Ra Taroga na iTabagone . . .

Veimoceri Vakamataqali Vata​—Cava meu Cakava me Kua Niu Coko Kina?

“Niu se qai yabaki 12, au dau vinakata voli e dua tale na goneyalewa e koronivuli. Au veilecayaki qai lomaleqa de lakolako au na dua e via veimoceri vakayalewa.”​—Ana.a

“Niu se gone au dau sagasaga dredre meu kua ni dau vinakati ira na tagane. Niu vakila mai vu ni lomaqu ni cala na gagadre vaka oya.”​—Onisi.

“Keirau a regu vakadua se vakarua kei na noqu itokani yalewa. Ia e malele tale ga na yaloqu vei ira na gonetagane, au vaqaqa lo de rairai au na dua vei ira e dau moceri ira na tagane kei na yalewa.”​—Sera.

E IVAKARAU ni rai nikua meda dui lewa ga na ka eda cakava, e lai vakavuna kina vei ira e so na itabagone mera vakatovotovotaka na veimoceri vakamataqali vata. “Levu na goneyalewa e noqu koronivuli era moceri ira ga na goneyalewa, e so na goneyalewa era mocera na tagane kei na yalewa. Ia, e so tale era se via vakatovolea tu mada na moceri ira na tagane se yalewa,” e kaya o Beti, yabaki 15. E tautauvata tale ga na ituvaki ena koronivuli i Keresi, yabaki 18, e kaya: “E rua na noqu lewenikalasi erau sureti au meu veiyacovi kei rau. Dua vei rau e vola mai seu vinakata meu raica se na vakaevei na veiyacovi kei na dua na yalewa.”

Ni sa sega ni vunitaki na veimoceri vakamataqali vata ena gauna nikua, de dua o na taroga: ‘E ivalavala ca beka na veimoceri vakamataqali vata? Vakacava keu tagane au qai vinakata e dua tale na tagane, se, au yalewa ia au vinakati ira ga na yalewa? Kena ibalebale beka oya niu sa okati me dua vei ira era veimoceri ga vakamataqali vata?’

Na Cava na Rai ni Kalou me Baleta na Veimoceri Vakamataqali Vata?

Nikua, e levu na lewenivanua​—bau sara mada ga kina e so na italatala ni lotu—​era vakamamadataka na kena dau veivosakitaki na veika e baleta na veimoceri vakamataqali vata. Ia, e sega tale ni wereubiubi na iVolatabu. E kaya vei keda, ni o Jiova a bulia na tagane kei na yalewa qai nakita me vakacegui na gagadre ni veiyacovi vei rau ga na tagane kei na yalewa erau sa vakamau. (Vakatekivu 1:27, 28; 2:24) O koya gona, e sega ni kurabuitaki ni iVolatabu e vakacala na veimoceri vakamataqali vata.​—Roma 1:26, 27.

Io, e levu era na kaya ni sa madra na ivakavuvuli ena iVolatabu. Me kena ivakaraitaki, o Mila, e yabaki 14, e kaya, “E so na ka e tukuni tu ena iVolatabu e sa sega ni yaga ena vuravura nikua.” Ia, na cava e dau totolo kina me vaka oya na nodra rai e so? Vakavuqa, ni veicoqacoqa na rai ni iVolatabu kei na nodra rai. Era cata na Vosa ni Kalou baleta na ka e vakatavulica e duatani mai na ka era vinakata mera vakabauta. E cala na rai vaka oqori, qai uqeti keda na iVolatabu meda valuta na rai qiqo vaka oya! Ia ena nona Vosa, e uqeti keda kina na Kalou o Jiova meda vakasamataka ni nona ivakaro e yaga. (Aisea 48:17, 18) Veiganiti dina na vakasama oqori. Vakauasivi ni sega tale ni dua e kilai keda vinaka me vakataki koya na Dauveibuli.

Ni o se itabagone, o na rairai vakila na veidreyaki ni lomamu. Vakacava ke o tagane qai malele na yalomu ina dua tale na tagane se ina dua na yalewa ke o yalewa? Kena ibalebale beka oqo ni o iko e dua o na tini mo vakasalewalewa se ke o yalewa, o na dau mocera ga na yalewa? Sega. Mo nanuma ni gagadre ni via veiyacovi e kaukaua ni o se donuya tiko “na gauna vakaitabagone.” (1 Korinica 7:36, NW) Ke o tagane, rairai ena loma ni dua na gauna o a vinakata voli e dua tale na tagane, se ke o yalewa o rawa ni a vinakata voli e dua na yalewa. Ia e sega ni kena ibalebale oqori mo sa wili mo dua na dauveimoceri vakamataqali vata. So na itukutuku e tauri e vakaraitaka ni toso na gauna vakaitabagone e dau seavu na mataqali gagadre vaka oya. De dua o na taroga, ‘E mai tekivu vakacava na gagadre oqo?’

So era kaya ni gagadre ni veimoceri vakamataqali vata eda sucukaya mai. E so tale era kaya ni itovo e vulici. Ia, e sega ni inaki ni ulutaga oqo me vakadeuca vakamatailalai se e vei vei rau na nanuma oqori e dina​—eda sucukaya ga mai se da qai mai vulica. Ni kena irairai ni cala ke beitaki e duabulu na ka ni vakavuna na gagadre oqori. Na veimoceri vakamataqali vata​—me vaka e so tale na ivalavala—e dredre me kilai se cava sara mada e vakavuna.

Se mani cava e vakavuna, na ka bibi meda kila ni iVolatabu e vakacala na veimoceri vakatagane se vakayalewa. Ni dua gona e nona leqa na veivinakati ga vakatagane se vakayalewa—ena rawa vua me digia me kua ni vakayacora na gagadre oqori. Me kena ivakaraitaki: E dua e rairai “daucudru” katakata. (Vosa Vakaibalebale 29:22) E liu beka a sega ni dau lewa rawa na nona cudru. Ia, ni sa vulica na iVolatabu e vakila ni vinakati me na bucina na lewa matau. Sega ni kena ibalebale oya ni sa na sega tale ni qai basika mai lomana na cudru. Ia, na nona kila na ka e kaya na iVolatabu me baleta na cudru vakalialia ena sega kina ni laiva me lewai koya na nona cudru. Ena vakatale ga kina e dua na tagane e dau vinakati ira ga na tagane, se na yalewa e dau vinakati ira ga na yalewa ena gauna e mai kila kina na ka e kaya na iVolatabu me baleti ira na veimoceri vakamataqali vata. Io, so na gauna ena se basika ga na gagadre cala. Ia, ena nona muria na ivakaro ena iVolatabu ena sega kina ni laiva me lewai koya na gagadre cala oya.

De dua e sa vakawakana na veivinakati vakatagane se vakayalewa. Ia kua ni yalolailai, ni gagadre cala mada ga e sa vakawakana tu ena rawa ni cavuraki laivi. (1 Korinica 9:27; Efeso 4:22-24) Io, o iko sara ga o lewa na ka mo cakava ena nomu bula. (Maciu 7:13, 14; Roma 12:1, 2) E so beka era na kaya ni cala oqori, ia na kena dina ni rawa ni o vulica mo lewa na nomu gagadre​—se mo tovolea mo kua sara ga ni cakava na gagadre oqori.

Cata na iValavala e Sega ni Dodonu

Na cava meu cakava meu kua ni coko ena veimoceri vakamataqali vata?

◼ iMatai Biuta vei Jiova na nomu lomaocaoca ena masu, mo nuidei ‘ni dau nanumi iko.’ (1 Pita 5:7; Same 55:22) Ena vakataudeitaki iko ena vakacegu “e uasivita na ka kece ga e kilai rawa.” Oqo ena rawa ni taqomaka ‘na yalomu kei na nomu vakasama’ qai solia vei iko “na kaukauwa mana levu” mo kua kina ni vakayacora na gagadre cala. (Filipai 4:7, VV; 2 Korinica 4:7) O Sera a lomaleqa vakalevu de dua o koya ena yaco me mocera ruarua na tagane kei na yalewa, e kaya: “Ni basika ena noqu vakasama na veika ca, au dau masu vei Jiova; dau qai vukei au o koya. Ke sega na nona veivuke ena sega ga ni rawa meu valuta na leqa oqo. E vakabulai au na dau masu!”​—Same 94:18, 19; Efeso 3:20.

◼ iKarua Dau vakasamataka na veika e veitarai cake vakayalo. (Filipai 4:8) Wili iVolatabu e veisiga. Kua ni vakawalena na kaukaua ni vosa ni Kalou ena kena cakayaco ena nomu vakasama kei na lomamu mo vinaka kina. (Iperiu 4:12) E kaya na cauravou o Jesoni: “Na veitikinivolatabu me vaka na 1 Korinica 6:9, 10 kei na Efeso 5:3—e cakayaco vakalevu ena noqu bula. Au dau wilika na veitikinivolatabu oqori ni votu cake mai na gagadre cala.”

◼ iKatolu Kua ni sarava na iyaloyalo ca se itukutuku lasu e vakabulabulataka na veimoceri vakamataqali vata, ni na uqeta ga na vakasama ca.b (Same 119:37; Kolosa 3:5, 6) E so na iyaloyalo yavala kei na porokaramu ena retioyaloyalo ena rawa tale ga ni na vakabulabulataka na vakabauta ni veimoceri vakamataqali vata e dua ga na ivakarau ni bula e duidui. “Na dukadukali ni vakasama ni vuravura e tara tale ga na noqu vakasama qai kuria me sega ni matata kina vei au na veika e baleta na itovo vakasisila,” e kaya o Ana. “Ena gauna oqo au sa vakuai au sara ga mai na veika e vakabulabulataka na veimoceri vakamataqali vata, se mai vua e dua e vakauqeta.”​—Vosa Vakaibalebale 13:20.

◼ iKava Qara e dua mo talaucaka kina na lomamu, qai vakamacalataka vua na nomu nanuma. (Vosa Vakaibalebale 23:26; 31:26; 2 Timoci 1:1, 2; 3:10) E nanuma lesu o Onisi, na nona lai kere veivuke vua e dua na qase ni ivavakoso vakarisito, e kaya: “E yaga sara ga na nona ivakasala. Keu a se lako taudonu ga vua.”

Kua ni Soro!

So era na kaya ni sega na betena mo saga mo veisautaka na kemu ituvaki, mo ciqoma ga na gagadre ni lomamu ena veika e vauca na veiyacovi. Ia, e kaya na iVolatabu ni rawa ni o veisau! Me kena ivakaraitaki, e kaya vei keda na iVolatabu ni so na lotu Vakarisito taumada era a dauveimoceri vakamataqali vata, ia era qai veisau. (1 Korinica 6:9-11) O rawa tale ga ni qaqa—kevaka sara mada ga o se saga tiko ga mo valuta.

Kevaka e se dau basika tiko ga mai na gagadre cala, kua ni soro, se mo nanuma ni o na sega ni rawa ni veisau. (Iperiu 12:12, 13) Keda kece ena so na gauna eda na vala ena kena galeleti na gagadre ni yago ivalavala ca. (Roma 3:23; 7:21-23) Ke o sega ni via vakamalumalumu ina gagadre cala, de dua ni toso na gauna sa na seavu yani. (Kolosa 3:5-8) Kena ilutua, kerea na veivuke i Jiova. E lomani iko qai kila na ka o na marau kina. (Aisea 41:10) Io, “vakararavi vei Jiova, ka caka vinaka . . . ; ena solia vei iko ko koya na ka sa gadreva na yalomu.”​—Same 37:3, 4.

[iVakamacala e ra]

VAKASAMATAKA MADA

◼ Na cava e sega ni vakadonuya kina na Kalou na veimoceri vakamataqali vata?

◼ Na cava o rawa ni cakava ke nomu leqa na veivinakati vakayalewa se veivinakati vakatagane?

◼ O rawa ni talaucaka vei cei na lomamu ke o valuta tiko na gagadre ni veimoceri vakamataqali vata?

[iYaloyalo ena tabana e 30]

Qara na nona veitokoni e dua na lotu Vakarisito uabula qai matua vakayalo