Wase e 5
Sucu i Jisu—E Vei kei na Gauna Cava?
E SOLIA e dua na i vakaro ko Sisa Akusito, na emapara ni Matanitu ko Roma, me ra dui lesu na tamata yadua me ra volai ena koro era dui sucu kina. Sa qai lako yani ko Josefa ki na koro levu ko Peceliema, na vanua e sucu kina.
Era osoti Peceliema yani e lewe vuqa me volai kina na yacadra, ia na vanua galala duadua ga e rau kunea ko Josefa kei Meri me rau vakaicili kina na vanua ni vakana manumanu. Na vanua oqo era maroroi voli kina na asa kei na manumanu yavai va, e mai sucu kina ko Jisu. Sa qai viviraki koya ena i sulu ko Meri ka vakadavora ena nodra i kanakana na manumanu.
Io, ena veivakamuai ga ni Kalou a vakarota kina ko Sisa Akusito me caka na vola yaca. E mai sucu rawa kina oqo ko Jisu e Peceliema, na koro e tukuna makawa na i Vola Tabu me sucu kina na i liuliu yalataki.
Sa bogi bibi dina oqo! Mai na vanua veico e serau vakavolivoliti iratou na i vakatawanisipi e dua na rarama levu. E sa i koya na lagilagi i Jiova! Ia sa qai tukuna vei iratou na agilosi i Jiova: “Dou kakua ni rere; raica, au sa kauta mai vei kemudou e dua nai tukutuku vinaka mo dou reki vakalevu kina, kei ira kecega na tamata. Ni sa sucu vei kemudou e na siga oqo, e na koro i Tevita, nai Vakabula, ko koya na Karisito na Turaga. Ia oqo na kenai vakatakilakila vei kemudou: Dou na kunea na gone sa viviraki vua nai sulu ni gone, a sa davo e na nodra tikina na manumanu.” Vakasauri na nodra rairai tale mai e lewe vuqa na agilosi era seretaka: “Sa nona na Kalou na lagilagi e na veiyasana cecere sara, ka sa veisaututaki rawa e vuravura ko ira sa vinakata ko koya.”
Ni ra lesu tale na agilosi, eratou sa qai veitukutukunitaka na i vakatawanisipi: “Me datou mai lako ki Peceliema, me raica na ka oqo sa yaco, o koya sa vakatakila rawa vei kedatou ko Jiova.” Eratou sa qai lako vakusakusa yani ka kunei Jisu ena vanua a tukuna na agilosi. Ni ratou vakasavuya na veika a tukuna vei iratou na agilosi, era sa kurabui o ira kecega sa rogoca na veika oqo. Ia ko Meri sa maroroya na vosa kecega oqo ena lomana.
Era vakabauta e lewe vuqa edaidai ni a sucu ena Tiseba 25 ko Jisu. Ia na vula i ucauca na Tiseba, e draki liliwa mai Peceliema. Ena sega ni rawa me ra tu voli e tuba na i vakatawanisipi ena loma ni bogi kei na nodra qelenisipi me donuya na gauna oqori ni yabaki. E vakatalega kina na Sisa ni Roma ena sega ni vinakati ira na tamata me laki volai na yacadra ena vula i liliwa taratarasui oqori ni sa lomadra rawa tu mada ga me ra talaidredre ka vorati koya. E kena i rairai ni sucu ko Jisu ena i tekivu ni vula i kelikeli. Luke 2:1-20; Maika 5:2.
▪ Na cava e rau lako kina ki Peceliema ko Josefa kei Meri?
▪ Na ka veivakurabuitaki cava e yaco ena bogi sa sucu kina ko Jisu?
▪ Eda kila vakacava ni sega ni sucu ena Tiseba 25 ko Jisu?