Cava e Kaya na iVolatabu me Baleta na Veimoceri Vakatagane se Vakayalewa?

E sega ni cavuti ena iVolatabu na vakawati vakatagane se vakayalewa. Ia vakacava na veimoceri vakatagane se vakayalewa?

Era nanuma e levu nira kila na isau ni taro qori, ia e veicalati na nodra rai nira sega ni kila vinaka na ka e kaya na iVolatabu! Era kaya eso ni vakamatatataka na iVolatabu ni cala na veimoceri vakatagane se vakayalewa. Eso tale era kaya ni dodonu me lewa ga e dua na sala e veiyacovi kina. Era yavutaka na nodra ile ena ivakaro vakaivolatabu mo “lomana na kainomu.”​—Roma 13:9.

CAVA E KAYA NA IVOLATABU?

Na itukutuku cava e toka e ra qo o nanuma ni donu?

1. E vakacala na iVolatabu na veimoceri vakatagane se vakayalewa.

2. E vakadonuya na iVolatabu na veimoceri vakatagane se vakayalewa.

3. E veiuqeti na iVolatabu mera cati se vakaduiduitaki na veimoceri vakatagane se vakayalewa.

KENA ISAU:

1. DINA. E kaya na iVolatabu: “[E]ra na sega ni rawata na Matanitu ni Kalou . . . o ira na tagane era daumocera na tagane.” (1 Korinica 6:9, 10) E wili tale ga e keri na veimoceri vakayalewa.​—Roma 1:26.

2. LASU. E kaya na iVolatabu ni dodonu me rau veiyacovi ga na tagane kei na yalewa erau veiwatini.​—Vakatekivu 1:27, 28; Vosa Vakaibalebale 5:18, 19.

3. LASU. E vakacala na iVolatabu na veimoceri vakatagane se vakayalewa, ia e sega ni uqeta na nodra vakaduiduitaki, cati se vakalolomataki o ira na cakava na ivalavala qori. ​—Roma 12:18.^[1]

Cava Era Vakabauta na iVakadinadina i Jiova?

Era vakabauta na iVakadinadina i Jiova ni veidusimaki na iVolatabu ena ivakarau ni bula vinaka duadua. Qori na vuna era muria kina na kena ivakatagedegede savasava. (Aisea 48:17)^[2] Kena ibalebale era cata na iVakadinadina i Jiova na ivalavala kece ni veiyacovi tawakilikili, wili kina na veimoceri vakatagane se vakayalewa. (1 Korinica 6:18)^[3] E sega ni dodonu mera vakalewai na iVakadinadina i Jiova ena ivakarau ni bula era digia mera muria.

Era dau saga na iVakadinadina i Jiova mera “veiyaloni kei ira na tamata kece.” (Iperiu 12:14) Era cata na veimoceri vakatagane se vakayalewa. Ia era sega ni togoraka nodra rai vei ira eso tale, era sega tale ga ni vakaitavi se veitokoni ena nodra dau vakalolomataki o ira na veimoceri vakatagane se vakayalewa. Era muria ga na iVakadinadina i Jiova na iVunau Koula, oya mera cakava vei ira eso tale na veika era vinakata me caka tale ga vei ira.​—Maciu 7:12.

Cava na Rai ni iVolatabu me Baleta na Veivakaduiduitaki?

Era kaya eso ni uqeta na iVolatabu mera vakaduiduitaki na veimoceri vakatagane se vakayalewa ra qai sega ni loloma o ira na muria na kena ivakatagedegede. Era kaya e levu ni ‘qiqo na nodra rai o ira na bula donuya na gauna e volai kina na iVolatabu. Nikua, e dodonu mera sa lomani na duikaikai, me vakatau tale ga vua e dua na ivalavala e via veiyacovi kina.’ Era nanuma o ira na va qori na nodra rai ni nodra cati na veimoceri vakatagane se vakayalewa, e tautauvata ga kei na nodra cati o ira e duatani na roka ni kuli ni yagodra. Na cava e veicalati kina na vakasama qori?

Baleta e duidui na nomu cata na tamata kei na nomu cata na nona ivalavala. E kaya na iVolatabu mera rokova na tamata kece na lotu vaKarisito. (1 Pita 2:17)^[4] Ia sega ni kena ibalebale qori mera vakadonuya na lotu vaKarisito na ivalavala kece e vakayacori.

Vakasamataka mada na kena ivakatautauvata qo: O vakabauta ni veivakaleqai na tavako, e vakasisila tale ga. Ia e dau vakatavako e dua na nomu itokani vakacakacaka. Vakacava ena nanumi ni qiqo nomu rai baleta wale ga ni duidui? Ena nanumi beka ni o veivakaduiduitaki baleta ni o sega ni vakatavako me vakataki nomu itokani? Ena sega ni ka vakayalololoma ke veivakasaurarataki o nomu itokani mo veisautaka nomu rai me baleta na vakatavako. Ena vakaraitaka tale ga qori ni qiqo nona rai.

E nodra vakatulewa sara ga na iVakadinadina i Jiova mera muria na ivakatagedegede savasava ena iVolatabu. Era cata na ivalavala e vakatabui ena iVolatabu. Ia era sega ni vakalialiai ira se vakalolomataki ira e duidui na ivakarau ni bula era digia.

Rai Donu me Baleta na iVolatabu

E tiko beka eso era sucukaya mai na gagadre ni veimoceri vakatagane se vakayalewa? Vakacava ke tukuni ni cala na sala era vakaceguya kina o ira qori na nodra gagadre?

E sega ni tukuna na iVolatabu ke ra sucukaya mai eso na gagadre ni veimoceri vakatagane se vakayalewa. E kaya ga ni so na itovo sa vakawakana tu. E veidusimaki tale ga na iVolatabu ena so na itovo meda cata ke da via vakamarautaka na Kalou. Dua vei ira na itovo qori na veimoceri vakatagane se vakayalewa.​—2 Korinica 10:4, 5.

Era na rairai kaya eso ni sa kaukaua tale na vakatatabu ena iVolatabu. E va qori na nodra rai nira nanuma e dodonu meda vakaceguya na noda gagadre, vakabibi na gagadre ni veiyacovi. Era nanuma ni sega ni dua tale na ka e rawa ni caka ena gagadre qori, me vakacegui ga. Ia e kaya na iVolatabu nida rawa ni lewai keda vinaka ena veika e vauca noda gagadre. Eda duidui vei ira na manumanu nida rawa ni digia meda vakaceguya na noda gagadre se sega.​—Kolosa 3:5.^[5]

Dua mada na kena ivakatautauvata: Era kaya eso na kenadau ni so na ka e yaco ena yagona e dua e rawa ni vakavuna nona voravora. E sega ni vakamatatataka qori na iVolatabu, e kaya ga ni so era “dau cudru” se “dau cudru katakata.” (Vosa Vakaibalebale 22:24; 29:22) E kaya tale ga na iVolatabu: “Mo biuta na cudru qai vakanadakuya na katakata.”​—Same 37:8; Efeso 4:31.

Eso era na rairai sega ni duavata kei na ivakasala qori. De dua era na kaya ni sa kaukaua tale na vakatatabu ena iVolatabu vei ira sa nodra ivakarau ga mera voravora. Ia o ira mada ga na kenadau era vakabauta ni sa vakawakana toka vua e dua na cudru, era dau qai vukei ira tale qori mera lewai ira vinaka.

Era saga tale ga na iVakadinadina i Jiova mera vukei ira e veisaqasaqa kei na ivakatagedegede ena iVolatabu na nodra itovo. Era okati e keri o ira era veiyacovi tu, ia era sega ni vakamau. E veivakasalataki na iVolatabu: “Moni kila yadua na sala moni lewa kina na yagomuni, me savasava qai rokovi, moni kua ni dau kocokoco se garogaro vakasisila.”​—1 Cesalonaika 4:4, 5.

“Eso Sara ga Vei Kemuni Oni a va tu Ya”

A duidui nodra isususu kei na nodra ivakarau ni bula e levu ena imatai ni senitiuri ni bera nira lotu vaKarisito. Eso vei ira era cakava na veiveisau lelevu ena nodra bula. Kena ivakaraitaki, era cavuti ena iVolatabu “o ira na dauveiyacovi tawadodonu, qaravi matakau, veibutakoci, na tagane era soli ira mera veiyacovi kei ira na tagane.” Oti sa qai tukuni: “Eso sara ga vei kemuni oni a va tu ya.”​—1 Korinica 6:9-11.

Na cava na ibalebale ni kena tukuni “eso sara ga vei kemuni oni a va tu ya?” Sega ni kena ibalebale qori nira sega tale ni vakila na gagadre ni veimoceri vakatagane se vakayalewa o ira na dau cakava tu e liu na ivalavala ya. Eda kila vakacava? Baleta e veivakasalataki tale ga na iVolatabu: “Moni lako tiko ga ena yalo tabu, oni na qai sega sara ni vakayacora na gagadre vakayago.”​—Kalatia 5:16.

E rawa ni kadre tale ga e lomana e dua na lotu vaKarisito na gagadre ca. Ia e kaya na iVolatabu ni na sega ni vakaceguya na gagadre qori. Era kila na lotu vaKarisito ni dodonu mera lewai ira vinaka ena veika e vauca nodra gagadre, mera cavuraka laivi na gagadre ca de vakavuna nodra valavala ca.​—Jemesa 1:14, 15.^[6]

Sa rauta me vakaduiduitaki ena iVolatabu na gagadre kei na ivalavala. (Roma 7:16-25) Vakacava e rawa ni valuta e dua na gagadre ni veimoceri vakatagane se vakayalewa? Io, e bibi ga me lewai koya vinaka me vaka ga ena cakava ena gagadre ca tale eso e rawa ni vakavuna na nona cudru, veibutakoci, se kocokoco.​—1 Korinica 9:27; 2 Pita 2:14, 15.

Era muria na iVakadinadina i Jiova na ivakatagedegede savasava ena iVolatabu, ia era sega ni togoraka nodra rai vei ira eso tale. Era sega tale ga ni via veisautaka na lawa e vauca na nodra dodonu o ira e duatani na nodra ivakarau ni bula. Era gumatua ga ni kacivaka na itukutuku vinaka vei ira na via rogoca.​—Cakacaka 20:20.