iTalatala Vakatabakidua Era Liu Tiko ena Cakacaka Vakavunau

De a imatai sara ga ni iVakadinadina i Jiova me vosa vei iko e dua na italatala painia cakacaka vakatabakidua se daukaulotu. Nira sega ni saumi na iVakadinadina i Jiova ena nodra cakacaka vakaitalatala, de o taroga se rawa vakacava mera vakaitavi vakatabakidua ena cakacaka vakaitalatala.

Era italatala kece na iVakadinadina i Jiova yalayala papitaiso, ia e levu era vakavuvale, se tu e so tale nodra icolacola. O koya gona ena vica ga kina na aua nodra cakacaka vakaitalatala e veimacawa. Ia e vica na udolu na iVakadinadina e veiyasa i vuravura era sa vakarawarawataka na nodra ivakatagedegede ni bula me rawa nira bula kina ena isau era taura mai na cakacaka vagauna. Na kena inaki ga oya, mera vakaogai ira ena cakacaka vakaitalatala me 1,000 se sivia na aua ena dua na yabaki.

Io e dina, ni sega ni levu nodra ilavo na italatala painia era cakacaka vakatabakidua, ia e nodra nanuma ni oqo e dua na sala e rawa nira qara taumada tiko ga kina na Matanitu ni Kalou. Era kalougata sara kina vakalevu. Sa bau dua mada ga na ka totoka na nona vakamacalataka e dua na Vosa ni Kalou vei ira na tani ena 90 na aua se sivia e veivula. Na italatala e cakacaka vakatabakidua ena toroya cake tiko ga nona maqosa ena cakacaka vakaitalatala qai tu vua na gauna me lesuvi ira kina vakavinaka na tamata era tataleitaki. E veivakauqeti dina na veika vinaka e kune ni caka oqo. Era sega ni leqa ena ka mera bula kina vakayago, ra qai lomavakacegu ena ka e tu vei ira.​—Maciu 6:33.

E tauyavutaka na Watch Tower Society ena Feperueri ni 1943 na Watchtower Bible School of Gilead. Na kena inaki mera tuberi kina na italatala painia maqosa mera lai veiqaravi vakadaukaulotu ena veivanua tani. Na vuli vula lima e okati kina na kena vulici vakamatailalai na iVolatabu, vulici na itukutuku ni veika e volai ena iVolatabu, vulica na veika e baleta na isoqosoqo i Jiova, vaka kina na ulutaga veiganiti tale e so me baleta na vakavakarau ena veiqaravi ina vanua tani.

Na iSoqosoqo e sauma na nodra ilakolako na daukaulotu ina matanitu era lesi kina qai vakarautaka na kakana veiganiti kei na vanua ni vakacegu veirauti ena dua na itikotiko me baleti ira na daukaulotu. E solia tale ga vei ira na daukaulotu e dua na ilavo lailai mera volia kina na iyaya e so ena dui yaga vei ira. Era dau veivuketaka na daukaulotu na kena cicivaki na veika ena nodra itikotiko ena veika beka e baleta na volivoli, vakasaqa, kei na sasamaki. Ni bau veiganiti tu vaka oqo na nodra maroroi na daukaulotu, sa rawa kina nira vakayagataka e rauta ni 140 na aua e veivula ena cakacaka vakavunau e veivale kei na nodra tuberi ena iVolatabu na tamata tataleitaki.

Era lesi e levu vei ira na daukaulotu oqo ina vanua e vicavata na udolu na maile na kena yawa mai na nodra vanua kei na nodra vuvale. De vinakati mera veisautaki ira ina dua tale na ivakatagedegede ni bula kei na itovo ni bula, na kakana mera kania, na ivakarau ni draki, kei na kena vulici e dua tale na vosa vou. Era cakava tiko na cakacaka oqo baleta nira lomani ira na tani, ra qai gadreva dina mera vukei ira mera mai kila na Matanitu ni Kalou.

Sa 98 oti na kalasi ena koronivuli na Watchtower Bible School of Gilead mai na 1943 me yacova na 1994, ra qai vakarautaki kina e sivia na 6,500 na daukaulotu. Ena veidusimaki ni iSoqosoqo, era liutaka sara ga o ira oqo na tete ni veivakavulici ena iVolatabu e Aferika taucoko, Amerika e Loma kei Sauca Amerika, mai Esia, kei na Ceva ni Pasifika, ra qai katoa tale ga e Urope.

Se ra veiqaravi vakapainia se vakadaukaulotu na iVakadinadina i Jiova, se vakaitavi ga vagauna ena cakacaka vakaitalatala, era sega ga ni cakava oqori mera rawa ilavo mai kina. Era vakayagataka na nodra gauna vakataki ira kei na nodra ilavo, kei na nodra igu, mera vukei ira na tani mera vulica na ka ena vakamuai ira ina bula tawamudu.​—Joni 17:3.

• Era veiqaravi vakatabakidua vakacava e so na iVakadinadina i Jiova ena cakacaka vakaitalatala, na cava era vakayacora kina oqo?

• Era tuberi vakacava na italatala ina cakacaka vakadaukaulotu?

• Era tokoni vakacava na daukaulotu ena nodra ilesilesi ina veivanua tani?

[iYaloyalo ena tabana e 22]

iMawi: Valenivuli ni Koronivuli o Kiliati, Brooklyn, N.Y., U.S.A.

iMatau: Veituberi tiko ena Vosa ni Kalou na daukaulotu e Papua Niu Kini

[iYaloyalo ena tabana e 23]

iTalatala painia kei na daukaulotu era vunautaka tiko na Vosa ni Kalou ena dui matanitu

Brazil

Dominican Republic

Sipeni

Sierra Leone, Aferika