1. Volivoli Vakayalomatua
KE O sega ni tea na kemu kakana, e macala ga ni o na lai volia mai ena makete se sitoa. O rawa vakacava ni digia qai volia na kakana bulabula?
● Lewa vinaka na gauna ni volivoli.
E veivakasalataki na Food Safety Information Council mai Ositerelia: “Volia rawa e liu na kakana ena rawa ni maroroi dede qai sega ni dau biu ena katoniwaililiwa. Na iotioti ni ka me voli, [na iyaya] era dau biu ena katoniwaililiwa.” Ke o volia tale ga na kakana sa vakabutari rawa, mo qai lai kauta ni o sa vakarau gole i vale.
● Volia na kakana bulabula.
Ke rawa, tovolea mo volia na kakana bulabula.a O Ruth mai Nigeria e rua na luvena, e tukuna: “Au dau lako vakamataka ena makete meu lai volivoli ni se sega ni malai na kakana.” E dau volivoli tale ga ena makete o Elizabeth mai Mexico, e tukuna: “Au dau volia kina na vuanikau kei na kakana draudrau bulabula, au rawa ni digia sara ga na kena au vinakata. Au dau volia tale ga na lewenimanumanu e vakamatei ena siga ya. Au na vakayagataka ga e vica, qai maroroya na kena vo ena katoniwaililiwa.”
● Dikeva vinaka na kemu kakana.
E vinaka mo taroga: ‘E se vinaka tu na kakana au volia niu raica na kulina se drauna? E sega ni boi na lewenimanumanu?’ Ke sa olo rawa tu na kakana, dikeva vinaka na kena iolo. E rawa ni curuma na kakana na manumanu somidi ni mate ke sega ni olo vakavinaka.
E tukuna o Chung Fai e dau voli kakana ena sitoa mai Hong Kong: “E dodonu tale ga meda raica vinaka na kena iolo, e tiko kina na tikinisiga e dodonu me sa kua ni volitaki kina na kakana.” Na cava na vuna? Era veivakasalataki na kenadau ni se rawa ga ni vakavu tauvimate na kakana sa “oti na gauna me volitaki kina,” veitalia mada ke se vinaka na kena irairai, iboi, se kena ikanakana.
● Tawana vinaka.
Na taga ni volivoli e rawa ni vakayagataki tale se na itawatawa ni kakana palasitika e dodonu me sava wasoma ena wai katakata kei na sovu. Na lewenimanumanu kei na ika e rawa ni vakaleqa eso tale na kakana, mera kua gona ni dau tawa vata.
Erau dau volivoli voleka ga ena nodrau itikotiko e dua na veiwatini mai Itali, o Enrico kei Loredana. Erau kaya: “Keirau cakava qori me keirau kua ni kauta kina vakabalavu na kakana, me kua tale ga ni ca.” Ke sivia na 30 na miniti na nomu ilakolako lesu i vale, na kakana e dau biu ena katoniwaililiwa me tawa ena dua na taga se kato e sogo vinaka me batabata tiko ga kina.
Ena veivosakitaki ena ulutaga tarava na sala me taqomaki kina na kakana e vale.
[iVakamacala e ra]
a Raica na ulutaga “Na Kena iMatai—Mo Lewa Vinaka na ka o Kania” ena ilavelave ni Yadra! Epereli-June, 2011.
[iKato ena tabana e 4]
VAKAVULICI LUVEMU: “Ni bera ni ratou volia na luvequ e dua na kakana tawaipakete me vaka na kakana mamada, au dau vakavulici iratou me ratou raica rawa na tikinisiga e dodonu me sa oti kina na kena volitaki.”—Ruth, Nigeria