4. Qaqarauni ni O Kana ena Dua Tale na Vanua

E bulabula qai kaukaua o Jeff, e dua na turaga yabaki 38. A kauti ratou na nona vuvale ina dua na valenikana volekati Pittsburgh, Pennsylvania, e Merika. Oti ga e dua na vula, a mate o Jeff ni leqa na nona yate. Na vu ni leqa? Dua na mataqali varasa a biu ena kena kakana a tu kina na mate na hepatitis A.

ENA dua na vanua vakavalagi, voleka ni veimama ni ilavo kece ni kakana e vakayagataki ena valenikana. E laurai tale ga ena vanua oya, ni rauta na veimama ni mate e vu mai na kakana, e dewa mai na kakana e vakarautaki e valenikana.

Ni o lai kana e valenikana, e macala ga ni dua tale e volia na ka me vakasaqari, samaka na valenikuro, vakasaqa tale ga. Ia e vakatau vei iko na vanua mo lai kana kina, na ka mo kania, kei na nomu kauta na vo ni kakana i vale.

● Vakadikeva vinaka.

E tukuna o Daiane, e tiko mai Brazil: “Ni keitou curu ena dua na valenikana keitou se qai lakova vakadua, au vakaraica mada e liu ke savasava na teveli, isulu ni kana, iyaya ni kana, mera savasava tale ga qai maqosa na veiqaravi kina. Ke sega, keitou na lai vaqara tale e dua na valenikana.” Ena so na vanua, era dau gole sara ga na vakailesilesi ni tabana ni bula mera lai dikeva ra qai kalasitaka na savasava ni valenikana, ra qai biuta na kena macala mera wilika na lewenivanua.

● Qarauna na kau kakana e vo mai valenikana.

E veivakasalataki na U.S. Food and Drug Administration: “Ke o na sega ni yaco i vale ena loma ni rua na aua mai na gauna e vakarautaki mai kina na kakana, kua ni kauta i vale na vo ni kakana.” Ke vo na kakana, gole sara i vale ni o kana oti, lai maroroya ena katoniwaililiwa, vakabibi ke sivia na 32 na dikiri celsius na katakata ni draki.

Ke o muria e va na vakatutu e vakamacalataki ena ulutaga veitaravi e sa cavuti oti mai, ena taqomaki vinaka na kakana o kania.

[Kato/iYaloyalo ena tabana e 7]

VAKAVULICI LUVEMU: “Keirau vakavulici ratou na gone me ratou kua ni kania na kakana e rawa ni veivakaleqai.”—Noemi, Yatu Filipaini