E Dau Veivakacegui Nida Veivakacaucautaki
1 “Au a sega li ni gone vinaka nikua?” e taroga ena vosa tagitagi e dua na goneyalewa lailai ni bera toka ga ni lai moce ena bogi. E tarai tinana sara ga na taro oya. E dina ni raica votu na nona saga vakaukaua o luvena me talairawarawa, a sega ga ni bau kauaitaka me vakacaucautaki koya. Na nona tagi na goneyalewa oya e vakaraitaka tiko vei keda kece e dua na ka—se da gone se qase—eda gadreva na veivakacaucautaki. Eda vakacegui ira beka na tu volekati keda nida vakacaucautaki ira ena veika vinaka era cakava?—Vkai. 25:11.
2 E levu sara na ka era cakava na noda itokani lotu Vakarisito meda vakacaucautaki ira kina. Era dau colata vagumatua na nodra itavi na qase ni ivavakoso, dauveiqaravi vakaitalatala, kei ira na painia. (1 Tim. 4:10; 5:17) O ira na itubutubu era rerevaka na Kalou era dau saga ena nodra igu mera tubera na luvedra ena sala i Jiova. (Efeso 6:4) Era saga vagumatua na itabagone lotu Vakarisito mera valuta na “yalo ni vuravura.” (1 Kor. 2:12; Efeso 2:1-3) E so tale era qaravi Jiova tiko ga ena yalodina dina ga nira sa qase, tautauvimate, se ra sotava na veivakatovolei. (2 Kor. 12:7) E dodonu mera vakacaucautaki kece o ira oqori. Eda sa bau vakacaucautaka beka na nodra sasaga?
3 Me Kua ni Tau tu ga Vakararaba: E dau vakamarautaki keda na veivakacaucautaki e cavuti ena buturara ni vosa. Ia, ena veivakacegui sara ke tukuni yadudua vei keda. Kena ivakaraitaki, ena wase 16 ni nona ivola ni veivakacaucautaki o Paula vei ira mai Roma, a tukuni iratou yadudua sara ga o Fipi, Pirisila kei Akuila, Taraifina kei Taraifosa, vaka kina o Perisi kei na vuqa tale. (Roma 16:1-4, 12) E vakacegui iratou na tamata yalodina oqori na nona vosa! Nida veivakacaucautaki, ena vakadeitaka vei ira na mataveitacini nida gadrevi ira, qai ka oqori ena vakavolekati keda vei ira. O se qai vakacaucautaka oti beka ga e dua?—Efeso 4:29.
4 Me Vu Mai Lomada: Kevaka eda via veivakacegui e dodonu me vu mai lomada na noda veivakacaucautaki. E rawarawa ni kilai ke da vosa dina tiko mai lomada se da “vosaveicavilaki” wale ga. (Vkai. 28:23) Ke da vakamatautaka meda dau raica na veika vinaka era cakava e so tale, eda na via vakacaucautaki ira sara ga mai vu ni lomada. Meda dau tauca mada ga na vosa ni veivakacaucautaki e vu dina mai lomada, ena noda kila tiko ni “vinaka na vosa e na gauna e yaga kina!”—Vkai. 15:23.