na tava na domoqu. E rikou sara ga na yagoqu niu rogoca na kena icakacaka. Dina ni a vakadonuya na noqu kerea me kua ni vakayagataki na dra ena gauna ni veisele, ia a vakamacala ga vakacaca qai vinakata o koya me seleti au ena gauna vata oya. Au mani sega tale ga kina ni lesu vua.

Ia, ena nodratou veivuke na iVakadinadina i Jiova eratou lewe ni Komiti Veitaratara kei na Valenibula ena vanua keitou vakaitikotiko kina, au a kunea rawa gona e dua na vuniwai a bole me seleti au. Na veisele e vakatura na ikatolu ni dauniveisele oqo e tautauvata kei na kena a vakatututaka na ikarua ni dauniveisele, ni na dodonu me na tavai na domoqu. E kaya ni lailai wale sara na leqa e rawa ni sotavi kina.

E rikou na yagoqu ni vakamacalataki vakamatailalai vei au na icakacaka ni veisele oqo. Na ka ga au a rerevaka vakalevu ni veisele oqo ena tara voleka yani e rua na gacagaca malumalumu, na utoqu kei na yatequ. Au na bulata rawa beka? Na vakasama veivakayalolailaitaki oqo e sa qai kuria ga na noqu rere.

Ena 25 Noveba, 1998, a lako vinaka na va na aua ni noqu sele ena dua na valenibula mai Nairobi. Na veisele oqo a kau tani tale ga kina mai vurequ e dua na sui lailai. A varoti vakavinaka na sui lailai oqo qai codori vata kei na tiki ni kaukamea ina vanua e mavoa tu, kei na kena ivaqaco me tauri rau vata. A bau veivuke toka oqo, ia a sega ga ni vakaotia kece na noqu leqa. Niu taubale sa dua na ka na kena mosi. E se dau nunu tiko ga na yagoqu.

Au Saga me Donu na Noqu Rai

Me vaka sa cavuti oti, levu na gauna au dau leqataka se vakasamataka tiko ga na kequ ituvaki vakaloloma. Ia, e lasa ni levu na vakailesilesi ena tabana vakavuniwai era vakavinavinakataka na noqu dau tauri au vinaka kei na noqu rai donu. Cava e vaka kina oya na nodra rai? Era raica ni dina niu dau vakila vakalevu na mosi, ia au se wasea ga vei ira na noqu vakabauta me baleta na Kalou.

Dina niu dau rarawataka qai cudruvaka ena so na gauna na veika au sotava tiko, ia au vakararavi ga vei Jiova. E dau tokoni au o koya ena veituvaki dredre kece ga au dau sotava. Na levu ni nona dauveitokoni, au lai maduataki au tale kina ena so na gauna. Au mani saga vakaukaua kina meu dau wilika qai vakananuma vakatitobu na veitikinivolatabu au kila ena vakacegui au mai na kequ ituvaki. Oqo gona e so vei ira:

Vakatakila 21:4: “Na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu.” E veivakacegui dina na noqu vakasamataka na vosa ni yalayala ena iVolatabu me baleta na vuravura vou ena sega tale kina na tagi kei na vutugu.

Iperiu 6:10: “Sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana.” Dina ni sega ni levu na ka au rawa ni cakava, ia au kila ni mareqeta o Jiova na noqu sasaga ni cakava na nona cakacaka.

Jemesa 1:13: “Ni sa dauveretaki e dua, me kakua ni kaya, Sa dauveretaki au na Kalou: ni sa sega ni dauveretaki rawa na Kalou ki na ka ca, a sa sega ni dauveretaka e dua na tamata ko koya.” E dina! A vakatara o Jiova meu sotava na ituvaki rarawataki oqo, ia a sega ga ni vakavuna.

Filipai 4:6, 7: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.” E vukei au na masu me rawa ni vakaceguya na noqu vakasama, e vukei au tale ga meu vakalewa kina vakayalomatua na kequ ituvaki.

Au dau vakayagataka na veitikinivolatabu oqori meu vakayaloqaqataki ira kina na rarawa, era qai dau yaga dina! Ia, au raica rawa ni gauna oya au se sega ni kila vinaka sara na kedra talei. Au mai tauvimate levu sara tu vaka oqo meu qai mai vulica na yalomalumalumu kei na noqu nuitaki Jiova vakatabakidua.

E So Tale na iVurevure ni Noqu Vakacegui

Levu era tukuna nira duru ra qai dau veivakacegui na mataveitacini lotu Vakarisito ni sotavi na bula dredre. Ia, e rawarawa sara nida raici ira vakamamada na tacida tagane kei na tacida yalewa lotu Vakarisito! Dina ni na vakaiyalayala beka ga na ka e rawa nira veivuke kina, ia era dau tu vakarau mera vukei keda. Au vakadinadinataka oqo ena noqu ituvaki. Sa dau matau ga meu na raica e dua vei ira na mataveitacini ena yasa ni noqu imocemoce e valenibula, so na gauna ena matakacaca. Era bole sara mada ga mera sauma na bili ni noqu qaravi vakavuniwai. Au vakavinavinaka vakalevu vei ira kece sara a tarai ira na kequ ituvaki mera mai veivuke.

Ena ivavakoso au lewena, era kila na iVakadinadina ni sa vakaiyalayala ga na ka au rawa ni cakava ena gauna oqo. Au ivakatawa daulewa tiko ena gauna oqo qai cakacaka vata kei na dua na ilawalawa qase ni ivavakoso lotu Vakarisito dauveitokoni. Au sega vakadua ni yaco meu dua na dautukutuku vakavudua. Na gauna mada ga au tauvimate bibi sara tu ga kina, au se rawa ga ni vukea e rua me rau yalataka nodrau bula vei Jiova. E dua vei rau sa dauveiqaravi vakaitalatala tiko ena dua na ivavakoso ni iVakadinadina i Jiova e Nairobi.

Au sega ni tukuna rawa na levu ni noqu vakavinavinakataki watiqu, ena nona dau tokoni au ena gauna au tauvimate tu kina. E dau vosota na noqu cudru, na veiveisau ni draki ni noqu bula, noqu yalodredre, kei na noqu rarawa. Niu tagi seu vutugu, e dau vukei au o koya me dei na yaloqu qai dau veivakacegui. Au drukataka na nona kaukaua kei na nona yaloqaqa ni sotava na ituvaki dredre oqo. E vakadinadinataka o koya ni dua ‘na itokani dina ena veigauna kece.’​—Vosa Vakaibalebale 17:17, NW.

Erau vulica tale ga na luvei keirau yalewa me rau ciqoma na kequ ituvaki. Erau na cakava na ka erau rawa ni vukei au kina. Erau kila na veika au dau gadreva qai totolo na sala erau na vukei au kina, ena nodrau vinakata me kua ni dua na ka au leqataka ni yali tiko o tinadrau. O Sylvia e noqu “ititoko,” niu via malumalumu ena dau tuberi au ena noqu veilakoyaki voli e vale.

Vakacava o koya e gone o Mina? Au nanuma sara na gauna au a lutu kina e vale au qai sega ni tucake rawa. Keirau a tiko taurua ga e vale. A laveti au cake qai tuberi au yani vakamalua ina noqu rumunimoce ena nona igu taucoko. Me yaco mai nikua e sega ni kila o Mina se a cakava rawa vakacava oya. Au guilecava dredre na yaloqaqa a vakaraitaka o koya ena siga oya.

E dua dina na ka dredre au se qai bau sotava ena noqu bula oya na noqu vosota voli na noqu tauvimate. Ia, e se gadrevi tiko ga vei au meu vosota. Sega ni dua na ka e se bau vakatovolea na noqu bula kei na noqu vakabauta ena ivakatagedegede me vaka na kena oqo. Au sa mai vulica vinaka kina na yalomalumalumu, yalorawarawa, kei na veinanumi. Noqu vakararavi vei Jiova kei na noqu nuitaki koya e vukei au meu vosota kina na noqu tauvimate.

Au mai vakadinadinataka kina na dina ni nona vosa na yapositolo o Paula: “Sa waqa qele sa tu kina vei keitou nai yau oqo, me sa taka mai vua na Kalou na kaukauwa mana levu, ka me segai maivei keitou.” (2 Korinica 4:7) E vakacegui au vakalevu sara ga na vosa ni yalayala ni Kalou me baleta na kena na yaco mai na “lomalagi vou kei na vuravura vou.” (2 Pita 3:13) Au masu vei Jiova me vakaukauataki au tiko mada ga niu waraka voli na vuravura vou, niu se malumalumu vakayago qai lailai ga na ka au rawa ni cakava ena noqu kaukaua.

[iYaloyalo ena tabana e 30]

Noqu vakaitavi ena cakacaka vakarisito kei iratou na noqu lewenivuvale e vukei au meu vosota