Vakacacani ena Vuku ni iValavala Dodonu

De o rogoca nira tukuna tiko na nomu itokani kei na wekamu nira dau beca na lawa na iVakadinadina i Jiova, ni so na matanitu e vakatabuya nodra cakacaka, se nira tamata dauvakatubu ca ga. Na cava e vaka kina oqo na kedra irogorogo?

E sega ni baleta nira beca na lawa na iVakadinadina i Jiova, baleta ga nira muria na we ni yava i Jisu. E kaya o Jisu vei ira nona tisaipeli nira na vakasewasewani, vakacacani, ra qai vosa vakacacataki ena ka kece ga e lasu. E vu ga oqo baleta ni kalou tiko ni vuravura na dauveivorati levu duadua ni Kalou, o Setani, e nona gagadre me vakamua cala na tamata mera kua ni qarava na Kalou.​—Maciu 5:10-12; 10:16-22, 34-39; 24:9, 10; Joni 15:17–16:3; 2 Timoci 3:12; 1 Pita 5:8; Vakatakila 12:17.

Na vu ni nodra vesu kei na nodra veilewaitaki na yapositolo, e sega ni baleta nira daubasulawa, nira tamata itovo voravora, se dauvakacaca. E baleta ga nira vunautaka voli na itukutuku vinaka. Ni kerea na yapositolo o Paula me rogoci tale nona kisi ena mataveilewai levu, e vuna ni a vinakata me totaka, me vakadinadinataka na nodra dodonu na lotu Vakarisito mera vunautaka na itukutuku vinaka.​—Cakacaka 4:18-20; 5:28-32; Filipai 1:7.

Era lotu Vakarisito dau muria na lawa na iVakadinadina i Jiova edaidai, era dau saumi ivakacavacava ra qai dokai ira na veiliutaki tiko ena matanitu. Era sauma vei Sisa na ka sa nei Sisa, vua na Kalou na ka sa nona na Kalou. Ke yaco na veicoqacoqa ena so na gauna kei ira na veiliutaki vakamatanitu, e vu ga baleta nira sega ni via vakadonuya na nodra cakacaka vakavunau na matanitu, se nira tawaveitovaki ena veika era veiqati kina na veimatanitu. Ena tikina gona oqo, era na muria kina na iVakadinadina i Jiova na ka vata ga era vakayacora na yapositolo, ena nodra kaya: “Sa kilikili kei keitou me keitou talairawarawa vua na Kalou, me kakua ga vei ira na tamata.”​—Cakacaka 5:29; Marika 12:17; Joni 18:36; Taito 3:1, 2.

Era sega ni dau qara na iVakadinadina i Jiova mera vakacacani, nira vinakata ga mera bula vakacegu, me malumu tale ga na ivakarau ni nodra bula. Ia ke ra sa mani vakacacani baleta nira muria na lawa ni Kalou kei na ivakaraitaki i Jisu Karisito, e ka ni marau vei ira mera vosota.​—Maciu 5:10-12; Cakacaka 5:40, 41; 1 Korinica 4:12; 1 Timoci 2:2; 1 Pita 3:14, 15; 4:12-16.

• Na cava era dau vakasewasewani ra qai vakacacani kina na tamata i Jiova?

• Na cava e dau veicoqacoqa kina ena so na gauna na ka era cakava na iVakadinadina i Jiova kei na ka era vinakata na veiliutaki ena matanitu?

• Era dau raica vakacava na veivakacacani na tamata i Jiova?

[iYaloyalo ena tabana e 29]

A kau yani o Jisu vei Pailato, e vesu o Paula, ni rau vunautaka na Matanitu ni Kalou