Na Vuvale Vakacabecabe e Dei

KEIRAU SEGA WALE GA NI TIKO ENA DUA NA VALE

Na luvei Philip yalewa o Elise sa yabaki 20, e qarava na ka kece a dau cakava tu o tinana e vale. Ni vakawatitaki Louise o Philip, vakacava erau na veimaliwai vinaka o Elise kei tinana vakacabecabe?

Louise: E sega ni rawarawa ni se qai tekivu. Au dau taleitaka na tiko e vale kei na cakacaka ni vale, au via vakaraitaka tale ga niu radinivale.

Elise: A veiveisautaka na ka e vale o Louise qai kolotaka laivi e levu na neirau iyaya. Dua na gauna au sasamaki qai biuta cala eso na iyaya niu sa sega ni nanuma na vanua era dau biu tu kina e liu. Qori e vakararawataki Louise sara ga, keirau veivosaki katakata au qai sega tu ni vosa vei Louise me dua na macawa.

Louise: Dua na gauna au tukuna vei Elise, “Au sa sega ni kila sara ga na ka me caka, au sa sega ni rawata me ca tiko nodaru veimaliwai.” E qai mai kere veivosoti vei au e muri. Au mokoti koya sara, keirau qai veitagicaki.

Elise: A sega ni luvata tani kece mai lalaga o Louise na kequ itaba, a sega tale ga ni kauta laivi o Ta na cina au biuta tu e lomanivale. De nanumi ni sega ni dua na ka qori, ia na nodrau sega ni cakava ya e vakadeitaka vei au niu se lewe tiko ga ni vuvale. Au vakavinavinakataki Louise tale ga ena nona dau lomani ganequ e gone vei au ni dau gade mai. Sa oti qo e rua na yabaki, au sa okati Louise me lewe ni neitou vuvale.

Louise: Keirau sega wale ga ni tiko ena dua na vale kei Elise, keirau sa veitokani vinaka sara ga.

“BIBI CAKE NA DUAVATA”

E tolu na luvei Anton, e tolu tale ga na luvei Marelize ena gauna rau vakawati kina ena ono na yabaki sa oti.

Anton: Keitou dau cakava vata na ka vakavuvale, me vaka na keba. E tiko tale ga na gauna me keirau vakayagataka yadudua vei ratou na gone. E taura toka e vica na yabaki me keitou qai matau ina vuvale vou qo, ia sa wali ena gauna qo e levu na neitou leqa.

Marelize: Keirau nanuma ni bibi me keirau okati ratou kece na gone me “luvei keirau” sega ni “luvemu” se “luvequ.” Au vakasamataka ena dua na gauna niu cudruvi Anton ni cala na ka e cakava vei luvequ tagane qai biuti luvena yalewa ena idabedabe i liu ni motoka. Au vulica ni bibi cake na duavata ni vuvale mai na nona dabe e liu ena motoka e dua. Keirau saga me keirau kua ni veivakaduiduitaki dina ga ni na sega ni tautauvata na ka e caka vei ratou na gone.

Au sega ni dau talanoataka eso na ka marautaki a yaco ena neitou vuvale e liu, nira na nanuma kina eso tale ni vinaka cake na vuvale qori. Ia au vakavinavinakataka ga na vuvale keitou sa lewena tiko qo.

‘VAKACAUCAUTAKI RATOU E LIU’

Erau vakawati o Francis kei Cecelia ena va na yabaki sa oti. E tolu na luvei Cecelia eratou sa uabula, e dua tale ga na luvei Francis tagane e se itabagone.

Francis: Au dau saga meu torovi rawarawa, meu kua tale ga ni dau leva totolo. Keitou dau kana vata qai vakayagataki na gauna qori me caka kina na veitalanoa vakavuvale. Au dau kerea tale ga me keitou veivuketaka na cakacaka ni vale ni na yaga qori ena vuvale.

Cecelia: Au dau vakayagataka na gauna vei ratou yadudua na luvei keirau qai rogoca na ka eratou leqataka se na ka eratou rarawataka. Keirau dau vakacaucautaki ratou e liu ena neitou veivosaki vakavuvale, qai veiuqeti ena so na ka me vakavinakataki. Keu cala, au na tukuna vakadodonu qai dau kere veivosoti.

SUSUGI AU O TINAQU KEI TAMAQU VAKACABECABE

O Yuki sa yabaki 20 ena gauna qo, a se raici tamana ga ni se qai yabaki lima. E muri a qai vakawatitaki Tomonori o tinana, ia a mate o tinana ni yabaki tini o Yuki. Oti e lima na yabaki, a vakawatitaki Mihoko o tamai Yuki vakacabecabe. Qo erau sa susugi koya o tinana kei tamana vakacabecabe.

Yuki: Ena gauna a vakawati tale kina o tamaqu vakacabecabe, au nanuma ni “sega ni gadrevi me dua na tinaqu vakacabecabe. Sa rauti au sara tu ga qo, sa levu tale ga na veiveisau e yaco ena neitou vuvale.” Au sega gona ni ciqomi koya, au sega tale ga ni kauaitaki koya.

Mihoko: Au vakadeitaka meu na saga me keirau veikilai vinaka kei Yuki, dina ga ni sega ni vakasaurarataki au o watiqu meu lomana na luvena tagane vakacabecabe. Keirau dau saga vakaukaua me keirau kua ni veisautaka na nona ituvatuva, me vaka nona itavi vaKarisito, ka ni veivakamarautaki, kei na veitalanoa ni oti na vakayakavi e veisiga. Au sa qai kilai koya vinaka ni keirau veitalanoataka oti na takali nei tinana.

Niu sa bukete, keirau leqataki Yuki, keirau vinakata me kila ni se lewe tiko ga ni vuvale. Keirau kerei Yuki me vakania, vakasilima, qai veisautaka na diaper ni gone, keirau dau vakacaucautaka tale ga na nona veivuke nira rai tu eso tale. E dau volekati Yuki sara o Itsuki. Ni bera ni kila o Itsuki na vosa “Ta” se “Na,” e sa cavuta rawa na vosa niinii—kena ibalebale tuakaqu.

Yuki: E kena ivakarau ga mera dau galili na gone vakacabecabe se ra nanuma nira sega ni kauaitaki. O na rairai saga mo vakamacalataka na kemu ituvaki vei ira tale eso, ia de dua era na sega ni taura rawa. Ia au rawa ni tukuna ena marau nira dau veitokoni dina na taciqu lotu vaKarisito. Ena gauna qo, keirau sa veimaliwai vinaka kei tinaqu vakacabecabe. E dau vakasalataki au vakavinaka, au rawa tale ga ni talaucaka vua na lomaqu.

[iTikina bibi ena tabana e 25]

Mo dau vosovoso! E rawa ni marau qai dei na vuvale vakacabecabe