Wase e 65

Na iLakolako Vakavuni ki Jerusalemi

SA VULA i kelikeli oqo ni 32 S.K., sa toro voleka mai na Solevu ni Vale Vakacevaceva. E yalana tikoga e Kalili ko Jisu na nona cakacaka me tekivu mai na Lakosivia ni 31 S.K., ena nodra saga na Jiu me ra vakamatei koya. E rairai tekivu mai na gauna o ya e sikovi Jerusalemi ga ko Jisu me tikova na tolu nodra solevu vakayabaki na Jiu.

Eratou uqeti Jisu oqo na tacina: “Lako tani e ke, ka lako ki Jutia.” Na koro turaga kei Jutia ko Jerusalemi ka i tikotiko liu ni sokalou ena vanua taucoko. Eratou kaya na tacina: “Ni sega ni dua e dau cakava vuni tu ga na ka, kevaka e gadreva tiko me kilai.”

E dina ga ni ko iratou ko Jemesa, Saimoni, Josese, kei Juta, eratou sega ni vakabauta ni Mesaia dina ko Jisu na tuakadratou, ia eratou vinakati koya ga me vakaraitaka na nona kaukauwa ni cakamana vei ira era soqo vata mai ena solevu. Sa kila rawa ko Jisu na rerevaki ni ka ena rawa ni sotava. E kaya o koya: “Era sega ni cati kemudou rawa na lewe i vuravura, ia era cati au ga ni’u sa vakatakila tiko ni sa ca na nodra i valavala.” Sa qai kaya ko Jisu vei iratou na tacina: “Dou lako cake ki na solevu oqo; au sa bera ni lako cake ki na solevu oqo.”

E dauvitu na siga me vakacevucevutaki kina na Solevu ni Vale Vakacevaceva. E dau mai tinia e so na ogaoga tabu ena i kawalu ni siga. E vakatakilakilataka na solevu ni sa mai cava na yabaki ni teitei ka gauna rekitaki vakalevu kei na vakavinavinaka. Ni sa oti e vica na siga na nodratou salavata kei na matailakolako levu na taci i Jisu, me ratou laki tikova oqo, sa qai lako vakavuni yani o koya kei ira na nona tisaipeli, me ra kakua ni laurai levu kina. Era muria na sala ka takosovi Samaria, ka sega ni ra muria na sala era lakova na lewe vuqa ka koto volekata na Uciwai na Joritani.

Me vaka ni na gadreva ko Jisu kei ira na nona i lawalawa na i cili ena dua na koro mai Samaria, sa qai tala e so na mata me liu me ratou laki vakarautaka. Ia, era cata ni bau cakava vei Jisu e dua na ka na lewe ni koro ni ra sa kila ni sa lako tiko ki Jerusalemi. E rau cudru kina ko Jemesa kei Joni, ka rau taroga: “Turaga, ko ni vinakata me keirau kaciva na buka waqa me lako sobu mai lomalagi me vakamai ira?” Sa qai vunauci rau ko Jisu ena ka e rau vakatura, ka ra lako yani ki na dua tale na koro.

Ni ra lako voli e sala, sa kaya vei Jisu e dua na vunivola: “Na i Vakavuvuli, au na muri kemuni ki na veivanua kece ga ko ni na lako kina.”

E sauma yani ko Jisu: “Era vaqara na fokisi ka ra vakasova na manumanu vuka, ia na Luve ni Tamata ga e sega na vanua me kotora kina na uluna.” E vakamacalataka kina ko Jisu ni na sotava na veika dredre na vunivola ke mai yaco me Nona i muri. Ia na kena i rairai ni rui qaciqacia na vunivola me ciqoma na i vakarau ni bula oqo.

E kaya ko Jisu vua e dua tale na tamata: “Muri au.”

“Me’u lako mada, ka buluti tamaqu rawa,” e sauma yani na tamata.

E sauma ko Jisu: “Laivi ira na mate me ra buluta na nodra mate, ia ko iko mo lako ga ka vunautaka na matanitu ni Kalou.” E kena i rairai ni se bera ni mate na tamana, ke sa mate, ena sega ni rawa vei luvena me tiko ka vakarogoci Jisu e kea. E rairai a kerea na luvena na gauna me laki waraka kina na mate i tamana. E sega ni tu vakarau me vakaliuca na Matanitu ni Kalou ena nona bula.

Ni sa toso tiko na i lakolako vaka ki Jerusalemi, sa qai kaya tale e dua na tagane vei Jisu: “Au na muri kemuni Turaga, ia me’u la’ki veitatau mada kei iratou mai neitou.”

Sa qai sauma ko Jisu: “E sega ni dua sa taura na i siviyara ka qai rai tale tiko ki muri me veiganiti kei na matanitu ni Kalou.” O ira me ra tisaipeli i Jisu e sa dodonu me ra raica matua tiko na cakacaka ni Matanitu. Me vaka ni na veve na we ni siviyara ke sega ni rai vakadodonu tiko ki liu o koya na dausiviyara, sa vakakina o koya ena rai ki muri ki na i vakarau ni veika makawa oqo ena rawa ni sikalutu mai na sala sa basika ki na bula tawamudu. Joni 7:2-10; Luke 9:51-62; Maciu 8:19-22.

▪ O cei o iratou na taci Jisu, ia na cava mada na lomadratou me baleti koya?

▪ Ena vuku ni cava era rui i tovo vakaisi kina na kai Samaria, ia na cava e rau via cakava ko Jemesa kei Joni?

▪ Na cava e tolu na veivosaki e vakayacora e sala ko Jisu, ia e vakabibitaka vakacava ni vinakati me cabori koya e dua?