Ena Vueti na Noda Vuravura!

E MATATA mai na rua na ulutaga sa oti, ni na sega ni vinaka vua na tamata me tomana tiko ga na sala e vakayagataka kina ena gauna oqo na iyaubula ni noda vuravura. Era vakacaucautaki dina na iliuliu kei vuravura ena nodra sasaga me vakalailaitaki na vagagai ni cagi, na vakacacani ni noda veikauloa, kei na ituvaki e so e vakaleqa na veika bula ena noda vuravura. Me tekivu mai na bose ni UN Conference on Human Environment ena 1972, kei na vica tale na bose a vakayacori veilutui, era sa vakaitavi e 163 na matanitu ena nodra tokona ni dodonu me vakavatukanataki na lalawa sa vakaturi. Ia, na cava sa yaco? “Dina ni a kotori e levu na veidinadinati, lalawa ni veika me caka, kei na ivola era volai, ia se sega ga ni vakavinakataka na noda vakacacana tiko na noda vuravura,” e kaya o David Hunter, na dairekita ni Center for International Environmental Law. E tomana, “mai na ka e laurai nikua, e voleka ni dusidusi kece e vakamacalataka na ituvaki ni noda vuravura e vakaraitaka ni sa qai torosobu ga na ituvaki ni noda vuravura me vakatauvatani kei na gauna a yaco kina na bose levu ni Matabose kei Vuravura ena 1992.”

Sa oti oqo e 30 na yabaki na kena sagai tiko me wali na leqa oqo, ia na cava e se lailai sara kina na veisau? Dua na vuna oya na kena dau sagai me vinaka na bula vakailavo ni dua na matanitu. Ena vakatau tiko oqori ina nodra volivoli na lewenivanua. Ena vinakati kina vei ira na daunibisini mera bulia e levu na iyaya. Ia me rawa oqori, e gadrevi na iyaubula. Ni vaka oya na itosotoso ni bula vakailavo, e macala ni kena ca ena vakilai ena noda vuravura. Na cava gona na kena iwali?

Lewa Cala

Na iVolatabu e vakamacalataka na vuna e dreve kina na nona sasaga na tamata me lewa vakavinaka na nona bula. A kaya na parofita o Jeremaia: “Kemuni Jiova, au sa kila, ni sa sega ni vu mai vua na tamata na nona sala: sa sega ni vu mai vua na tamata sa lako tu me lewa na nonai lakolako.” (Jeremaia 10:23) E dina vakaoti na veivosa oqori!

O sa bau sikova li e dua na lomanibai se raranigade? Dua na ka na nomu na qoroya na rairai totoka ni kau, na kau sala, kei na senikau! Ia, e sega ni tu tu ga sa basika e dua na lomanibai tuvai maqosa. Ena gadrevi kina e dua na kenadau, kei na nona na vakayagataka tale ga e vica vata na aua me musuka vakamaqosa kina na veivunikau, ena kotiva na co, kei na nona na samaka na veiloganisenikau mera rairai totoka. Sa na wacava mada na irairai ni noda vuravura ke qaravi vinaka me vaka na kena qaravi e dua na lomanibai!

E nona inaki sara ga na noda Dauveibuli me na qaravi vaka oqori na noda vuravura. E tukuna na ivolatukutuku ni ibulibuli ena iVolatabu, “a sa kauta na tamata na Kalou ko Jiova, ka vakatikora ki na were ko Iteni me wereca ka vakatawa.” (Vakatekivu 2:15) Kuria oya, a sega wale ga ni lesi na tamata me qarava na were o Iteni, ia me vakatetea tale ga na Parataisi taumada me robota na vuravura taucoko.​—Vakatekivu 1:28.

E ka ni rarawa, ni rau a vakayalia na itavi dokai oqori o Atama kei Ivi ena vuku ni nodrau talaidredre. (Vakatekivu 3:1-6, 23) Me vaka nida nodrau kawa, e sa dewavi keda kina na nodrau ivalavala ca kei na bula e sega ni uasivi. (Roma 5:12) E dua gona na ivakaraitaki ni noda sega ni rawa ni liutaka ga na noda bula, oya na noda sa vakayagataka tu vakatani na iyaubula ni noda vuravura. Macala gona ni sa sega ni walia rawa na kawatamata na nona leqa. Ena gadrevi na nona veivuke e dua e cecere cake.

Na Sala ni Bula

Ena nona bula voli e vuravura o Jisu, a vakavulici ira na nona tisaipeli mera masuta: “Me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.” (Maciu 6:10, VV) Na iVolatabu e vakavuvulitaka ni na yaco na vuravura me parataisi ena ruku ni veiliutaki ni Matanitu ni Kalou. (Same 37:10, 11) Na gauna oqori era na bulabula vinaka ra qai vuavuaivinaka na veimataqali kau kece ga nira sa bula tu ena ituvaki savasava. (Same 72:16) Ena veidusimaki ni Kalou ena sega tale vakadua ni vagagai na noda vuravura, nida na vulica na kawatamata na sala meda bula vata kina kei na veika bula tale e so era tu ena noda vuravura. Eda vakadeitaka vakacava oqori?

Na iVolatabu e kaya ni vakataudeitaki tu na vuravura “me kakua ni yavala rawa ka sega ni mudu.” (Same 104:5) Ena gauna lokuci ni Kalou, era na sotava na veivakalougatataki tawamudu o ira kece era na bula, okati kina na bulabula vinaka vakayago, sautu ena kakana, era na vakavaletaki tale ga vakavinaka. Oni taleitaka mo ni kila e levu tale na ka me baleta na inaki ni Kalou? Tovolea mo drau veitalanoa kei na dua na iVakadinadina i Jiova. Era tu vakarau mera vukei kemuni vakaivolatabu mo ni raica na sala ena rawa ni vueti kina na noda vuravura, kei na kena na yaco dina sara tale ga!

[iYaloyalo ena tabana e 10]

Ena veidusimaki ni Kalou, era na kila na kawatamata na sala mera bula vata kina kei na veika bula tale e so

[Credit Line]

Girl and farmer: © Jeremy Horner/ Panos Pictures