Eda Vinakata me Oti na Rarawa!

E tekivu na rarawa i Khieu ena gauna a vakamatei kina o tamana ena nona sereki ira na bulumakau ena dua na loga ni sila voleka. Oti qori, a labati o tinana kei na rua na ganena​—ena nodra tikoyavavala na ilawalawa kominisi e Cambodia. E mavoa tale ga o Khieu ena gasaukuro era bulu tu. E 16 na siga na nona waraka tu na veivuke ni tu ena loma ni veikau. Ena vinakati me musu na yavana. E tukuna kina o Khieu: “E vinaka ga meu mate.”

DE DUA o sa vakadinadinataka nida dau sotava kece na rarawa. Na leqa tubu koso, tauvimate, vakaleqai ni yagoda, ivalavala kaukaua, kei na so tale na leqa e rawa ni tarai keda kece. Ena rawa ni yaco qori vakasauri ena vanua cava ga eda tu kina. Era cakacaka vakaukaua na isoqosoqo dauveivuke mera tarova se vakacegui ira e levu mai na rarawa. Ia na cava era sa bau rawata?

Dikeva mada e dua na ivakaraitaki​—na sasaga me vakaoti na via kana. E tukuni ena niusiveva na Toronto Star, ni levu sa sega na nodra vale, sa sega tale ga na kedra kakana ena vuku ni leqa tubu koso. Ia e tukuna na niusiveva qori ni “kena tubu tiko ga na ivalavala kaukaua, e vakadredretaka na nodra sasaga na dauveivuke mera vakalailaitaka na via kana.”

Era saga na iliuliu ni politiki, iliuliu ni vanua, kei ira na iliuliu ni tabana ni bula, mera vakalailaitaka na leqa ni via kana, ia e dreve ga na nodra sasaga. Na kena sagai mada ga me vinaka na ivakatagedegede ni bula vakailavo e se sega ga ni walia na dravudravua. Na veimataqali wainimate kei na iwalewale vovou ni veisele, e sega ni vakaotia rawa na tauvimate. Era sega ni cakava rawa e dua na ka na ovisa kei ira na sotia era dau lai veisaututaki, ni sa tubu tiko ga na ivalavala voravora sa yaco tu qo.

Na cava e sa rui levu kina na rarawa? Vakacava, e kauaitaka na Kalou na ka eda sotava tiko? E vakacegui ira e vica vata na milioni na isau ni taro era kunea ena iVolatabu, me vaka eda na vakarau dikeva qo.