WASE 5
Vanua Kei na Gauna e Sucu Kina o Jisu
SUCU O JISU E PECELIEMA
SIKOVI JISU NA IVAKATAWA
E vakarota na empara ni Matanitu o Roma o Sisa Akusito, mera lai volayaca kece na lewenivanua. Erau na lako gona o Josefa kei Meri ina korolevu o Peceliema ena ceva kei Jerusalemi, na vanua e sucu kina o Josefa.
Era osoti Peceliema yani e levu mera lai volayaca. Na icili duadua ga rau kunea o Josefa kei Meri na valenimanumanu, era maroroi tu kina na asa kei na manumanu tale eso. E sucu e keri o Jisu. E viviraki koya ena isulu o Meri qai vakadavora ena nodra ikanakana na manumanu.
A rairai dusimaki Sisa Akusito na Kalou me caka na volayaca me rawa ni sucu o Jisu e Peceliema, na koro nei tukana o Tui Tevita. Sa parofisaitaki makawa tu mai ena iVolatabu ni na sucu ena korolevu qori na iLiuliu yalataki.—Maika 5:2.
E bogi bibi dina qo! E serau vakavolivoliti ratou na ivakatawanisipi ena vanua veico e dua na rarama levu. Qori na lagilagi i Jiova! E tukuna vei ratou e dua na agilosi ni Kalou: “Dou kua ni rere. Raica! Au vakarogoya vei kemudou na itukutuku vinaka era na marautaka vakalevu na tamata kece. Ni sa sucu nikua na nomuni ivakabula o Karisito na Turaga, ena koro i Tevita. Qo na kena ivakatakilakila vei kemudou: Dou na raica e dua na gone dramidrami ni ovici tu ena tikitikinisulu qai davo koto ena ikanakana ni manumanu.” Era rairai tale mai vakasauri e levu na agilosi ra qai kaya: “Me vakalagilagi na Kalou mai lomalagi, ia e vuravura, mera vakacegu o ira e vakadonuya na Kalou.”—Luke 2:10-14.
Nira biubiu na agilosi, eratou veitukutukunitaka na ivakatawanisipi: “Vakacava me datou sa lako sara ga qo i Peceliema me datou lai raica na ka e yaco, me vaka e vakaraitaka vei kedatou o Jiova.” (Luke 2:15) Eratou vakusakusa yani qai raica na gone sucuvou o Jisu ena vanua a tukuna na agilosi. Ni ratou vakasavuya na veika a tukuna vei iratou na agilosi, era qoroqoro kece o ira na rogoca. E katona na vosa kece ya o Meri qai veinanuyaka e lomana na kena ibalebale.
Era vakabauta e levu nikua ni a sucu ena ika25 ni Tiseba o Jisu. Ia na Tiseba e vulaiuca qai draki liliwa e Peceliema. E dau lutu mada ga na ucacevata ena so na gauna. Era na sega ni rawa ni tu e tautuba ena bogi na ivakatawanisipi kei na nodra qelenisipi ena gauna qori. Ni sa lomadra tiko na lewenivanua mera vorata na empara ni Roma, ena rairai sega kina ni vinakata mera lako tu me vica na siga mera lai volayaca ena vulaililiwa. A rairai sucu gona o Jisu ena Okotova.