Vakasavasavataka na Valenisoro o Jisu

E LAURAI sara tu ga e ke na cudru i Jisu! O kila se cava e vuna? Baleta nira sa rui kocokoco na tamata era tiko ena valenisoro ni Kalou e Jerusalemi. Era via rawailavo mai vei ira na mai sokalou.

Raica mada na luve ni bulumakau, na sipi, kei na ruve! Era mai volitaki tiko na manumanu oqo ena valenisoro. O kila na vuna? Nira dau vakayagataka na Isireli me nodra isoro vua na Kalou.

E kaya na lawa ni Kalou ni o koya na Isireli e caka cala e dodonu me vakacabora e dua na isoro vua na Kalou qai tiko ga na gauna me dau vakacabori kina na isoro. Ia mera na kauta mai vei na veika me cabori vua na Kalou?

E so ga vei ira na Isireli e tu na nodra manumanu vuka kei na manumanu yavaiva, e sa rawa gona kina mera na cabora. Ia e levu era sega ni vakamanumanu, kei na so tale era tiko sara vakayawa mai Jerusalemi qai dredre tale ga nodra kauta mai na manumanu ina valenisoro. Era sa qai dau mai volia gona e ke na manumanu era vinakata. Ia era lawakitaki ni sa rui sau levu na manumanu qai sega tale ga ni dodonu mera mai volitaki tiko ena valenisoro ni Kalou.

Oqo na vuna e cudru kina o Jisu. Era qeqera na ilavo ni sa vakatoboicutaka na teveli. E cakava na kuita qai cemuri ira na manumanu mai na valenisoro. Sa qai vakaroti ira na volitaka tiko na ruve: ‘Kauti ira tani e ke! Kua ni cakava na vale i Tamaqu me vanua ni vaqara ilavo.’

Era kidroa e so na imuri i Jisu era a tiko vata kei koya ena valenisoro e Jerusalemi nira raica na veika e cakava. Era nanuma lesu kina na ka e kaya na iVolatabu me baleta na Luve ni Kalou: ‘E caudre me vaka na buka e yalona na nona lomana na Vale ni Kalou.’

A cakava e levu na cakamana o Jisu ni tiko voli e Jerusalemi ena soqo ni lakosivia. Oti oqori sa qai biuti Jutia me lesu i Kalili. Ena nona ilakolako oqori a lai cegu i Samaria. Meda raica mada se cava e yaco e kea.