Ra Taroga na iTabagone
Na Cava Meu Cakava Meu Kua ni Beci au Kina?
IO | SEGA
O taleitaka na ka o raica, ni o ilovi iko ena iloilo?
O raica ni tiko eso na ka mo dokai kina?
O rawa ni vorata na idre ni veimurimuri?
O na ciqoma ni tukuna vei iko e dua nomu malumalumu?
Ke o vakalewai, o rawa ni lewai iko vakamatau?
O vakila ni o dau lomani?
O dau qarauna nomu bula?
O dau marautaka nodra rawaka eso tale?
O raici iko ni o dua o rawa ni rawaka tale ga?
Ke levu na nomu isaunitaro e sega, e kena rairai sa vakamalumalumutaki iko tiko nomu dau beci iko. Na ulutaga qo ena uqeti iko mo kila qori!
E LEVU na itabagone era dau lomaleqataka na kedra irairai kei na ka era rawata, vakatale ga kina na sala era duidui kina ni vakatauvatani kei na nodra icaba. E va tale ga qori nomu rai? Ke vaka kina, o sega ni sotava duadua tiko!
● “E dau vakayalolailaitaki au noqu malumalumu. Levu na gauna au dau vakalewai au ga vakalevu.”—Leticia.a
● “Se mani vakacava na kemu rairai vinaka, o na dau sotavi ira ga eso era na rairai vinaka cake vei iko.”—Haley.
● “Au dau lomaleqa niu maliwai ira tale eso. Au leqataka de ra nanuma niu tawayaga.”—Rachel.
Kua ni yalolailai ke va tale ga ya nomu rai. O rawa ni vukei. Raica mada e tolu na ka ena “vukei iko mo kua ni beci iko kina” me qai vinaka tiko ga nomu rai me baleti iko.
1. Qara na iTokani Vinaka
Tikinivolatabu bibi. “Sa loloma tiko e na veigauna kece na wekana na tamata, ka sa vaka na tacina e na gauna ni rarawa.”—Vosa Vakaibalebale 17:17.
Kena ibalebale. Ni yaco na leqa, na itokani vinaka ga ena dau veivuke. (1 Samuela 18:1; 19:2) E rawa ni uqeti iko mada ga na nomu kila ni dua e kauaitaki iko. (1 Korinica 16:17, 18) O koya gona, kabiti ira ga era na uqeti iko ena ka vinaka.
“Na itokani dina ena sega ni vakayalolailaitaki iko.”—Donnell.
“E bibi ena so na gauna nomu kila ni dua e kauaitaki iko dina. Qo o na sega ni beci iko kina.”—Heather.
Qaqarauni: Qarauna mera kua ni vakamuai iko nomu itokani ena itovo o kilai dina kina—sega ni itovo o vinakata mera ciqomi iko ga kina. (Vosa Vakaibalebale 13:20; 18:24; 1 Korinica 15:33) Nomu vakaitovotaki iko ena so na itovo mo vakalomavinakataka ga kina eso, ena vakavuna mo beci iko ga kina, o na liaca ni o vakalialiai iko tiko ga.—Roma 6:21.
Na ka mo cakava. Vola e ra na yacai nomu itokani ena rawa ni vukei iko mo kua ni beci iko.
․․․․․
Vakacava mo saga mo veimaliwai kei na nomu itokani qori? Me nanumi: E sega sara ni tukuni mo drau itabavata.
2. Vukei Ira Tale Eso
Tikinivolatabu bibi. “E marau vakalevu o koya e solia na ka, vakalailai o koya e taura na ka.”—Cakacaka 20:35.
Na kena ibalebale. Nomu vukea tale eso, o sa vukei iko tale tiko ga. Ena sala cava? “A daulomasoli ena vakamamautaki,” e tukuna e dua na Vosa Vakaibalebale ni iVolatabu. “Ia ko koya sa vagunuva na tani ena vagunuvi talega ko koya.” (Vosa Vakaibalebale 11:25) E sega ni vakabekataki qo—o na marau vakalevu ni o vukei ira tale eso!b
“Au dau vakasamataka na ka au rawa ni cakava vei ira tale eso, au saga tale ga meu dau cakava eso na ka vei ira ena noqu ivavakoso era gadreva dina tu na veivuke. Noqu dau loloma kei na noqu veikauaitaki au vakila kina na marau dina.”—Breanna.
“E dau veivakalougatataki dina na cakacaka vakaitalatala vaKarisito, ni uqeti iko mo kua ni nanumi iko ga, ia o nanumi ira tale eso.”—Javon.
Qaqarauni: Kua ni veivuke mo rawaka ga kina. (Maciu 6:2-4) O na vakaleqai iko ga ke cala nomu inaki, era na kila kina eso ni sega ni vinaka na nomu inaki!—1 Cesalonaika 2:5, 6.
Na ka mo cakava. Vakasamataka e dua o sa vukea ena dua na gauna sa oti. O cei ya kei na cava o cakava vua?
․․․․․
Na cava o vakila ena ka o cakava ya?
․․․․․
Vakasamataka e dua tale o rawa ni vukea, qai vola se sala cava o rawa ni vukei koya kina.
․․․․․
3. Kua ni Yalolailai ni o Cala
Tikinivolatabu bibi. “Nida ivalavala ca kece, eda sega ni yacova rawa tale ga na lagilagi ni Kalou.”—Roma 3:23.
Na kena ibalebale. Eda sega dina ga ni uasivi. Kena ibalebale qo ni na tiko ga na gauna o na tukuna se cakava kina eso na ka cala. (Roma 7:21-23; Jemesa 3:2) Me vaka nida na sega ni levea na cala eda cakava, ia eda rawa ni lewai keda ena ka e baleta na cala ya. E tukuna na iVolatabu: “Ni sa bale vakavitu na tamata yalododonu, ia sa na tu cake tale.”—Vosa Vakaibalebale 24:16.
“Eso na gauna eda dau beci keda baleta nida vakatauvatana noda malumalumu kei na nona vinaka e dua.”—Kevin.
“O keda kece e tiko na ka eda vinaka kina kei na ka eda malumalumu kina. E dodonu meda marautaka na ka eda vinaka kina da qai vakavinakataka na ka eda malumalumu kina.”—Lauren.
Qaqarauni: Mo kua ni vakaiulubaletaka nomu sega ni uasivi mo lai cakava kina e dua na ivalavala ca. (Kalatia 5:13) Nomu nakita mo cakava e dua na ka ca, o na tawasei iko sara ga mai na veivakadonui e bibi duadua—ya na Kalou o Jiova!—Roma 1:24, 28.
Na ka mo cakava. Vola e ra na itovo o na taleitaka mo vakavinakataka.
․․․․․
Vola na tikinisiga nikua kei na itovo o vola ya. Mo vakekeli ena ka mo vakavinakataka, ni oti e dua na vula mo railesuva se sa vakacava tiko na nomu toso.
E Tiko Dina na Kemu Yaga
E tukuna na iVolatabu ni “uasivia na lomada na Kalou.” (1 Joni 3:20) Kena ibalebale qo ni raica rawa o koya na kemu yaga, dina ke o sega ni raica. Ia vakacava, e sa veisau beka na rai ya baleta nida sega ni uasivi? Vakasamataka mada ke tu vei iko e dua na noti ni $100 qai via kabasu toka. O na biuta laivi beka se o raica ni sega na kena yaga baleta ni sa kabasu toka? Sega sara ga! E se $100 tiko ga—ke mani tiko mada ga na kabasu ya se sega.
E tautauvata tale ga qo kei na rai ni Kalou me baleta na kemu yaga. E kila qai vakamareqeta na nomu sasaga mo vakamarautaki koya, ke o nanuma mada ga ni sega ni yaga! Io, e vakadeitaka vei keda na iVolatabu “Ni sega ni tawayalododonu na Kalou me guilecava na nomuni cakacaka kei na nomuni kauaitaka dina na yacana.”—Iperiu 6:10.
E levu tale na ulutaga mai na “Young People Ask” e rawa ni kune ena Web site www.watchtower.org/ype
[iVakamacala e ra]
a Eso na yaca ena ulutaga qo sa veisau.
b Ke o dua na iVakadinadina i Jiova, vakasamataka na marau levu o na vakila ni o wasea na itukutuku ni Matanitu ni Kalou vei ira tale eso.—Aisea 52:7.
VEIKA ME NANUMI
Na cava o na cakava ke o yalolailai
● Nira vakalewai iko na nomu itokani?
● Ni o nanuma ni o na sega ni vinaka me vakataki ira tale eso?
● Ni o raica tiko ga nomu malumalumu?
[Tikina bibi ena tabana e 25]
“E rawa ni rairai vinaka e dua ia e vakila ni vaka e sega ni rairai vinaka. Se dua e sega so ni rairai vinaka qai nanuma ni rairai vinaka duadua. Na ka kece qo e baleta tiko ga na noda itovo ni rai me baleta eso na ka.”—Alyssa
[Kato/iYaloyalo ena tabana e 25]
NA KA ERA TUKUNA NOMU ICABA
“Na vale kaukaua mada ga ena gadrevi me dua na kena ivakadei qai vakavinakataki tale ga ena so na gauna. Levu na gauna e dau vakayaloqaqataki au nona vosa vakayalololoma noqu itokani, nona matadredredre se nona dau mokoti au mada ga.”
“Kua ni vuvutaka nodra itovo vinaka eso, ni rawa ni yaga vei keda—me vaka ga ni yaga tale ga vei ira noda itovo vinaka.
[iTaba]
Aubrey
Lauren
[iYaloyalo ena tabana e 26]
E se yaga tiko ga na ilavo, dina ke kabasu toka. E tautauvata tale ga qo kei na kemu yaga vua na Kalou, dina ni o sega ni uasivi