iTalanoa ni Nona Bula

Moica Noqu Bula na Veivakatisaipelitaki

TALANOATAKA O LYNETTE PETERS

Era gole mai na sotia mera vueti keimami. E lai tu mai e dua na dauvana e delanivale. Era davodavo tu na sotia e veico kei na nodra dakai. Ni keimami cici ina elikoputa e waraki keimami tu ena mataka ni Sigatabu oya, keimami saga na daukaulotu me keimami yalovakacegu ni sa tubu cake na elikoputa. Ni oti ga e tini na miniti, keimami sa vakasoburi ena manua ni mataivalu e kele volekata toka na baravi.

KEIMAMI rogoca ena siga e tarava nira bomutaka na batikadi ena bogi keimami vueti kina na otela keimami lai wawa toka kina. E tini sara ena veivaluvaluti na tiko yavavala a vakilai tiko e Sierra Leone. E tukuni vakasauri vei keimami na lako mai vanuatani me keimami sa vagalala. Meu vakamacalataka na noqu lai tu ena vanua oya, au na lesu sara tale ina gauna au se qai tubucake tiko kina.

Au sucu mai British Guiana, sa veisau na yacana me Guyana me tekivu mai na 1966. Au mamarau qai sega ni bau kauaitaka e dua na ka ena gauna au se gone kina ena veiyabaki ni 1950. Era kauaitaka vakalevu na vuli na itubutubu ena gauna oya ra qai namaki na gone me vinaka na ivakatagedegede ni nodra vuli. Au se nanuma tiko nona tarogi tamaqu e dua e cakacaka ena baqe, “Na cava o rui vakayagataka kina vakalevu na ilavo ena nodra icurucuru ni vuli na luvemu?” E sauma o tamaqu, “Era na rawaka kevaka era vuli vinaka.” E nanuma o tamaqu ni rawati ga na ivakatagedegede ni vuli vinaka ena koronivuli rogo. Ia e qai veisau na nona rai.

E tekivu vulica na iVolatabu kei ira na iVakadinadina i Jiova o tinaqu ena gauna au se qai yabaki 11 kina. Rau a lako kei na dua na marama keitou tiko veitikivi ina Kingdom Hall. Na veika erau rogoca ena bogi oya e vakadeitaka vei rau ni rau sa kunea na ka dina. E talanoataka o tinaqu vua e dua tale na marama keitou tiko veitikivi na veika erau rogoca oya. Sega ni dede eratou sa vuli iVolatabu tolutolu kei rau na daukaulotu o Daphne Harry (qai veisau na ikarua ni yacana me Baird) kei Rose Cuffie. Ena loma ga ni yabaki oya eratou sa papitaiso o tinaqu kei na nona itokani e rua. Ni oti e lima na yabaki, sa biuta na lotu Kavitu o tamaqu ni sa papitaiso me iVakadinadina i Jiova.

Keitou lewe tini na veitacini. Ni keitou se gone keitou dau lako vakalevu o keitou na tolu na qase ina nodrau vale na daukaulotu o Daphne kei Rose. Keitou dau lai rogoca kina na nodrau talanoataka na nodrau cakacaka vakavunau. Erau marautaka dina na nodrau vukei ira e so mera kaukaua vakayalo. Na nodrau ivakaraitaki oya e uqeti au meu gadreva na cakacaka vakaulotu.

Na cava e vukei au meu taleitaka tiko ga na cakacaka vakavunau me noqu cakacaka tudei, nira sasagataka na cakacaka saumi na wekaqu kei ira na noqu icaba e koronivuli? Ke a levu sara na cakacaka au rawa ni vulica, ke a rawa meu vuli loya, daunisere se vakatagi, vuli vuniwai, kei na levu tale na cakacaka. E uqeti au na nodrau ivakaraitaki vinaka na noqu itubutubu. Erau bulataka na ka dina, rau vulica vagumatua na iVolatabu, rau qai dau vakaogai rau vakalevu ena nodra vukei e so tale mera vulici Jiova.a Rau dau sureti ira vakalevu mai na painia i vale. Na nodra mamarau kei na nodra lomavakacegu na tacida oqo e vakavuna me tekivu moica na noqu bula na veivakatisaipelitaki.

Au papitaiso niu yabaki 15. Au tekivu painia ena gauna au vakacavara kina na noqu vuli ena sekeneri. O Philomena, a cakacaka tiko e valenibula, e imatai ni tamata meu vukea me yalayala qai papitaiso. Sa qai vaqaqacotaka ga na noqu lalawa meu painia na noqu raica na levu ni nona lomani Jiova. Sega ni dede sa soli vei au e dua na cakacaka saumi vinaka cake, au vunivola tiko ena gauna oya. Au sega ni taura na cakacaka oya baleta niu via tomana tiko ga na noqu cakacaka vakapainia.

Niu se tiko ga e vale, era se veisiko tiko ga mai na daukaulotu. Au dau taleitaka dina na nodra talanoataka na veika era sotava! Au taleitaka vakalevu na cakacaka vakaulotu, ia au vakila ni na dredre meu lesi meu kaulotu. Ena gauna oya, me vaka ena gauna oqo, era se lesi tiko mai Guyana na daukaulotu. Au kurabui dina au qai marautaka tale ga na noqu sureti ena 1969 meu lai vuli ena Watchtower Bible School of Gilead, e Brooklyn, Niu Yoka.

Na iLesilesi Au Sega ni Namaka

Keimami lewe 54 na gonevuli mai na 21 na vanua keimami vuli ena ika48 ni kalasi e Gilead. Keimami lewe 17 na goneyalewa. Dina ga ni sa oti oqo e 37 na yabaki, e dredre noqu guilecava na lima na vula keimami vuli kina. E levu sara na ka e vulici, keimami sega wale ga ni vulica na iVolatabu, ia keimami vakasalataki tale ga ena ivakarau ni bula vakadaukaulotu. Me kena ivakaraitaki, au vulica meu muria na veidusimaki, me veiraurau na ivalavala ni noqu sauni au, meu vosota tale ga ke mani dredre na veika e sotavi.

Rau dau tataunaka tu ga na noqu itubutubu na bibi ni tiko wasoma ena soqoni. Ke dua vei keitou e tauvimate me sega ni lako ina soqoni ena Sigatabu, ena sega ni rawa ni sa bula me tiko ena dua na soqo ni rogo ivakatagi se sara vakatasuasua ena bogi ni siga e tarava. Ia, au sega ni lakova kece na soqoni ena gauna au vuli tiko kina e Gilead. Ena dua na bogi ni Vakaraubuka, au tovolea meu vakaraitaka vei rau o Don kei Dolores Adams, na veiwatini erau dau kauti au ina soqoni, ni rui levu na veika e vinakati meu vulica ena bogi oya kei na noqu vola ripote. Ena rawa vakacava meu tiko ena Koronivuli ni Vuli Vunau kei na Soqoni ni Cakacaka ena bogi oya? Ni oti na nona vosa vakalekaleka vei au, e kaya o Brother Adams: “Me qai dusimaki iko nomu lewaeloma.” Au mani lako ina soqoni ena bogi oya kei na veibogi kece ni soqoni niu ciqoma na nona ivakasala. Au sega tale ni vakatara e dua na ka me tarova na noqu lako ina soqoni vakavo ga ke dua na leqa bibi e yacovi au.

Ni sa vakacagau tiko na vuli keimami veitalanoataka sara vakalevu na vanua keimami na rairai lesi kina. Au nanuma voli niu na lesi ga i Guyana baleta ni se gadrevi tiko kina vakalevu na cakacaka vakavunau. Vakasamataka na noqu kurabui ena kena vakaraitaki vei au niu na sega ni lesu i noqu vanua. Ia, au sa lesi i Sierra Leone, ena Ra kei Aferika. Au vakavinavinakataka vei Jiova ni sa yaco na noqu gagadre meu lai kaulotu ena dua na vanua e yawa mai vale!

Levu na Ka Au Vulica

E “totoka vakaoti” na irairai kei Sierra Leone ena imatai ni gauna au raica kina, e totoka na kena veidelana kei na ulunivanua, na kena toba kei na kena baravi. Ia, na totoka dina ni vanua ena Ra kei Aferika oqo e laurai vei ira na vakaitikotiko kina baleta nira vakila sara ga na vulagi na nodra dau loloma kei na nodra yalovinaka na lewenivanua. Oqo e vukei keimami na daukaulotu vou me keimami kua ni vakanananu ina neimami vanua. Era dau marautaka na kai Sierra Leone mera vakamacalataka na nodra itovo vakavanua kei na nodra vukei ira na vulagi mera kila na kena vosa na Krio.

E levu sara na nodra ivosavosa na vosataka na Krio. Me kena ivakaraitaki, era dau kaya: E cakacaka na maqe e kana na maqe levu, e kena ibalebale ni na sega ni tamusuka ga na ka e tea o koya e teitei. Oqo e vakamacalataka na veivakalolomataki e vakilai levu tu e vuravura!​—Aisea 65:22.

Au marautaka tiko ga na cakacaka vakavunau kei na veivakatisaipelitaki. E tu tu yadua na tamata e sega ni taleitaka na iVolatabu. O ira na daukaulotu kei ira na tacida sa dede na nodra qaravi Jiova voli mai era vukei ira e levu na gone kei na qase e duidui na ivakatagedegede ni nodra bula mera muria na ka dina.

O Erla St. Hill, na imatai ni daukaulotu keirau veisa, e daucakacaka kaukaua. Na nona gumatua ena nona qarava na neimami vale na daukaulotu e voleka ni vaka ga na nona gugumatua ena cakacaka vakavunau. E vukei au meu kila na bibi ni ka e caka, me vaka na veikilai kei ira eda vakaitikotiko vata, nodra sikovi na iVakadinadina era tauvimate kei ira era tataleitaki, kei na veivuke ena veika e caka ena gauna ni veibulu. E vakabibitaka tale ga meu dau saga meu lai vosa vei ira na tacida era tiko ena yalava ni cakacaka vakavunau, ke mani vakalekaleka mada ga. Oqo e vukea me levu sara na tinaqu, ganequ, taciqu, kei na noqu itokani. E vukei au tale ga meu raica na veivanua au lesi kina me vaka e noqu vanua.​—Marika 10:​29, 30.

Au volekati ira tale ga na daukaulotu keimami cakacaka vata. E okati kina o Adna Byrd keirau dau rumu vata, e kaulotu voli e Sierra Leone mai na 1978 ina 1981, kei Cheryl Ferguson, keirau sa rumu vata tiko mai ena loma ni 24 na yabaki.

Veivakatovolei na Nodra Vala na Lewenivanua

Ena 1997, ni oti ga e dua na vula na kena vakatabui na valenitabana vou e Sierra Leone, sa tukuni vei keimami me keimami vagalala, me vaka au sa talanoataka. Ni se vo e ono na yabaki mai na gauna oya, e dua na ka na neimami vakasakita na nodra vakabauta na iVakadinadina e Liberia era drotaka mai na veivaluvaluti qai sega ni dua na ka era kauta mai i Sierra Leone. Dina ga ni dredre sara na bula era mai sotava, ia era vakaitavi ena cakacaka vakavunau e veisiga. E tarai keimami na nodra lomani Jiova kei ira na lewenivanua.

Keimami vakatotomuri ira na tacida mai Liberia ni keimami sa lai isenivalu ena vanua o Guinea. Keimami vakaliuca tiko ga na Matanitu ni Kalou qai vakararavi tiko ga vei Jiova. Keimami suka i Sierra Leone ni oti e dua na yabaki, ia e kacabote tale na veivaluvaluti ena loma ni vitu na vula e tarava. Keimami se baci kau tale i Guinea.

E tukuni vei keimami ni dua na ito era veivaluvaluti tiko era sa mai tiko ena neimami vale na daukaulotu e Kissy, sa butakoci se vakarusai na neimami iyaya kece. Keimami sega ni yalolailai baleta ni keimami marautaka ga ni keimami se bula tiko. Sa vica wale sara na iyaya keimami taukena, ia keimami lomavakacegu ga.

Ni oti na ikarua ni neimami kau i Guinea, keirau sa tu laivi mai na vanua oya kei Cheryl, o koya keirau dau rumu vata. E gadrevi meu sa vulica na vosa vakaVaranise. So vei keimami na daukaulotu e totolo na nodra vakayagataka na vosa vakaVaranise era tekivu vulica, era sega ni kauaitaka na nodra vakarorogotaka cala na vosa. Ia au sega ni taleitaka meu vakayagataka na vosa vakaVaranise baleta niu se sega ni vakarorogotaka vinaka na vosa, au vosataka ga ena gauna e gadrevi kina. E vakararawataki au dina. Au dau vakasamataka e veisiga na vu ni noqu tiko e Guinea, oya meu vukei ira e so tale mera kilai Jiova.

E toso vakamalua na noqu kila na vosa niu sa tekivu vulica, vakarogoci ira era vosataka vinaka, au qai kerei ira na gone ena ivavakoso mera vukei au baleta nira dau doudou na vosa. Au marautaka e dua na isolisoli ni isoqosoqo i Jiova. Me tekivu mai na Sepiteba 2001, sa dau vakaturi mai ena Noda Cakacaka Vakaitalatala na icakacaka ni kena soli na ivoladraudrau, na ivola dabani, kei na brochure vei ira e duidui na nodra vakabauta vakalotu. Au sa doudou cake sara ena cakacaka vakavunau ena gauna oqo dina ga ni se sega ni taladrodro vinaka sara noqu vosa me vaka niu vakayagataka na vosa ni noqu vanua.

E veivuke na noqu susugi ena dua na vuvale levu na noqu bula vata kei ira na le levu, dua na gauna keimami lewe 17 sara. Ena loma ni 37 na yabaki au kaulotu voli kina, sa sivia na 100 na daukaulotu keimami bula vata. Au marautaka dina na noqu bula vata kei ira na lewe levu oya. Dina ga ni duidui na neimami ivakarau se yalo i keimami, ia e duabau ga na ka keimami saga tiko. Au marautaka dina na noqu cakacaka vata kei na Kalou, meu vakaitavi tale ga ena nodra vakayarayarataki mai na tamata mera vakabauta na veika dina mai na iVolatabu!​—1 Korinica 3:9.

Ena gauna ni noqu kaulotu au sega ni dau tiko ena levu na soqo era cakava na noqu vuvale me vaka na nodra vakamau e vica na taciqu. Au sega tale ga ni dau raici ira vakalevu na vugoqu. Oya e vica na ka au calata, ratou calata tale ga na noqu vuvale baleta ni ratou uqeti au tiko ga meu tomana tiko na noqu kaulotu.

Au dau marautaka ena so na gauna ena noqu cakacaka vakaulotu e so na ka au calata ena noqu vanua. Dina au digitaka meu kua ni vakawati, ia era tu na luvequ vakayalo, sega ni o ira ga au vakavulici ira ena iVolatabu, ia o ira tale ga au volekati ira. Kuria oqori na noqu raica nira tubucake na luvedra, ra vakawati, ra qai tuberi ira tale ga na luvedra ena dina. Me vakataki au, e so vei ira era laiva na veivakatisaipelitaki me moica na nodra bula.

[iVakamacala e ra]

[Mape ena tabana e 15]

(Raica tale na ivola)

Au lesi i Sierra Leone, ena Ra kei Aferika

GUINEA

SIERRA LEONE

[iYaloyalo ena tabana e 13]

O rau na taciqu keitou dau marautaka na sikovi rau na daukaulotu ena veiyabaki ni 1950

[iYaloyalo ena tabana e 14]

O keimami na vuli vata ena ika48 ni kalasi e Gilead

[iYaloyalo ena tabana e 16]

Vakatabui ni valenitabana vou mai Sierra Leone