“Na Kena Vinaka na Vosa ena Gauna e Yaga Kina!”
NI VAKAYACORI tiko e dua na soqo siga dua ni iVakadinadina i Jiova, a saga o Kim me vakarorogo vinaka qai volavola tale ga, ia ena gauna vata oqori a raica me tiko vakamalua na luvena yalewa yabaki rua veimama. Ni cava na porokaramu, a vakacaucautaki Kim kei watina e dua na tacida yalewa lotu Vakarisito ratou a dabe vata tiko, ena nodrau saga me tiko vakamalua na luvedrau ena siga oya. E tarai Kim sara ga na veivakacaucautaki oya, dina ni sa mai oti oqo e vica na yabaki, ia e kaya: “Niu dau wawale ena gauna ni soqoni, au vakasamataka lesu na ka e tukuna na taciqu oya. Nona vosa ni veivakayaloqaqataki e dau uqeti au meu vakavulici luvequ tiko ga.” Io na vosa taudonu e rawa ni veivakayaloqaqataki. E kaya na iVolatabu: “Na kena vinaka na vosa e na gauna e yaga kina!”— Vosa Vakaibalebale 15:23.
Ia, e so vei keda e dau dredre na noda vakacaucautaki ira na tani. So na gauna e vu oqo ena noda dau beci keda. E kaya e dua na lotu Vakarisito: “E vaka niu duri tu ena vanua lolobo. Na levu ga ni noqu vakacaucautaki ira e so, na levu ni noqu vakila ni vaka au lutu sobu.” Ena rairai vakadredretaka tale ga noda veivakacaucautaki na madua, noda beci keda, se noda leqataka ni na tauri cala na ka eda tukuna se cakava. Kena ikuri, ke da dau sega so ni kauaitaki se da sega sara ga ni kauaitaki ena gauna eda tubucake tiko kina, ena rairai dredre meda dau veivakacaucautaki.
Ia, nida kila na yaga ni veivakacaucautaki vei koya e solia kei koya e ciqoma, ena uqeti keda oqori meda saga meda dau veivakacaucautaki ena gauna veiganiti. (Vosa Vakaibalebale 3:27) Na cava sara mada na kena yaga? Meda dikeva mada e vica.
Kena Yaga
Na veivakacaucautaki e veiganiti ena vakadeitaki koya e ciqoma. “Nira vakacaucautaki au e so, au kila nira nuitaki au, ra qai vakabauti au,” e kaya o Elaine, e dua na marama vakawati lotu Vakarisito. Io, ni vakacaucautaki e dua e dau beci koya ga, e rawa ni vakaukauataki koya me vosota na leqa e sotava, ena marau tale ga. Ena yaga sara vakalevu vei ira na itabagone na veivakacaucautaki e ganiti ira. E kaya e dua na itabagone e dau vakayalolailaitaki koya nona rai cala: “Au dau saga vakaukaua meu vakamarautaki Jiova, ia so na gauna au dau nanuma ni sega ni veiganiti na ka au cakava. Au dau marau ni dua e vakacaucautaki au.” Dina kina na vosa vakaibalebale ena iVolatabu: “A ka sa vosataki taudonu sa vaka na moli koula e na kato siliva.”—Vosa Vakaibalebale 25:11.
Veivakauqeti na veivakacaucautaki. E kaya e dua e cakacaka vakaitalatala vakatabakidua: “E uqeti au sara ga meu cakacaka vakaukaua na veivakacaucautaki, meu vakavinakataka tale ga na noqu cakacaka vakavunau.” E raica rawa e dua na tina e rua na luvena ni nodra dau veivakacaucautaki na lewe ni ivavakoso vei rau na gone ni rau saumitaro ena soqoni, e uqeti rau me rau qai saumitaro ga kina vakalevu. Io, na veivakacaucautaki e rawa sara ga ni uqeti ira na gone me vinaka cake na nodra muria na bula vakarisito. Io, eda vinakata kece meda kauaitaki, da qai taleitaki. Na lomaocaoca ni vuravura oqo e rawa ni vakaocai keda da qai yalolailai tale ga. E kaya e dua na qase ni ivavakoso: “So na gauna au dau yalolailai, ia na veivakacaucautaki e vaka sara ga ni saumi na noqu masu.” E kaya tale ga o Elaine: “So na gauna au dau vakila na veivakadonui i Jiova ena vuku ni ka era tukuna vei au e so tale.”
Eda nuitaki keda nida vakacaucautaki. Ena laurai na noda dau veinanumi, da veilomani, da veivakadeitaki, da qai veikauaitaki kevaka e vu mai lomada na noda veivakacaucautaki. E vakadinadinataka nida lomani ira dina na tacida vakarisito da qai kauaitaki ira tale ga. E kaya o Josie e dua na tina: “E liu, au dau saga meu tutaka na ka dina ena vuvale e duidui nodra vakabauta. E qai vakaukauataki au meu kua ni soro na nodra dau vakavinavinakataki au o ira na matua vakayalo.” Io, eda “sa veitiki ni dua bau ga na yago.”—Efeso 4:25, VV.
Na veivakacaucautaki e vukea meda raica na veika vinaka era cakava e so. Meda dau raica na veika vinaka era cakava e so tale, sega ni nodra malumalumu. E kaya o David e dua na qase ni ivavakoso: “Na noda vakavinavinakataka na ka era cakava e so ena uqeti keda meda dau veivakacaucautaki.” Nida vakasamataka nodrau yalovinaka o Jiova kei Luvena ena nodrau vakacaucautaki ira na tamata ivalavala ca, ena uqeti keda meda vakatotomuri rau.—Maciu 25:21-23; 1 Korinica 4:5, VV.
O Ira Mera Vakacaucautaki
E dodonu me vakacaucautaki sara ga e liu na Kalou o Jiova ni bulia na ka kece ga. (Vakatakila 4:11) E sega ni gadreva meda vakataudeitaki koya se meda uqeti koya, ia nida vakacaucautaki koya ena vuku ni nona kaukaua kei na nona dau yalololoma, ena volekati keda o koya da qai bucina kei koya e dua na veiwekani voleka. Na noda vakacaucautaka na Kalou ena vukea meda vakayalomalumalumutaki keda da qai kua tale ga ni dokadokataka na ka eda sa rawata, baleta nida rawata na veika oqori ena veivukei i Jiova. (Jeremaia 9:23, 24) O Jiova e solia na inuinui ni bula tawamudu vei ira na tamata e ganiti ira, oqo e dua tale na vuna meda vakacaucautaki koya kina. (Vakatakila 21:3, 4) A gumatua o Tui Tevita ena gauna makawa me ia “na vakavinavinaka ki na yaca ni Kalou . . . ka vakalevulevui koya e na vakamolimoli.” (Same 69:30) Me bau noda gagadre tale ga oqo.
E dodonu mera vakacaucautaki o ira eda vakabauta vata. Na noda cakava oqo, eda sa muria tiko kina na ivakaro vakalou oya meda “vakasamataka tale ga na sala me da dui veivakauqeti kina e na loloma kei na cakacaka vinaka.” (Iperiu 10:24, VV) E ivakaraitaki vinaka sara na yapositolo o Paula ena tikina oqo. A vola ina ivavakoso e Roma: “Me’u vakatekivu, ko Jisu Karisito ka’u sa vakavinavinaka kina vua na noqu Kalou e na vukumudou kecega, ni sa tukuni e vuravura taucoko na nomudou vakabauta.” (Roma 1:8) E vaka kina na yapositolo o Joni, a vakacaucautaka na tacina vakarisito o Keo ena vuku ni nona ivakaraitaki vakasakiti “me vaka ni . . . sa daumuria na dina.”—3 Joni 1-4.
Nikua, ni dua na tacida e ivakaraitaki vinaka ena dua na itovo vakarisito, se ni cakava vinaka e dua na itavi e lesi vua ena soqoni se vakamacala vinaka, e gauna vinaka sara ga oqori meda na vakavinavinakataki koya kina. Se ni saga e dua na gone me raica na veitikinivolatabu ena gauna ni soqoni, eda rawa ni vakacaucautaki koya. E kaya o Elaine, sa cavuti oti mai: “E duidui na noda taledi. Nida vakavinavinakataka na ka e cakava e dua, eda vakavinavinakataka tiko na duidui ni taledi e laurai vei ira na tamata ni Kalou.”
Ena Vuvale
Vakacava na noda vakavinavinakataki ira na lewe ni noda vuvale? E gadrevi vei rau na veiwatini na gauna, na cakacaka vakaukaua, kei na veikauaitaki vakayalololoma me rau vakarautaka kina na veika vakayalo kei na veika vakayago me baleta na nodrau vuvale. Sa na macala tu ga ni rau na gadreva na vosa ni veivakacaucautaki mai vei kedrau isa kei ira na luvedrau. (Efeso 5:33) Me kena ivakaraitaki, me baleta na yalewa sa vinaka sara, e kaya na Vosa ni Kalou: “Eratou tubu cake na luvena, me vosavakalougatataki koya; a watina talega, sa vakacaucautaki koya.”—Vosa Vakaibalebale 31:10, 28.
E dodonu tale ga mera vakacaucautaki na gone. Ka ni rarawa, ni so na itubutubu e totolo ga na nodra tukuna vei luvedra na ka era vinakata, ia vakavudua mera vakacaucautaka nodra saga tiko na luvedra mera veidokai ra qai talairawarawa. (Luke 3:22) Nira vakacaucautaki na gone nira se qai tubucake tiko, era vakila nira vinakati ra qai lomavakacegu kina.
E dina ni ka ni sasaga toka noda vakacaucautaki ira tale e so, ia ena yaga tale ga vei keda. Io, na levu ga ni noda vakacaucautaki ira e dodonu mera vakacaucautaki, na levu tale ga ni noda marau.—Cakacaka 20:35.
Ciqoma Qai Veivakacaucautaki ena Lomavinaka
Ena yasana kadua, ena bau ka ni veivakatovolei toka vei ira e so nira vakacaucautaki. (Vosa Vakaibalebale 27:21) Me kena ivakaraitaki, e rawa ni teivaka na yalo ni viavialevu vei ira era dau dokadoka. (Vosa Vakaibalebale 16:18) O koya gona, e gadrevi meda qaqarauni. Solia kina na ivakasala yaga oqo na yapositolo o Paula: “Au sa kaya vei ira na tamata yadua vei kemudou, me kakua e dua me dokai koya me vaka sa sega ni dodonu me dokai koya; me yalomatua ga na nona nanuma, me vaka nai vakarau ni vakabauta sa vota na Kalou vei ira yadua.” (Roma 12:3) Meda rawa ni vukei ira e so tale mera kua ni dokadokai ira, ena ka vakavuku meda kua ni vakacaucautaki ira ena levu ni ka era kila se na kedra irairai totoka. Meda vakavinavinakataka ga na veika vinaka era cakava.
Ni soli qai ciqomi na veivakacaucautaki ena lomavinaka, ena yaga sara ga vakalevu vei keda. Eda na vakavinavinakataki Jiova ga ena ka vinaka kece eda cakava. Ena uqeti keda tale ga na veivakacaucautaki me donu tiko ga na noda ivalavala.
Na veivakacaucautaki e vu mai lomada e vaka tiko na isolisoli eda rawa kece ni solia. Ni veiganiti na noda veivakacaucautaki, ena yaga ga vei ira era ciqoma.
[Kato/iYaloyalo ena tabana e 18]
Na iVola e Tara na Lomana
Se nanuma vinaka tiko ga e dua na ivakatawa dauveilakoyaki e dua na siga ena vulaililiwa, ni rau lesu tiko mai vakaveiwatini ena cakacaka vakavunau me rau gole ina nodrau icili. E kaya: “A liliwa o watiqu qai yalolailai, mani kaya ni sa sega ni rawa ni tomana na cakacaka oqo. ‘E vinaka cake,’ e kaya, ‘me daru painia tu ga ena dua na ivavakoso, daru tiko ga ena dua na vanua, ra qai tiko na nodaru vuli iVolatabu.’ Sega ni dua na ka au vakatulewataka ena tikinigauna oya, ia au tukuna ga vua me keirau vakaotia mada na cakacaka ena macawa oya, me qai raici se sa veisau nona rai se sega. Ke sa mani dei tiko ga kina, au na doka. Ena siga vata tiko ga oya, keirau taura kina e dua na nona ivola mai na valenivolavola ni tabana. Ena ivola a vakacaucautaki sara ga kina na nona vosota kei na nona gugumatua ena cakacaka vakavunau, ni sega tale ga ni ka rawarawa na moce ena duidui icili ena veimacawa. E tarai koya sara ga na veivakacaucautaki oya ni sega tale vakadua ni tukuna me keirau cegu ena cakacaka vakaivakatawa dauveilakoyaki. Vica mada ga na gauna a uqeti au meu tomana tiko ga na cakacaka oqo niu dau nanuma meu sa cegu.” Erau vakaitavi ena cakacaka vakaivakatawa dauveilakoyaki na veiwatini oqo me voleka ni 40 na yabaki.
[iYaloyalo ena tabana e 17]
O cei ena ivavakoso e ganita na veivakacaucautaki?
[iYaloyalo ena tabana e 19]
Era bulabula na gone nira kauaitaki ra qai vakacaucautaki tale ga