Cava Era Vakabauta Eso na Lotu?

Idu

ni rarawa e isau ni ka e cakava e dua ena gauna qo, se na gauna sa oti. E rawa ni mate qai sucu tale e dua (moksha), ke vakasamataka vakalevu na veika vakayalo.

Musulomani

ni rarawa e isau ni valavala ca, e vakatovolei tale ga kina na vakabauta. E kaya o Dr. Sayyid Syeed na peresitedi ni Soqosoqo ni Musulomani e Noca Amerika, nida sotava na rarawa e dodonu meda “vakavinavinakataka tiko ga nona veivakalougatataki na Kalou, kei na noda vukei ira na leqa tu.”

Jiu

ni rarawa e isau ni ka e cakava e dua. Era kaya eso na Jiu ni na yaco na veivakaturi, oti era na qai lewai o ira e sega nodra cala. Eso tale na Jiu era vakabauta na sucu tale, qori e soli kina vakavica vua e dua na gauna me vakaraitaka ni veivutunitaka nona cala.

Buda

ni na sotavi na rarawa e veigauna. Ena sucu vou tiko ga e dua me yacova na gauna ena oti kina nona itovo ca, rai cala, kei na nona gagadre ca. Ia ena oti na rarawa ni sa yalomatua, vuku qai cakacaka vakaukaua. E kilai qori me nirvana.

iVakavuvuli i Confucious

na levu ni rarawa e yaco tu nikua e vu mai nodra “lewa cala kei na nodra vakawelewele na tamata,” e tukuni qori ena Dictionary of Comparative Religion. Era vakavuvulitaka ni na rawa ni vakalailaitaki na rarawa ke vinaka na itovo ni tamata. Ena rawati qori ena nodra veivakamuai na ka bula vakayalo era kaukaua sara vei keda, ena vinakati kina meda vakamalumalumu ina nodra veidusimaki.

Dauqaravi ira na vuda

ni vakavuna na rarawa na vakatevoro. Era vakabauta tale ga nira rawa ni vakavuna na dauvakacuru na kalougata se rarawa, rawa tale ga ni vakalailaitaki na rarawa era vakavuna ena so na ivakarau ni qaravi tevoro. Kena ivakaraitaki, ke dua e tauvimate na wainimate se na ka era vakarautaka na dauvakadraunikau ena tarova nodra cakacaka eso tale na dauvakatevoro.

Lotu vaKarisito

ni vakavuna na rarawa nodrau ivalavala ca na imatai ni tamata me vaka e vakamacalataki ena ivola na Vakatekivu. Ia e levu na matalotu e vakavuvulitaka e levu tale na ka. Kena ivakaraitaki, era kaya eso na Katolika ni noda rarawa e rawa ni ‘cabori vua na Kalou’ me kerei vua me vakalougatataka na lotu, se me vakayagataka na rarawa qori me vakabula kina e dua tale.