Kauai ena Bibi ni Veivakacaucautaki

O SA bau rogoca na nona kudruvaka e dua na tamata cakacaka ni dau vakavudua na nona vakacaucautaki koya na nona boso? O dau kudruvaka beka na ka vata ga oya? Ke o dua na itabagone, o dau vosataka beka na nodrau sega ni dau vakacaucautaki iko o rau na nomu itubutubu kei ira na nomu qasenivuli?

E vinaka beka na yavu ni so na kudru oqori. Ia, e kaya e dua na turaga ni Jamani e nona cakacaka saumi me dau vakayaloqaqataki ira na tamata cakacaka, ni dau vakavuna vakalevu na kudru ni tamata cakacaka na nodra sega ni dau kauai na boso, dina ga nira dau rarawataka tale ga nira sega ni dau vakacaucautaki. Se mani cava e kudruvaki, na nodra vosavosa e vakaraitaka ni tiko e dua na leqa. O koya gona, e bibi ruarua na veivakacaucautaki kei na veikauaitaki, me rawa ni vinaka kina na veimaliwai.

E bibi tale ga oqori ena noda sokalou, e dodonu me vakilai ena loma ni ivavakoso vakarisito na yalo ni veivakacaucautaki, veikauaitaki kei na veinanumi. Era na vakaitovotaka tiko ga na veika oqori na lewe ni ivavakoso ke ra muria na idusidusi vakaivolatabu. Se mani vinaka tu vakacava na veilomani ena noda dui ivavakoso, e se rawa ga ni vakavinakataki. O koya gona, meda dikeva mada e tolu na ivakaraitaki vakasakiti ni veivakacaucautaki: O Ilaiu na dauveiqaravi i Jiova, a bula ni bera na gauna vakarisito, na yapositolo o Paula, kei Jisu Karisito.

iVakasala e Tau ena Veidokai kei na Veinanumi

E vukei Jope o Ilaiu, e dua e rairai weka i Eparama, me vakadodonutaka na nona rai me baleta na nona veiwekani kei Jiova. E turaga vakaitovo o Ilaiu, e dau veidokai qai vosa ga nira sa vosa oti na kena vo. O Ilaiu, a vakasalataki Jope qai vakacaucautaki koya, ia o ratou nona itokani vakailasu eratou raica ga na nona malumalumu. E veikauaitaki ena gauna e soli ivakasala kina qai vakilai na nona veinanumi ni a kacivi Jope ena yacana. A vakamasuti Jope ena yalo e veidokai: “O  koya oqo mo rogoca mada kina, Jope, na noqu vunau, ka vakarorogo ki na noqu vosa kecega.” Ni biuti koya ena ituvaki i Jope, e kaya kina ena yalo ni veinanumi: “Raica, ka’u sa vakataki iko e na mata ni Kalou: koi au talega, ka’u sa buli e na qele.” Oti sa qai vakacaucautaki Jope ena nona kaya: “Kevaka sa dua na nomu vosa, mo kaya mai vei au: mo vosa mai, ni’u sa viavakadonui iko.”​—Jope 33:​1, 6, 32.

Noda itovo vinaka vei ira na tani kei na noda veidokai e dua na sala eda vakacaucautaki ira kina. E vaka sara ga eda kaya tiko vei ira na vakarorogo, ‘Au kila ni dodonu mo kauaitaki, mo dokai tale ga.’ Noda vakayacora oqori e vakaraitaka nida kauaitaki ira, da nanumi ira tale ga.

Noda vakaraitaka na itovo vinaka kei na noda veidokai e sega ni okati ga kina na noda muria e dua na lawa ni itovo. Me yaga na noda veivakacaucautaki, e dodonu me vu mai lomada na noda itovo vinaka kei na noda veidokai. E dodonu me vakilai ena noda veivakacaucautaki na veikauaitaki dina kei na loloma.

Mo Maqosataka Nomu Veivakacaucautaki

E vakaraitaka na yapositolo o Paula na yaga ni veivakacaucautaki. Me kena ivakaraitaki, ena gauna a vunau tiko kina mai Aceni ena ikarua ni nona ilakolako vakaulotu, a vunautaka na ivakavuvuli vakarisito vei ira eso na vuku ni Kirisi. Dikeva na maqosa ni nona cakava na itavi oqo. “Sa qai veileti kaya, eso na nodra vuku nai tokani i Epikuro, kei ira na Sitoike. Ka sa kaya eso, A cava mada sa via kaya o la na dauvosa oqo? eso tani, Ko koya oqo sa vaka e dua sa vakatakila mai eso na kalou vou: ni sa vunautaki Jisu vei ira ko koya, kei na tu cake tale mai na mate.” (Cakacaka 17:18) A sega ni yalolailai o Paula, ia a sauma ga: “O i kemuni na turaga e Aceni, au sa raica rawa ni ko ni sa vanua dau qaravi kalou.” A sega ni vunauci ira o Paula baleta nira qaravi matakau, ia a vakacaucautaki ira ga baleta nira tamata daulotu.​—Cakacaka 17:​22, VV.

A veivakaisini tiko beka o Paula? Sega. A kila o koya ni sega ni dodonu me vakalewai ira na rogoci koya tiko; ena dua na gauna a lecava tale ga o koya na ka dina mai na iVolatabu. E sega ni nona itavi me vakalelewa, me vunautaka ga na itukutuku ni Kalou. Era vakadinata tale ga na iVakadinadina i Jiova na ka e kila vinaka tu o Paula, ni so era dau tokona na lotu lasu era sa mai yalodina ena tutaki ni lotu dina.

E laulau na iwalewale e vakayagataka o Paula. “A sa kabiti koya eso na tamata, a ra sa vakabauta; e dua vei ira ko Taionisio mai na mataveilewai mai na vanua-cecere nei Arisi, kei na yalewa sa vakatokai ko Tamarisi, koi rau kei ira tale eso.” (Cakacaka 17:34) A vuku dina o Paula ena nona vakacaucautaki ira na kai Aceni nira dei ena nodra vakabauta​—e dina ga ni yavutaki cala na nodra vakabauta​—qai sega ni vunauci ira ena nodra lecaika! E so vei ira na vakacalai ena ivakavuvuli lasu e vinaka tu na lomadra.

E maqosataka o Paula na iwalewale ni nona ivakamacala vei Eroti Akariva na iKarua. Rau a veibutakoci tiko o Eroti kei ganena o Verenaisi, na itovo e vakacala na iVolatabu. A sega ni vunauci rau o Paula. Ia, a vaqara ga e dua na yavu vinaka me vakacaucautaki Eroti kina. “Au sa nanuma ka’u sa kalougata, kemuni Akaripa na tui, ni’u na tukuni au edaidai e matamuni e na vuku ni ka kecega era sa beitaki au kina na Jiu: io, ni kemuni sa kila kecega na nodrai valavala na Jiu kei na veika era sa dauveiletitaka: o koya oqo ka’u sa masuti kemuni kina mo ni vosota mada ga mo ni rogoci au.”​—Cakacaka 26:​1-3.

E ka vakayalomatua me rogo matau tale ga na noda ivakamacala vei ira na tani! Noda vakacaucautaka e dua e tiko tikivi keda, e dua eda vuli vata, se dua eda cakacaka vata e rawa ni vakavinakataka na noda veimaliwai qai uqeta na ivalavala vinaka. Noda saga meda tara na loma ni tamata ena vosa ni veivakacaucautaki e veiganiti, e rawa ni uqeti ira na tamata lomavinaka mera veisautaka na nodra rai kei na nodra ivalavala me salavata kei na kilaka dodonu.

Nona iVakaraitaki Uasivi ni Veivakacaucautaki o Jisu

A dau veivakacaucautaki o Jisu. Kena ivakaraitaki, ni oti nona vakaturi me lai bula i lomalagi o Jisu, a dusimaki koya o Jiova me vakayagataki Joni me vakadewataka nona itukutuku ina vitu na ivavakoso mai Esia Lailai. A vakacaucautaki ira e ganiti ira mera vakacaucautaki. Ni vosa ina ivavakoso mai Efeso, Perikamo, kei Caetaira, a vakayagataka e so na matavosa me vaka na: “Au sa kila na nomui valavala, kei na nomu oca kei na nomu dauvosota, ni ko sa sega tale ni vosoti ira era sa ca”; “ia ko sa taura matua na yacaqu, ia ko sa sega ni cakitaka na noqu lotu”; kei na “Au sa kila na nomu cakacaka, kei na dauloloma, kei na dauveiqaravi, kei na vakadinata, kei na nomu dauvosota, kei na nomu daucakacaka; ia oqo emuri sa uasivia ko ya sa liu.” E dina ga ni a vunauci sara vakaukaua na ivavakoso mai Sariti, ia a dikeva rawa o Jisu ni tiko e so e dodonu mera vakacaucautaki, qai kaya vei ira: “Sa tu ga vei iko mai Sariti, e lewe vica ga era sa sega ni vakadukadukalitaka na nodrai sulu; a ra na lako voli kei au e nai sulu vulavula: ni ra sa yaga.” (Vakatakila 2:​2, 13, 19; 3:4) E ivakaraitaki vinaka dina o Jisu!

Me vakataki Jisu ga, meda kua ni vakalewai ira na so ena vuku ni nodra cala e le vica ga, se da veivunauci ga da qai sega ni vakacaucautaki ira e dodonu mera vakacaucautaki. Meda nanuma tiko, ni ke da dau veivakacaucautaki ga ena gauna ni veivunauci, ena rawa ni vakawaletaki na noda veivakacaucautaki. Meda veivakacaucautaki mada ga ena gauna kece e dodonu me caka vakakina! Ena gauna e qai gadrevi kina na veivunauci, ena ciqomi rawarawa.

Na Qase ni iVavakoso e Taudonu Nodra Veivakacaucautaki

E nanuma lesu o Cornelia, e dua na marama lotu Vakarisito e veiqaravi tiko ena dua na valenivolavola ni tabana ni iVakadinadina i Jiova e Urope, ni a tarogi koya e dua na ivakatawa dauveilakoyaki ena veiyabaki ni 1970. E taroga ke sa toso vinaka tiko na nona dau vuli vakataki koya kei na nona dau wilika na ivoladraudrau. A kaya taumada o Cornelia, “Au via madua vakalailai,” ia a qai tusanaka ni dredre vua me wilika tasevu na ivoladraudrau. “A sega ni vunauci au o koya ena vuku ni noqu malumalumu,” e nanuma lesu o Cornelia, “ia a vakacaucautaki au ga ena wiliwili au sa bau cakava rawa. E uqeti au sara ga na nona veivakacaucautaki, au vakadeitaka kina me tekivu mai na gauna oya me’u dau wilika na iulutaga kece ena ivoladraudrau.”

E nanuma vinaka tu o Ray, e dua e veiqaravi tiko ena dua na valenivolavola ni tabana e Urope, na imatai ni siga ni nona veiqaravi vakapainia. E dina ga ni cakacaka saumi, vakamatavuvale qai levu na nona itavi ena ivavakoso na ivakatawa daulewa, ia ni curu yani ina vale ni soqoni ena bogi oya, a lai raici Ray sara qai tarogi koya, “E vakaevei na imatai ni siga ni nomu veiqaravi vakapainia?” Nikua, e se nanuma vinaka tu ga o Ray na nona veinanumi na qase ni ivavakoso oya, e dina ga ni sa oti oqo e rauta ni 60 na yabaki.

E macala mai na rua na vakasavuirogorogo oqori ni noda dau vakavinavinaka mai vu ni lomada​—sega ni vosa sabalia se vosa veicavilaki​—e dau cakayaco dina. E tu e levu na vuna meda vakacaucautaki ira kina na tacida vakayalo ena ivavakoso vakarisito. Vakasamataka mada na nodra sasaga mera qaravi Jiova, vakarautaka vinaka nodra isaunitaro, nodra doudou ni vunau mai na buturara se nira vakaitavi ena soqoni, nodra lomakatakata ena veivakavulici, kei na nodra sasaga mera vakaliuca na veika e vauca na matanitu ni Kalou kei na isausau vakayalo. Ke da dau vakacaucautaki ira na tani, eda na vakalougatataki vakalevu. Ena vakamarautaki keda qai vakavinakataka na noda rai.​—Cakacaka 20:35.

E bibi mera vakacaucautaki ira na lewe ni ivavakoso na qase, ena cakacaka vinaka era qarava tiko. Ke gadrevi, era na veivunauci vakayalololoma na qase. Ena yasana adua, era na sega ga ni lai kauaitaka vakasivia na kena caka vakavinaka na ka me sa lai okati kina me dua na cala levu na kena sega ni taucoko.

Ke ra vakatotomuria na qase lotu Vakarisito na veidokai kei na yalololoma i Ilaiu, na sala maqosa e vosa kina o Paula, kei na veinanumi i Jisu, era na vu ni veivakayaloqaqataki vei ira na tacidra vakayalo. Na veivakacaucautaki ena uqeti ira na tacida vakayalo mera vakalevutaka na nodra cakacaka vinaka qai vakavuna na veiyaloni kei na veimaliwai vinaka. Sa wacava na marau nei Jisu ni rogoca na vosa ni veivakacaucautaki nei Tamana vakalomalagi ena nona kaya, “O iko na noqu Gone ni toko, au sa dauvinakati iko vakalevu!” (Marika 1:​11) Meda vakamarautaki ira mada ga na tacida ena noda dau vakacaucautaki ira mai vu ni lomada.

[iYaloyalo ena tabana e 15]

E yaga nona maqosataka nona vosa o Paula, ena yaga tale ga na noda maqosataka na noda vosa

[iYaloyalo ena tabana e 16]

E rawa ni mana na veivakacaucautaki e vu dina mai lomada