Wase Rua na Matanitu

Ni qaravi Jiova tiko ga o Solomoni, era bula vakacegu na Isireli. Ia e vakawatitaka e levu na yalewa qaravi matakau mai na veivanua. E veisau vakamalua nona ivakarau me qaravi matakau tale ga. E cudru o Jiova, mani kaya vei Solomoni: ‘Ena kau tani mai na nomu vuvale na matanitu o Isireli, ena wase rua. Na kena e levu au na solia vua e dua nomu dauveiqaravi, ena qai lewa ga nomu vuvale na kena e lailai.’

E vakamatatataka tale o Jiova na lewa qori ena dua na sala. Ni taubale tiko e gaunisala o Jerepoami, na dauveiqaravi i Solomoni, rau sota kei na parofita o Eaija. E dresulaka nona isulu balavu na parofita me 12 na tikina qai kaya vei Jerepoami: ‘Ena kauta tani o Jiova na matanitu o Isireli mai na vuvale i Solomoni qai wasea rua. Taura e tini na tiki ni isulu ni o na lewa e tini na yavusa.’ Ni rogoca qori o Tui Solomoni, e vinakata sara ga me vakamatei Jerepoami! E mani dro i Ijipita o Jerepoami. Ni sa mate o Solomoni, e veiliutaki sara na luvena o Riopoami. E kila o Jerepoami ni sa rawa ni lesu i Isireli.

Era kaya vei Riopoami na qase ni Isireli: ‘Ke o liutaki ira vinaka na tamata, era na qaravi iko tiko ga.’ Ia era kaya vua eso nona itokani cauravou: ‘Me voravora nomu veiliutaki! Vakacakacakataki ira vakaukaua!’ E qai rogoci ira nona itokani. E voravora nona veiliutaki ra mani talaidredre vua. Era digitaki Jerepoami me liutaka na tini na yavusa, e kilai na yavusa qori me matanitu o Isireli. E kilai tale ga na rua na yavusa me matanitu o Juta, era yalodina tiko ga vei Riopoami. Sa mai wase rua tu na 12 na yavusa e Isireli.

A sega ni vinakata o Jerepoami mera lai sokalou na nona tamata i Jerusalemi ni veiliutaki kina o Riopoami. E leqataka nira na biuti koya mera tokoni Riopoami. E mani bulia e rua na luvenibulumakau koula qai kaya vei ira: ‘Sa rui yawa o Jerusalemi. Moni sokalou ga eke.’ Era qarava sara na luvenibulumakau koula, era guilecavi Jiova.