Sa Voleka ni Sautu na Vanua Ena Kakana!

O RAWA ni cakava eso na ka me taqomaki kina na kemu kakana. Ia e levu na ka o na sega ni cakava rawa. Kena ivakaraitaki, e macala ga ni o na sega ni dikeva kece na kakana ni bera ni o volia se vakasaqara. De dua o na volia na kakana e sa vakarautaki oti tu se e vakau mai ena dua tale na vanua. Eso tale ga na kakana o volia ena rairai tu kina eso na wainimate rerevaki e dewa mai na cagi, wai, se qele.

Ena dua na ripote e kena ulutaga “Foodborne Disease Control: A Transnational Challenge,” era tukuna na vakailesilesi ni World Health Organization ni so na leqa ni kakana “ena sega ni walia rawa ga e dua na matanitu; ena vinakati na veitokoni ni matanitu kece e vuravura.” Na mate e vu mai na kakana e vakilai e veiyasai vuravura!

E macala ga ni levu era na lomatarotarotaka na vuna eda tukuna kina ena nuidei ni sa voleka na gauna eda na kania kina na kakana bulabula. Na vuna eda tukuna kina qori ni yalataka o “Jiova na Turaga kei vuravura kecega” ni na walia na leqa ni kakana e sotava tu na kawatamata. (Josua 3:13) Eso era na rairai tukuna ni leqa ni kakana e vakadeitaka ni sega ni rawa ni nuitaki na Kalou. Ia vakasamataka mada: Ke dua na dauveiqaravi e valenikana e sega ni qaqarauni qai laiva me vakaleqai na kakana, vakacava me beitaki o koya e vakasaqara? Sega.

E va tale ga qori na kena vakacacani tiko na kakana e vuravura. Me na beitaki ga kina na tamata, sega ni Dauveibuli. Sa rauta me levu tiko ga nikua na kakana e veivakaleqai baleta nida vakavuna tiko ga. E yalataka na Kalou ni na ‘vakawabokotaki ira na vakarusai vuravura tiko.’—Vakatakila 11:18.

Sa vakadinadinataka oti na Kalou ni kauaitaka meda kania na kakana vinaka. O koya sara ga a bulia na vuravura qai vakatubura na vunikau e “vinaka na kenai rairai,” e “yaga me kakana.” (Vakatekivu 2:9) Ena gauna mada ga e tekivu tauvimate kina na kawatamata, e se vakarautaka ga na Kalou o Jiova vei ira na nona tamata na idusidusi matata me taqomaki kina na kedra kakana kei na yagodra.—Raica na kato ‘iVakasala me Baleta na Noda Bula.’

Na kakana vakacava e vinakata na Kalou meda marautaka? E tukuna na iVolatabu: “Sa vakatubura ko koya na co me kedra na manumanu, kei na co eso me yaga vei ira na tamata: Me vakatubura na kakana mai na qele; kei na waini, sa vakamarautaka na loma ni tamata, kei na waiwai sa lumilumisa kina na matana, kei na kakana sa kaukauwa kina na loma ni tamata.” (Same 104:14, 15) E tukuna tale ga na iVolatabu ni ‘manumanu bula kece era veitosoyaki e rawa ni laukana.’—Vakatekivu 9:3.

E yalataki ena Vosa ni Kalou me baleta na veigauna se bera mai: “Ena qai solia ko koya na uca ki na nomu sore ni kau, ko sa kaburaka ki na qele; ia na sila madrai, na vua ni qele, ena vakauro ka vakalewe; a nomu manumanu ena kana e na siga ko ya e na vanua veico levu.” (Aisea 30:23) Io, na itukutuku e vakavuna tiko na nuiqawaqawa nikua e sa na vakarau sosomitaki ena itukutuku: “Kakana bulabula me baleti keda kece!”

[Tikina bibi ena tabana e 9]

E yalataka vei keda na Dauveibuli e dua na gauna vinaka se bera mai ena levu kina na kakana bulabula

[Kato ena tabana e 8]

‘IVAKASALA ME BALETA NA NODA BULA’

E rauta na 3,500 na yabaki sa oti, a vakarautaki vei ira na Isireli na Lawa a soli vei Mosese. Na lawa qori a taqomaki ira na Isireli mai na levu na mate e vu mai na kakana. Dikeva mada e vica na lawa qo:

● Me kua ni vakayagataki na iyaya kei veileti e biu kina na manumanu mate: ‘Na iyaya kece e vakayagataki me toni ena wai, ena dukadukali me yacova na yakavi, oti ena qai savasava.’—Vunau ni Soro 11:31-34.

● Kua ni kania na manumanu e laurai ni sa mate tu: “E tabu ni kemuni kania e dua na ka sa mate loa.”—Vakarua 14:21.

● Me laukana totolo na vo ni kakana me kua ni maroroi tu vakadede: “E na mataka me laukana talega na kena vo: ia na tiki ni lewena sai madrali sa vo tu e na kenai katolu ni siga, me vakamai e na bukawaqa.”—Vunau ni Soro 7:16-18.

E kurabuitaka o A. Rendle Short, M.D., ni tiko ena lawa a soli vei Mosese na “ivakasala vuku qai yaga me baleta na bula” ni laurai vata kei na lawa ni veimatanitu voleka ena gauna oya.