Vakamacalataka Nona Vakabauta e Dua na Vuniwai ni Ivi

Vakamacalataka mada nomu isususu.

Niu se yabaki ciwa, keitou toki mai Sipeni i Varanise. Erau Katolika na noqu itubutubu, ia niu yabaki 16 au sa sega ni qai vakabauta na Kalou. E sega tu ni dua na betena vei au na lotu. Ni so era tarogi au se rawa vakacava nida bula tu qo ke sega na Kalou, au na tukuna, “Era se sega ni vakamacalataka rawa ena gauna qo na saenitisi, era na qai kila ni toso na gauna.”

Na cava o vulica kina na mate ni ivi?

Au vuli vuniwai e Montpellier, mai Varanise. A vakamacalataka vei au e dua na parofesa meu lai cakacaka ena tabana ni veiqaravi e baleta na ivi e vakatokai na nephrology. E okati ena veiqaravi qori na vakadidike kei na nodra qaravi na tauvimate ni ivi. Qori sara ga na ka au vinakata tu meu cakava. Ena 1990, au vakaitavi ena vakadidike ena kena vakayagataki na wainimate na recombinant erythropoietin (EPO) me veiraurautaka na kena buli na sela damudamu ni dra ena uro e loma ni sui. Qori e se vakadidike vou ena gauna ya.

A veisau vakacava nomu rai me baleta na Kalou?

Ena 1979, a vuli iVolatabu na watiqu o Floréal kei ira na iVakadinadina i Jiova. Ia au sega ni taleitaka. Au sega ni taleitaka na lotu niu se gone. Ia e mani iVakadinadina i Jiova o watiqu kei rau na luvequ, sega ni dede sa levu tale ga neitou itokani era iVakadinadina. Dua vei ira qori o Patricia, a kerea meu saga mada meu masu. E tukuna: “Ke sega ni dua e tiko mai lomalagi, mo kua ni leqataka e dua na ka. Ia ke tiko dina e dua, o na qai raica na ka ena cakava.” Oti tale e vica na yabaki, au veinanuyaka se cava na inaki ni bula, sa qai votu vei au na ka a tukuna o Patricia. Au mani masu niu via kila na kena isau.

Na cava o via kila kina na inaki ni bula?

Na nodra vakacaca na batikadi ena World Trade Center mai Niu Yoka, au mani veinanuyaka se cava e levu kina na ca e yaco tu nikua. Au vakasamataka: ‘Na veileqaleqati ni lotu e vakavuna me leqataki na noda bula ena gauna se bera mai. Ia au maliwai ira na iVakadinadina i Jiova era veiyaloni, era sega ni bau vakavuna na tikoyavavala. Era muria na ka e tukuna na iVolatabu. De dua ena vinaka meu vulica mada na ka e tukuna.’ Au mani wilika sara na iVolatabu.

Ni o vuniwai, e dredre mo vakabauta ni dua na Dauveibuli?

Sega. Au dau qoroya na vakasakiti ni keda ibulibuli. Kena ivakaraitaki, sa bau veivakurabuitaki dina na sala e lewa vinaka kina na noda ivi na levu ni sela damudamu ena noda dra.

Na cava o tukuna kina qori?

Eda kila ni sela damudamu ni dra e dau kauta wavoki ina yago na cagi bulabula na okisijini (oxygen). Ke lailai na nomu dra, se o gole ena dua na vanua cecere, ena sega ni levu na cagi bulabula e yagomu. Ena kidava qori na sela ni noda ivi, sa qai bulia ena noda dra e vica vata na udolu na EPO. Na EPO qori sa na qai yavalata na uro ni sui me bulia e levu na sela damudamu ni dra, me rawa ni kauta wavoki e yagoda e levu na cagi bulabula. Sa bau vakatubuqoroqoro dina! Ia e taura e tini na yabaki noqu vulica tiko qori, au sa qai vakabauta ni Kalou duadua ga e vakavuna na cakacaka vakasakiti ni noda ivi.

Na cava nomu rai me baleta na iVolatabu?

E levu na itukutuku makawa kei na italanoa kilai levu au dau wilika, ia e duidui sara na ka e tukuna na iVolatabu. Na ivakasala yaga era tu kina e dusia ni vakarautaka e dua e uasivia na tamata. Au qoroya dina na ivakaraitaki i Jisu. Au vulica ni a bula dina o koya, e tiko tale ga na nona itokani qai kila vinaka na ivakarau ni bula ni tamata. Keu lomatarotarotaka eso na ka, au na lai vakadidike ena so na encyclopedia kei na so tale na ivola niu sega ni taleitaka na nodra ivola na iVakadinadina i Jiova.

Na cava eso na ulutaga o dikeva?

E levu na ulutaga au dikeva, ia au taleitaka na parofisai ena iVolatabu me baleta na yabaki a papitaiso kina o Jisu. E vakamatatataka sara ga na balavu ni gauna me tekivu mai na ika20 ni yabaki ni veiliutaki i Atakisekise na tui Perisia me yacova na gauna ena lumuti kina o Jisu me Mesaia.a Sa matau vei au na vakadidike ni okati qori ena noqu cakacaka. Au vakadidike ena so na ivola ni itukutuku makawa meu vakadeitaka na yabaki a veiliutaki kina o Atakisekise kei na yabaki ni nona cakacaka vakaitalatala o Jisu. Au sa qai raica ni donu vinaka na parofisai vakaivolatabu qori, e uqeta tale ga na Kalou na kena volai.