Me Vu Mai Lomamu

“Dua na ka bibi e vukei ira e levu mera biuta na vakatavako, ya na nodra vakadeitaka sara ga mera muduka.”—ivola na “Stop Smoking Now!”

VAKALEKALEKA sara, ke o via muduka na vakatavako, ena vinakati me vu sara ga mai lomamu nomu via cakava qori. E rawa vakacava? Mo vakasamataka na kena yaga vei iko ke o muduka na vakatavako.

Ena bula nomu ilavo. O rawa ni vakalusia e vica na udolu na dola e veiyabaki ke o volia tiko e veisiga e dua na pakete tavako. “Au sega ni bau vakasamataka tu na levu ni ilavo au vakalusia ena tavako.”—Gyanu, Nepal.

O na marau vakalevu. “Sa qai vinaka noqu bula niu biuta na vakatavako, au raica sara ga na kena yaga.” (Regina, Sauca Aferika) Ni dua e biuta na vakatavako, ena vakavinakataka nona dau tovolea se boica na ka (senses), ena kaukaua vinaka na yagona, rairai vinaka tale ga.

O na bulabula vinaka. “Nodra muduka na vakatavako e levu na tagane kei na yalewa era duidui yabaki, era na bulabula kina vakalevu. E totolo ga nodra vakila na veisau qori.”—Centers for Disease Control and Prevention, Merika.

O na nuidei. “Au biuta na vakatavako niu sega ni vinakata me lewai au. Au via lewa ga na yagoqu.”—Henning, Denmark.

Ena yaga vei ratou nomu vuvale kei na itokani. “Na vakatavako . . . ena vakaleqa nodra bula na maliwai iko. . . . E laurai ena vakadidike ni kubou ni tavako e vakavuna nodra mate e vica na udolu ena veiyabaki, ni tauvi ira na mate ni yatevuso kei na mateniuto.”—American Cancer Society.

O na vakamarautaka na Dauveibuli. “Kemuni na wekaqu lomani . . . meda vakasavasavataki keda mai na dukadukali kece vakayago.” (2 Korinica 7:1) “Moni solia na yagomuni . . . e savasava, e vakadonuya na Kalou.”—Roma 12:1.

“Gauna au kila kina ni Kalou e cata na ka e vakadukadukalitaka na yago, au muduka sara na vakatavako.”—Sylvia, Sipeni.

Ia eso na gauna ena sega ni veirauti me vu mai lomamu nomu sasaga. Ena vinakati tale ga nodra veivuke eso tale, vakataki ira na lewenivuvale kei na itokani. E rawa vakacava nira veivuke?