E Taqomaki Vinaka na Kemu Kakana?

“Sogo e Dua na Koronivuli mai Jamani ni Tauvi Ira Eso na Gone na Mate na E. Coli.”—REUTERS NEWS SERVICE, JAMANI.

“Na Veitauvi ni Mate na Salmonella e Vakavuna me Kadre na Sorenitei Vou ena Lima na Yasana.”—USA TODAY.

“Laurai ena 9 na Yasana na Lewe ni 6 na Bulumakau Era Kania na Tolo ni Co Vuata Madu e Vagagai ena Benu ni Niukilia.”—THE MAINICHI DAILY NEWS, JAPANI.

QORI e tolu na leqa lelevu a yaco ena loma ni dua ga na gauna lekaleka. Era kaya na dauvakadidike nira tauvimate e veiyabaki e rauta na 30 na pasede ena vanua sa vakatorocaketaki ni vakaleqai ira na ka era kania.

Ena tarai iko vakacava eso na itukutuku va qori? E tukuna o Hoi e dua na tama mai Hong Kong: “Au lomaleqa qai rarawa sara ga. E rua na luvequ, au qai leqataka na sala kei na vanua e caka mai kina na kedrau kakana.”

Ena veivanua dravudravua, era mate e veiyabaki e vica vata na milioni na lewenivanua ena mate e vu mai na kakana kei na wai, qai levu ga vei ira na mate qori era gone. E tukuna o Bola e tiko mai Nigeria: “Na kakana era tu ena makete eke sa rova tu na lago, tauvi uca, liwavi cagi qai tauvi duka. Niu dau wilika se rogoca na mate e vu mai na kakana, au lomaleqa sara ga. Au via taqomaka noqu vuvale.”

Vakacava o rawa ni taqomaki ratou nomu vuvale mai na kakana e rawa ni veivakaleqai? E tukuna na Canadian Food Inspection Agency, ke laurai ena dua na sitoa na kakana e rawa ni veivakaleqai, ena kilai levu qai vakavuna eso tale na leqa. Ia na ka eda cakava kei na veika eda sega ni cakava ena noda valenikuro e rawa ni vakaleqa na kakana, qai vakadewa sara na mate.

Na cava o rawa ni cakava mo taqomaka kina nomu vuvale mai na mate e vakadewa na kakana? Eda na raica qo e va na sala o rawa ni taqomaka kina na kemu kakana.

[Kato ena tabana 3]

O CEI ERA RAWA NI VAKALEQAI?

Eso e rawa ni vakatauvimatetaki ira totolo na ka era kania, qori era wili kina na:

● Gone era yabaki lima lako sobu

● Yalewa bukete

● O ira era sa sivia na yabaki 70

● O ira e malumalumu na sotia ni yagodra me valuta na mate

Ke o dua vei ira na tukuni e cake se drau dau kana vata kei na dua e wili ena iwasewase qori, e dodonu mo qarauna na kakana o vakasaqara, kena vakarautaki, kei na kena o kania.

[Credit Line]

Vakarautaka: New South Wales Food Authority, Australia.