Ra Taroga na iTabagone

Au na Marautaka Vakacava na Noqu Sokalou?

A davo tiko ena nona imocemoce o Josh, e yabaki 16. E tucake tu o tinana ena matanikatuba qai tukuna vua ena cudru: “Joshua, duri! O kila vinaka nikua na bogi ni soqoni!” A susugi o Josh ena vuvale iVakadinadina i Jiova, qai tiki bibi ni sokalou ena nona vuvale na tiko ena soqoni. Ena dua na gauna lekaleka qo, a sega tu ni lomai Josh me lai soqoni. E tarogi tinana, “Na, e gadrevi dina meu lako?” “Kua ni levu nomu vosa, vakaisulu ga,” e sauma o tinana. “Au sega ni via bera tale!” A vakanadaku, mani lako sara yani. “Raica,” e kaya o Josh ni se rawa ni rogoci koya tiko o tinana. “E rairai nomu lotu qo, e sega ni kena ibalebale ni noqu tale ga.” E kila o Josh ni rogoca vinaka o tinana na ka e tukuna, baleta ni sa tu vakadua. Ia mani gole sara, sega ni sauma na vosa nei Josh. A veivutunitaka o Josh na ka e tukuna. A sega ni via vakamosia na yaloi tinana. Ia a sega tale ga ni via kere veivosoti. Na ka ga e rawa ni cakava oya me  . . . A cegu levu ga o Josh, duri mai nona imocemoce mani vakaisulu sara. A vosavosaiyalona, “Dua na siga ga qo, au sa na vakatulewataka na ka meu cakava. Au sega ni vakataki ira na dau tiko ena Kingdom Hall. Sega ni ganiti au meu dua na lotu vaKarisito!”

E DAU tiko tale ga vei iko na rai va qori? So na gauna o dau nanuma nira marautaka na kena vo na veika vakayalo, ia e vaka mo cakava tu vakavoraki o iko? Kena ivakaraitaki:

◼ O raica tu beka na vuli iVolatabu me vaka na lesoni e soli mai koronivuli (homework)?

◼ O dau voraki na cakacaka vakavunau?

◼ O dau vucesa na tiko ena soqoni vaKarisito?

Ke nomu isaunitaro na “io,” kua ni yalolailai. Ke o cakava e so na veiveisau, o na marautaka nomu qarava na Kalou. Meda raica mada se cava eda na rawa ni cakava.

Leqa #1: Vuli iVolatabu

Vuna e sega ni rawarawa kina. O na rairai nanuma ni sega ni “ganiti iko mo vuli.” O sega ni rawa ni dabe vakadua qai vakarorogo vinaka! Kuria ya, sega li ni sa levu rawa tu na lesoni mai koronivuli mo vulica?

Vuna mo vuli iVolatabu kina. E sega wale ga ni uqeti vakalou na iVolatabu ia e yaga tale ga ‘me ivakavuvuli, me vunauca na ca, me veivakadodonutaki, me vakatavuvuli tale ga ena ka dodonu.’ (2 Timoci 3:16) Ni o vulica na iVolatabu qai vakasamataka vakatitobu, o na kila vinaka kina e so na ka o sega tu ni kila e liu. E dodonu mo liaca na tikina qo: Ke o sega ni cakacaka vakaukaua, ena sega ni dua na kena yaga vei iko. Ke o via qitora vinaka e dua na qito, ena vinakati taumada mo kila na kena lawa qai vakamatauni iko kina. Ke o vinakata mo bulabula, ena gadrevi mo dau vakaukaua yago. Ke o via kila na Dauveibuli, ena gadrevi mo vulica na Vosa ni Kalou.

Na ka era tukuna e so na itabagone. “A vinakati meu vakatulewataka e so na ka niu sa yacova na sekeneri. E levu sara na cala era dau cakava na gone, qai dodonu meu vakatulewataka: ‘Qori beka na ka au via cakava? Erau vakavulici au tiko ena ka dina na noqu itubutubu?’ Au vinakata sara ga meu vakadinadinataka vakataki au.”​—Tshedza, yabaki 20.

“Au vakabauta ni dina na veika au vulica, ia au vinakata meu vakadeitaka sara ga. Meu qarava na Kalou baleta niu vinakata dina, sega ni baleta ni rau vinakata noqu itubutubu.”​—Nelisa, yabaki 20.

Na ka o rawa ni cakava. Me dua nomu ituvatuva ni vuli qai vakatau ena veika o gadreva se taleitaka. Digia na lesoni o na vulica. Na ulutaga cava o na via tekivu kina? Vakacava mo vulica vinaka na nomu iVolatabu qai raica ke salasalavata kei na veika o vakabauta, rawa ni o vakayagataka na ivola Na Cava Sara Mada e Kaya na iVolatabu? a

Na ka me caka. Ni o tekivu, raica e rua se tolu na ulutaga vakaivolatabu e ra o na vinakata mo kila kina e levu tale na ka​—se ke o vinakata, vola ga vakataki iko e so na iulutaga.

❑ E tiko dina na Kalou?

❑ Au na vakadeitaka vakacava nira uqeti vakalou o ira na vola na iVolatabu?

❑ Na cava meu vakabauta kina nira buli na ka kece, sega ni vu mai na evolution?

❑ Na cava na Matanitu ni Kalou, au na vakadeitaka vakacava ni dua na Matanitu dina?

❑ Au na vakamacalataka vakacava na ka au vakabauta me baleti ira na mate?

❑ Na cava meu vakadeitaka kina ni na yaco dina na veivakaturi?

❑ Au na kila vakacava na lotu dina?

❑ ․․․․․

Leqa #2: Cakacaka Vakavunau

Vuna e sega kina ni ka rawarawa. Ena via dredre toka noda vakamacalataka na iVolatabu vei ira na so tale, se o ira na noda itokani e koronivuli.

Vuna mo cakava kina. A vakaroti ira nona imuri o Jisu mera: ‘Qisi ira mera tisaipeli, vakavulici ira mera muria na veika kece ga au sa vakarota tu vei kemudou.’ (Maciu 28:19, 20, VV) Ia e tiko tale so na vuna meda vunau kina. E laurai ena vakadidike ni levu na itabagone era vakabauta na Kalou kei na iVolatabu. Ia, era sega ni nuitaka ni na yaco e so na ka vinaka ena nodra veisiga se bera mai. Ni o vulica na iVolatabu, o na kila kina na itukutuku ra via kila se vaqaqa tu e levu na itabagone nikua!

Na ka era tukuna e so na itabagone. “Keirau dau vakarautaka vinaka kei na noqu itokani na ikaunivosa e laulau, vulica na ka me keirau kaya ke dua e saqati keirau, kei na iwalewale ni veisikovi lesu. Niu vakayagataka e levu na gauna ena cakacaka vakavunau, au taleitaka sara ga.”​—Nelisa.

“A vukei au sara vakalevu e dua na taciqu lotu vaKarisito! E qase vei au ena ono na yabaki, qai dau kauti au ena cakacaka vakavunau, se so na gauna keirau lai katalau vata. E vakaraitaka vei au e so na tikinivolatabu veiuqeti, e veisau sara ga kina noqu rai. E uqeti au na nona ivakaraitaki vinaka meu dau kauaitaki ira tale e so. Au sega ni kila se meu na vakavinavinakataki koya vakacava!”​—Shontay, yabaki 20.

Na ka o rawa ni cakava. Ke rau vakadonuya nomu itubutubu, raica e dua ena ivavakoso e qase vei iko, ena rawa tale ga ni drau veitomani ena cakacaka vakavunau. (Cakacaka 16:1-3) E tukuna na iVolatabu: “Sa vagatai na kaukamea e na kaukamea: ia na tamata, sa vagata vakakina na mata ni wekana.” (Vosa Vakaibalebale 27:17) E yaga dina na noda dau veimaliwai kei ira na sa qase nira sa sotava oti e levu na ituvaki. “E veivakacegui dina nida vakailala kei ira na sa qase,” kaya o Alexis, yabaki 19.

Na ka me caka. Mo vola e ra, na yacana e dua ena nomu ivavakoso mo drau veitomani ena cakacaka vakavunau.

․․․․․

Leqa #3: Tiko ena Soqoni vaKarisito

Vuna e sega ni rawarawa kina. Ni o dabe tu ena loma ni valenivuli ena dua na siga taucoko, o na rairai sega ni vinakata mo rogoca na ivunau vakaivolatabu, ena dua se rua tale na aua.

Vuna mo cakava kina. E uqeti ira na lotu vaKarisito na iVolatabu: “Me da sa vakasamataka tale ga na sala me da dui veivakauqeti kina e na loloma kei na cakacaka vinaka. Me da sa kakua ni vakaweleweletaka na sosoqoni vata, me vaka sa dau nodra i vakarau e so, ia me da sa dui veivakayaloqaqataki ga, ka me vagumatuataki cake sara ni ko ni sa raica ni sa roro voleka tiko mai na Siga ni Turaga.”​—Iperiu 10:24, 25, VV.

Na ka era tukuna e so na itabagone. “E dodonu mo vakavakarau ena soqoni. Ena so na gauna, ena vinaka mo vakaukauataki iko mo vakavakarau. Ni o cakava qori, o na marautaka na soqoni baleta ni o kila na ka ena veivosakitaki, o na rawa sara ga ni vakaitavi.”​—Elda.

“Toso na gauna, au qai liaca niu marautaka na tiko ena soqoni niu dau vakaitavi kina.”​—Jessica.

Na ka o rawa ni cakava. Mo vakavakarau vakailiu, qai saga mo sauma mada ga e dua na taro. Qo ena rawa ni uqeti iko mo dau vakaitavi ena soqoni.

Kena ivakaraitaki: Na cava o na marautaka​—mo sarava na qito ena retioyaloyalo se mo qitora e rara? E macala ga ni na yaga sara na noda vakaitavi mai na sarasara wale tu ga. Vakacava mo cakava sara ga qori ni o tiko ena soqoni vaKarisito?

Na ka me caka. Vola ena vanua lala e ra na siga o na rawa ni vakayagataka kina e 30 na miniti mo vakavakarau ena soqoni vakaivavakoso ena veimacawa.

․․․․․

Era sa vakila tiko e levu na itabagone na dina ni ka e kaya na Same 34:8: “Dou tovolea mada ka raica ni sa yalovinaka ko Jiova.” E sega ni dau veivakacegui ke da rogoca wale tu ga na kena talanoataki e so na kakana vinaka. Ia, e vinaka cake meda tovolea sara ga . E tautauvata sara ga qori kei na noda sokalou. Mo vakatovolea mada, o na qai raica na veivakalougatataki e salavata mai na noda vakaitavi ena soqoni, vuli vakataki keda kei na cakacaka vakavunau. E tukuna na iVolatabu ni o koya e rogoca na vosa qai muria ena ‘kalougata ena nona cakacaka.’​—Jemesa 1:25.

Levu na ulutaga ena “Young People Ask” ena laurai ena Web site www.watchtower.org/ype

[iVakamacala e ra]

ME VAKASAMATAKI

◼ Na cava ena rairai vakavucesa kina vei ira na itabagone na veika vakayalo?

◼ Na basoga cava ni sokalou e vakamacalataki ena ulutaga qo o via cakacaka kina, o na cakava vakacava?

[iYaloyalo ena tabana e 31]

Ke o vinakata mo bulabula, ena gadrevi mo vakaukaua yago. Ke o via kaukaua vakayalo, ena gadrevi mo vulica na Vosa ni Kalou