Keu Taleitaka e Dua Keirau Mataqali vata—Kena iBalebale Niu Vakasalewalewa?

Sega!

Kena dina: E levu na gauna, na gagadre ni taleitaki ira oni mataqali vata e dau lekaleka wale ga.

Qori na ka e dikeva o Lisette, e dua na goneyalewa yabaki 16, a dau taleitaki ira tale ga na yalewa ena dua na gauna. E kaya: “Au vulica ena noqu kalasi ni baioloji, ni sega ni dau duadua tu ga na iwiliwili ni hormones, e rawa ni veiveisau. Au vakabauta ke ra kila vinaka e levu na itabagone na veika me baleta na yagodra, era na kila ni dau lekaleka wale ga nodra veitaleitaki vakamataqali vata, era na sega tale ga ni nanuma kina nira vakasalewalewa.”

Ia vakacava ke dede nomu taleitaki ira oni mataqali vata? Vakacava e cala vua na Kalou me tukuna vei ira na veitaleitaki vakamataqali vata mera kua ni veimoceri?

Ke o vakaio ena taro qori, mo nanuma tiko ni qori e yavutaki mai na rai cala ni dodonu meda vakaceguya noda gagadre ni veiyacovi. Na iVolatabu e vakaraitaka ni solia tu vei keda na Kalou na galala meda vakaceguya se sega na noda gagadre. Qo e vakaraitaka ni dokai keda.​—Kolosa 3:5.

E sega gona ni dredre na ka e vakarota na iVolatabu. E uqeti keda kece wili kina o ira na veimoceri vakatagane se vakayalewa meda​—“dro tani mai na veiyacovi tawadodonu.” (1 Korinica 6:18) E milioni na yalewa era vinakata na tagane se tagane era vinakata na yalewa (heterosexual), era lewa vinaka na nodra gagadre ena gauna era temaki kina nira vinakata mera muria na ivakatagedegede savasava ena iVolatabu. E rawa nira cakava tale ga qori o ira na via veimoceri vakamataqali vata ke lomadra dina mera vakamarautaki Jiova.​—Vakarua 30:19.