Na Cava Era Vakabauta na iVakadinadina i Jiova?

1. Na iVolatabu

Era vakabauta na iVakadinadina ni “vakavuna na Kalou na volai ni iVolatabu kece.” (2 Timoci 3:16) E vola o Jason D. BeDuhn, e dua na ivukevuke ni parofesa me baleta na dikevi ni lotu: “[Era yavutaka na iVakadinadina i Jiova] na nodra vakabauta kei na nodra ivakavuvuli ena iVolatabu, ra qai sega ni lewa na ka e volai kina.” E salavata na ka era vakabauta kei na iVolatabu, era sega ni moica na ka e tukuna me salavata kei na ka e ganiti ira. Ia era kila tale ga ni so na ka e volai ena iVolatabu era vosa tu vakaibalebale. Me kena ivakaraitaki, na kena buli na vuravura me vitu na siga e ivakatakarakara ga, e dusia tiko e dua na gauna dede.​—Vakatekivu 1:31; 2:4.

2. Na Dauveibuli

Na Kalou dina e tiko na yacana​—o Jiova (se Yahweh, me vaka e vakayagataki ena Roman Catholic Jerusalem Bible, e donu tale ga qo vei ira eso na vuku nikua)—qori e vakaduiduitaki koya mai na kalou lasu.a (Same 83:18) Na yaca ni Kalou ena matuavosa vakaIperiu e rauta ni vaka7,000 na kena laurai ena iVolatabu taumada. Ni bibi vei Jisu na yaca oya, e tukuna kina ena nona masu kilai levu: “Me vakarokorokotaki na yacamuni.” (Maciu 6:9, Ai Volatabu) E vinakata na Kalou meda sokalou vakatabakidua vua. Koya gona, o ira na iVakadinadina era sega ni dau vakayagataka na matakau se na ivakatakarakara ena gauna ni nodra sokalou.​—1 Joni 5:21.

3. Jisu Karisito

E iVakabula, “Luve ni Kalou,” qai “ulumatua ni kabuli kece.” (Joni 1:34; Kolosa 1:15; Cakacaka 5:31) E sega ni tiki ni Letoluvakalou o Jisu, ia e dua na ka buli. E tukuna kina o Jisu: ‘O Tamaqu e cecere sara vei au.’ (Joni 14:28) A bula voli mai lomalagi o Jisu ni bera ni lako mai vuravura, ni oti nona mate vakaisoro, a lesu i lomalagi ni vakaturi oti. ‘Ena vukuna ga ena qai torovi Tamana rawa kina e dua.’​—Joni 14:6.

4.

Na Matanitu ni Kalou Qo e dua dina na matanitu vakalomalagi qai tiko na kena tui​—o Jisu Karisito​—era le 144,000 tale ga era na veiliutaki kei koya, “era voli mai vuravura.” (Vakatakila 5:9, 10; 14:1, 3, 4; Taniela 2:44; 7:13, 14) Era na liutaka na vuravura e sa na sega kina na veika ca kece, ra qai bula kina e milioni vakacaca na dau rerevaka na Kalou.​—Vosa Vakaibalebale 2:21, 22.

5. Na Vuravura

E tukuni ena Dauvunau 1:4: “Ko vuravura sa tu ga ka sega ni mudu.” Ni oti na nodra vakarusai na tamata ca, ena vukici o vuravura me parataisi, era na qai bula tawamudu kina na yalododonu. (Same 37:10, 11, 29) E sa na qai vakayacori kina na vosa i Jisu ena nona masu “me caka na lomamuni e vuravura.”​—Maciu 6:10.

6. Na parofisai ena iVolatabu

“Na Kalou . . . e sega ni lasu rawa.” (Taito 1:2) Koya gona, ena yaco dina na ka e parofisaitaki, wili kina na parofisai vakaivolatabu me baleta na icavacava ni vuravura qo. (Aisea 55:11; Maciu 24:3-14) O cei ena bula ena veivakarusai sa roro tiko mai qo? E tukuni ena 1 Joni 2:17: “O koya e cakava na loma ni Kalou ena tu ga me sega ni mudu.”

7. O ira na veiliutaki vakatamata

E tukuna o Jisu: “Ni solia vei Sisa na ka e nei Sisa, vua na Kalou na ka e nona na Kalou.” (Marika 12:17) Qo gona na vuna era dau talairawarawa kina na iVakadinadina i Jiova ena lawa ni nodra vanua ke sega ni veisaqasaqa kei na lawa ni Kalou.​—Cakacaka 5:29; Roma 13:1-3.

8. Vunau

A parofisaitaka o Jisu: “Na itukutuku vinaka ni matanitu ni Kalou” ena vunautaki ena veiyasa i vuravura ni bera na icavacava ni vuravura qo. (Maciu 24:14) E ka dokai dina vei ira na iVakadinadina i Jiova mera vakaitavi ena cakacaka ni veivakabulai qo. E vakatau sara ga vei ira na tamata na nodra vakarorogo se sega. Na iVolatabu e tukuna: “Me mai gunuva wale na wai ni bula o koya yadua e vinakata.”​—Vakatakila 22:17.

9. Papitaiso

O ira na iVakadinadina i Jiova era papitaisotaki ira ga era via qarava na Kalou nira sa vulica vinaka na iVolatabu, era via qarava na Kalou mera dua na nona iVakadinadina. (Iperiu 12:1) O ira qori era na qai vakaraitaka na nodra yalayala nira papitaiso ena wai.​—Maciu 3:13, 16; 28:19.

10. Vakaduiduitaki na lewenilotu vei ira na iliuliu ni lotu

E tukuna o Jisu vei ira na nona imuri, “ni veitacini ga.” (Maciu 23:8) O ira na lotu vaKarisito taumada, wili kina o ira na dauvola iVolatabu a sega na nodra iliuliu ni lotu. Na ivakarau vakaivolatabu qori era muria tale ga na iVakadinadina i Jiova.