3. Vakarautaki Qai Maroroi Vinaka na Kakana

E SEGA ni qaqarauni e dua na dauveiqaravi e Isireli makawa ena nona lai kauta mai veikau na kakana e vaka tu na meleni, ia e ‘sega mada ga ni kila na kakana ya.’ Sa qai wakia vata kei na sitiu. Era leqataka o ira na kania de gaga na kakana, ra mani kailavaka: “Sa gaga na lewe ni kuro.”—2 Tui 4:38-41.

E dusia na ivakaraitaki qori ni rawa ni vakavu leqa se rawa ni vakaleqa sara ga nona bula e dua ke sega ni qarauni vinaka na vakarautaki ni kakana. E bibi gona me dau vakarautaki qai maroroi vinaka na kakana me kua ni vakadewa na mate. Dikeva mada qo e va na vakatutu:

● Qarauna nomu vakamalumutaka na lewenimanumanu.

E tukuna na U.S. Department of Agriculture: ‘Ena gauna e biu mai kina e tuba na lewenimanumanu, de dua ena kaukaua tu e loma, ia e leqataki na lewena sa malumu rawa tu baleta ni levu na beketiria era dau kune ena vanua e rauta e 4 ina 60 na dikiri celsius na kena katakata.’ E vinaka gona me vakamalumutaki ena katoniwaililiwa se toni ena wai batabata qai olo vakavinaka, se vakamalumutaki ena ivakatakata ni kakana (microwave).

● Me buta vinaka.

E tukuna na World Health Organization: “Ni vakasaqari vinaka na kakana, ena rawa ni mate kece na manumanu somidi e dauveivakaleqai.” Ni o vakasaqa, vakabibi ke suvu se sitiu, mo raica na kena katakata me sa lai yacova na 70 na dikiri celsius.a Ena rairai dredre me dua e kila na katakata ni so na kakana e dau saqa, e levu gona vei ira na dauvakasaqa era dau vakayagataka e dua na ivakarau ni katakata (meat thermometer) e dau vakayagataki ena lewenimanumanu.

● Laukana totolo.

Na kakana e vakabutari me kua ni dau biu dede qai laukana. E rawa ni veivakaleqai ke sega ni laukana totolo. Me vakabatabatataki tiko ga na kakana e dodonu me laukana batabata, me vakatakatai tiko ga na kakana e dodonu me laukana ni se katakata. E rawa ni vakatakatai tiko ga na lewenimanumanu ena ovani e 93 na dikiri celsius na kena katakata.

● Me qarauni vinaka na vo ni kakana.

E dau raica o Anita e dua na tina mai Poladi me ratou dau kana ena gauna ga e buta kina na kakana. Ke vo na kakana, e tukuna o Anita: “Au dau biuta ena katoniwaililiwa niu vakarautaka oti ga. Au dau ologa tale ga vakalalai me rawa ni malumu totolo ni biu mai tuba.” Ke o maroroya na vo ni kakana ena katoniwaililiwa, me laukana ena loma ni tolu ina va na siga.

Ke o lai kana i valenikana, o sa na nuitaki koya sara ga e vakasaqara na kakana o kania. O na rawa gona ni taqomaka vakacava na nomu vuvale ni dou lai kana ena dua tale na vanua?

[iVakamacala e ra]

[Kato ena tabana 6]

VAKAVULICI LUVEMU: “Ni ratou vakasaqa na luvequ, au dau tukuna vei ratou me ratou wilika qai muria na idusidusi e lakovata mai na kakana e tawaipakete.”—Yuk Ling, Hong Kong