Na Tama Era Gadreva na Gone

ERA gadreva na gone na tama e dauloloma, e dau tu vakarau me tokoni ira, qai solia na nona vinaka kece ena nodra tuberi mera tubu cake mera tamata yaco ra qai nuitaki. Dina nira gadreva na gone na tama vaka oqori, ia e vaka me tauri tu ga vakamamada.

E macala ni na vakasucuma na gone na tina qai bibi dina na nona itavi. Ia me kua ni guilecavi ni bibi tale ga na nona itavi o tama. E kaya na ivola The Wilson Quarterly: “Na nodra sega ni cakava na tama na nodra itavi, e vu levu duadua ni veileqa vakarisekete e kune e Mereke nikua”​—se rawa nida kaya, e veiyasa i vuravura.

Na niusiveva ni Brazil na Jornal da Tarde, a tabaka na ka e kaya e dua na vakadidike, ni levu nodra itovo na gone ca​—me vaka na cudrucudru, vakauyalodra, vakawalena nodra vuli, kei na tawaveikauaitaki​—e dau “vu vakalevu nira sega ni kauai na tama.” Na ivola vakaitali na Gli imperfetti genitori (Ra Sega ni iTubutubu Uasivi), e vola o Marcello Bernardi, e vakabibitaki kina ni o ira na gone era na gadrevi rau ruarua na itubutubu mera tuberi vinaka kina.

E Rawa ni Vakavinakataki Cake na Bula Vakavuvale

Ke dau vakawelewele o tama qai bale vua e so na leqa e sotava na vuvale, se mani beitaki vakatabakidua vua, e sega ni kena ibalebale ni sa na sega ni wali rawa se vakavinakataki cake na bula vakavuvale. Ia, ena wali vakacava? Na cava ena gadrevi me cakava o tama?

E macala, ni na vinaka vei ira na gone mera muria e dua na ituvatuva ni bula vakavuvale, era na vakila kina nira kauaitaki qai lewai tale ga nodra bula. Ke sega ni vakayacori oqori, me vaka eda raica vakalevu tu nikua, ena vakaleqai dina na nodra bula. Ia, ke sega mada ga o tama, e rawa ni wali na leqa oqo. Ni kaya na Same 68:5: “A tamadra na luveniyali . . . na Kalou e na nonai tikotiko tabu.”a

Na Sala ni Veivuke

E matata ni na vakatau na vakavatukana ni sasaga oqo ina nona veivuke na Kalou. Ia, ena rawati oqori, me vaka e vakaraitaka na ituvaki a vakamacalataka o Lidia, na goneyalewa mai Poladi a cavuti ena imatai ni ulutaga. A vakacava tu na nodratou bula veimaliwai vakavuvale? Eratou rawata vakacava na vuvale na veivuke ni Kalou?

O Franciszek, na tama i Lidia, e kaya ni gauna eratou se lalai kina na gone, a sega ni dau kauaitaki iratou na lewe ni nona vuvale, me vaka ga a kaya na luvena yalewa o Lidia. E kaya o Franciszek: “Au sega ni dau kauaitaka na ka eratou cakava na gone. Au sega tale ga ni dau vakaraitaka vei ratou na noqu lomani iratou, e sega kina ni keitou veivolekati.” Oya na vuna e sega ni bau kila kina o Franciszek ni gauna se yabaki 14 kina o Lidia, e sa dau lakova na soqo ni marau vakalialia kei rau na tacina, vaka kina na vakatavako, gunu, qai dau veivala tale ga.

Yaco na gauna, sa qai kila o Franciszek na leqa eratou sa sotava tu na luvena. Na levu ni nona kidroataka, e yavalati koya sara ga me cakava kina e dua na ka. “Au kere veivuke vua na Kalou ena masu,” e kaya. E vakasakiti dina, ni sega ni dede era a veisiko yani i nona vale na iVakadinadina i Jiova, rau mani vakadonuya sara vakaveiwatini me rau vuli iVolatabu. Toso na gauna, rau sa bulataka na itubutubu na veika e rau vulica. E tara vakacava oqo na nodratou bula na gone?

A vakamacalataka o Franciszek: “Ratou sa raica niu sa sega ni dau gunu kei na noqu saga tiko meu dua na tama vinaka. Eratou mani vinakata kina me ratou kilai ira vinaka na iVakadinadina i Jiova. Ratou tekivu vulica tale ga na iVolatabu ratou qai biuta na vakailala ca.” O Rafał, na luvena tagane, e kaya oqo me baleti tamana: “Yaco meu lomani koya me vaka na noqu itokani.” A tomana: “Sa ka wale vei au o ira na noqu ilala, ni keitou sa ogaoga vakavuvale ena veika vakayalo.”

Ena gauna oqo, o Franciszek sa veiqaravi tiko vaqase ena dua vei ira na ivavakoso ni iVakadinadina i Jiova, ia e dau kauaitaki iratou tiko ga na lewe ni nona vuvale kei na nodratou dui toso vakayalo. O watina kei Lidia erau painia se cakacaka vakaitalatala vakatabakidua. O Rafał kei ganena gone, o Sylwia, erau gumatua na vuli iVolatabu, vakamacala ena soqoni vakarisito, vaka kina nodrau wasea nodrau vakabauta vei ira tale e so.

A Bulataka na Veika e Vakatavulica

Dikeva na ka a yaco vei Luis, na tama i Macarena. Oqo na goneyalewa ni Sipeni, e yabaki 21, a cavuti tale ga ena imatai ni ulutaga. A muria vinaka ga o Luis na ivakarau ni bula i tamana, nona daumateni. Me vaka ga e kaya o Macarena, ni o Luis na tamana ena lako tu kei ira na nona itokani me vica na siga. Kuria oya, e dau raici watina me vaka e dua na bobula, sega ni kena isa vakamareqeti. E sa vovoleka sara tu ga ni kavoro na nodrau bula vakawati, na leqa oqo e tara sara vakaca na bula i Macarena kei rau na tacina.

Ia, toso na gauna, sa vakadonuya o Luis me vulica na iVolatabu kei ira na iVakadinadina i Jiova. A vakamacalataka: “Sa qai levu na gauna au dau tiko vata kina kei ratou na noqu veitinani. Keitou dau veitalanoa, kanavata, qai vulica vata tale ga na iVolatabu. Keitou na veitauriligataka na cakacaka ni vale, vaka kina na ka ni veivakamarautaki.” E kaya o Macarena: “Au sa tekivu vakila ni tiko e dua na tama e kauaitaka dina na veika eratou gadreva na nona vuvale.”

E totoka dina, ni o Luis e sega wale ga ni vakauqeta na nona vuvale me qarava na Kalou ia e bulataka sara ga na ka e vakatavulica. A vakamacalataka o Macarena ni a biuta laivi o tamana “e dua na bisinisi e cici vinaka baleta e sa kania vakalevu na nona gauna. E vinakata o koya me levu na gauna me vakayagataka ena veika e vauca na nodratou bula vakavuvale.” E vakasakiti dina na kena cakayaco. “Au vulica mai na nona ivakaraitaki na sala me rawarawa kina na mataqu, meu vakaliuca kina na veika vakayalo,” e kaya o Macarena. Ena gauna oqo e sa veiqaravi voli vakapainia, ia o tinana kei rau na tacina eratou lewe ni ivavakoso gugumatua lotu Vakarisito.

Nona Vakatulewa na iLiuliu ni Kabani ni Sitimanivanua

E macala, nira gadreva na gone na tama e dau nanumi ira tale ga ena gauna e vakatulewa kina. O Takeshi Tamura, e dua na iliuliu ni cakacaka mai Japani a cavuti ena imatai ni ulutaga. A coko ena vakailala ca na luvena gonetagane qai kena irairai ni dua na vanua ca sara e rawa ni lai tini kina. A yaco tiko oqori ena 1986, na yabaki a vakatulewataka kina o Takeshi me cegu mai na nona itutu dokai ena dua na kabani ni sitimanivanua e vakatokai na Japanese National Railways. E raica vakacava nikua o Takeshi na vakatulewa a cakava ena 18 na yabaki sa oti?

“Oqori e dua na vakatulewa vinaka duadua au bau cakava,” a kaya ena gauna wale tiko ga oqo. “Ni levu na gauna au tiko vata kina kei luvequ gonetagane keirau qai cakava vata na ka, wili kina na noqu vakavulica vua na iVolatabu. Au vakila ni cakayaco sara ga. Yaco me keirau veitokani, qai muduka tale ga o luvequ na vakailala ca kei na itovo tawakilikili.”

Ena vica na yabaki yani e liu, a yaco na wati Takeshi me dua na iVakadinadina i Jiova. Na nona ivakaraitaki vinaka gona a uqeta na watina me dikeva na iVolatabu qai kauaitaki iratou vakalevu cake na nona vuvale. Toso na gauna, a yaco o koya, o luvena tagane, kei luvena yalewa me ratou iVakadinadina. Erau veiqaravi tiko vaqase o Takeshi kei luvena tagane ena nodrau dui ivavakoso, rau qai cakacaka vakapainia o watina kei luvena yalewa.

Ra Vinakata na Tama na Veivuke

Era siqema tu e levu na tama nira vakaweleweletaka na luvedra, ia era sega ga ni kila na ka mera cakava. Na niusiveva ni Sipeni na La Vanguardia e tabaka na ulutaga “E 42 na Pasede na iTubutubu [e Sipeni] Era Vakadinata Nira Sega ni Kila na Tubera na Luvedra iTabagone.” Ia e rawa ni tukuni tale ga oqori vei ira na tama e se lalai sara na luvedra, se ra sa volekata toka yani na yabaki ni bula vakaitabagone. Me veibasai ni veika era nanuma e levu, o ira tale ga na lalai oqo era gadreva na tama yalodina e dau tiko me vukei ira qai kauaitaki ira.

Na cava tale e so na sala e rawa ni vulica e dua e vinakata me tama vinaka? O cei soti era ivakaraitaki vinaka vei ira na tama, qai cava eda rawa ni vulica vei ira? Na iotioti ni ulutaga ena sauma na veitaro oqori.

[iVakamacala e ra]

[iYaloyalo ena tabana e 7]

Oqo e so na tama era vakarautaka na veika e gadrevi me baleti ira na luvedra

O Franciszek kei na nona vuvale

O Luis kei na nona vuvale

O Takeshi kei na nona vuvale