Na Rai ni iVolatabu

Vuna Meda Vakacaucautaki Ira Kina Eso Tale

E LEVU era nanuma nira sega ni kauaitaka eso tale na nodra sasaga. Kena ivakaraitaki, o ira na tamata cakacaka era nanuma ni sega ni kauaitaki ira nodra boso. Era raica e levu na vakawati ni sega ni dau kauaitaki ira na kedra isa. Era nanuma tale ga eso na gone nira na sega tu ga ni cakava rawa na ka era namaka na itubutubu. Ni basika na rai va qori, eda na vakacegui ke da yalorawarawa meda dau veivakacaucautaki.

E sega ni ivakarau ni bula ena vuravura nikua nona tauca dina mai vu ni lomana e dua na vosa ni veivakacaucautaki. E sega ni kurabuitaki qori baleta e sa parofisaitaka tu mai na iVolatabu: “Ia mo kila ni na duatani sara na iotioti ni veisiga, ena vakilai kina e levu na ka dredre. Nira na dau lomani ira ga na tamata, . . . era na sega ni dau vakavinavinaka, era na sega ni yalodina.”—2 Timoci 3:1, 2.

E sa bau tauca vei iko e dua na vosa ni veivakacaucautaki e vu dina mai lomana? Ke vaka kina, o na kila ni dau veivakacegui qori qai veivakauqeti. E tukuna na iVolatabu: ‘Na vosa e tau ena kena gauna donu e yaga dina.’ (Vosa Vakaibalebale 15:23) E rawa ni vukei keda na iVolatabu meda dau yalovinaka vei ira eso tale.

Raica na ka Era Vinaka Kina Eso Tale

Ni kauaitaki keda vakalevu na Kalou, e raica qai taleitaka na vinaka ni noda itovo kei na veika vinaka eda cakava. E vakadeitaka vei keda na iVolatabu: “Ni sa veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.” (2 Veigauna 16:9) E kila vinaka tu o Jiova na noda dau muria na nona lawa meda vakaraitaka kina nida lomani koya.

Na Kalou o Jiova e sega ni dau vaqara cala. Ena sega ni bula rawa e dua ke cakava qori vei keda. (Same 130:3) Ia o Jiova e vaka e dua e dau keli vatutalei, e vosota na kelikeli ena ibinibini vatu me raica e dua na vatu talei. E marau na dau kelikeli ni raica e dua na vatu talei. Ena rairai sega ni talei na vatu varovaroa, ia e kila na dau keli vatutalei ni tiko na kena yaga. E va tale ga qori na Kalou ni dikeva na lomada, e vaqara na noda itovo vinaka, sega ni noda cala. E dau marau ni raica vei keda na itovo vinaka. E kila o Jiova nida rawa ni dua na ka talei se da dua na nona tamata yalodina qai gugumatua ke da vakavinakataka tiko ga na noda itovo.

Eda rawa ni vakatotomuria na nona ivakaraitaki na Kalou. Nida raici ira eso tale, e rairai dau kena ivakarau ga meda raica na nodra malumalumu. Ia ke tiko vei keda na rai i Jiova me baleti ira eso tale, eda na vaqara ga na nodra itovo vinaka. (Same 103: 8-11, 17, 18) Eda rawa ni vakacaucautaki ira nida raica na nodra itovo vinaka. Na cava na kena yaga? Ena vakacegui ira tale na so na ka eda tukuna, era na rairai saga tale ga vakaukaua mera cakava na ka dodonu! Eda na vakila tale ga na marau e rawati ena solika.—Cakacaka 20:35.

Vakavinavinakataka na ka Vinaka e Caka

E kauaitaka qai vakavinavinakataka o Jisu na ka vinaka era cakava eso tale. A leqataka na marama tauvimate na nona tara lo na isulu e sau i Jisu me vakabulai kina, ia a vakacaucautaki koya o Jisu ni tukuna: “Luvequ, e sa vakabulai iko na nomu vakabauta.”—Marika 5:34.

Ni veivakavulici tiko ena dua tale na gauna o Jisu ena valenisoro e Jerusalemi, a raica nira biuta tiko e levu na vutuniyau na nodra ilavo ena kato ni cau. A raica tale ga e dua na yada dravudravua ni biuta e “rua na ilavo lailai sara.” E levu cake sara na ka era biuta eso tale. la e vakacaucautaka na yada e matanalevu o Jisu ena nona solika mai vu ni lomana. A kaya: “Au tukuna vakadodonu vei kemuni, e dina ni dravudravua na yada qo, ia na ka e biuta e levu duadua vei ira kece. O ira kece qori era biuta mei isolisoli na ivovo ni ka e tu vei ira, ia na yada qo e biuta na ka sara ga me bula kina.”—Luke 21:1-4.

Eda rawa vakacava ni vakatotomuri Jisu? E kaya na iVolatabu: “Mo kakua ni bureitaka na ka vinaka vei ira e dodonu me nodra, ni sa rawa vei iko mo cakava.”—Vosa Vakaibalebale 3:27.

Yaga na Veivakacaucautaki

Eda dau vinakata kece meda vakacaucautaki qai lomani ni sa ivakarau tu ni bula ni vuravura qo na sega ni vakavinavinaka. Na noda veivakacaucautaki mai vu ni lomada ena vakaukauataki ira eso tale, vakayaloqaqataki ira tale ga. Na noda veivakacaucautaki tale ga mai vu ni lomada ena uqeti ira eso tale mera cakava tiko ga na ka dodonu ena nodra vinaka kece.—Vosa Vakaibalebale 31:28, 29.

E uqeti ira kece na lotu vaKarisito na iVolatabu: “Meda dau veinanumi, meda veivakauqeti, meda veilomani, meda caka vinaka tale ga.” (Iperiu 10:24) Ena vinaka na bula e vuravura ke da dau veinanumi kece, eda raica ga na nodra itovo vinaka eso tale, da vakavinavinakataka tale ga na veika vinaka era cakava. Io e yaga dina na veivakacaucautaki!

O BAU VAKASAMATAKA?

● Na cava meda vakacaucautaki ira kina eso tale ena veika vinaka era cakava?—Vosa Vakaibalebale 15:23.

● Na cava e raica o Jiova ni dikevi keda?—2 Veigauna 16:9.

● Ena gauna cava meda vakacaucautaki ira kina eso tale?—Vosa Vakaibalebale 3:27.

[iYaloyalo ena tabana e 30]

O dau kauaitaka qai vakavinavinakataka na veika vinaka era cakava eso tale?