Wase e 67

Guce Nodra Via Vesuki Koya

NI SE vakacagau tiko na Solevu ni Vale Vakacevaceva, sa ra qai talai ira yani na ovisa na i liuliu vakalotu me ra vesuki Jisu. E sega ni bau via vuni. E veivakatavulici tikoga ena matana levu ko Jisu ka kaya: “Au na tiko vakalailai wale tale ga kei kemuni, ka’u sa na qai lako vua ka a talai au mai. Ko ni na vakasaqarai au, ka na sega ni kunei au, baleta ni ko ni na sega ni rawa ni lako ki na vanua au na tiko kina.”

Era sega ni kila rawa na Jiu, sa ra qai veikayaka kina vakai ira: “Ena lako beka kivei ko koya, me da sega kina ni kunei koya? ena lako beka vei ira na duiveiseyaki vei ira na kai Kirisi, ka vakavulici ira na kai Kirisi? A cava beka na i balebale ni nona kaya, Dou na vakasaqarai au ka sega ni kunei au; na vanua tale ga au na tiko kina dou na sega ni lako rawa kina?” Io, ko Jisu e a vosa tiko me baleta na roro mai ni nona mate kei na nona vakaturi ki na bula vakalomalagi, na vanua era na sega ni lako rawa kina na nona meca.

Sa qai yaco mai na i kavitu ka i otioti ni siga ni solevu. Ena veimataka yadua ni siga ni solevu, e dausova o koya na bete na wai e kauta mai na i silisili ko Sailoama, sa qai drodrova yani na yavu ni i cabocabo ni i soro. Ni rairai vakalesuya ki na nodra vakasama na cakacaka vakalotu oqo ni siga yadua, sa qai kainaka ko Jisu: “Kevaka sa via gunu e dua na tamata, me lako mai vei au, ka gunu! Ko koya sa vakabauti au, me vaka e kaya na i Vola Tabu, ena dave mai lomana na veiuciwai ni wai bula.”

E vosataka tiko e ke ko Jisu na veika levu ena yaco ni sa sovaraki yani na yalo tabu. Sa qai yaco ena kena sovaraki na yalo tabu ena yabaki ka tarava ena Siga ni Penitiko. A dave yani na veiuciwai ni wai bula e kea ena gauna era tekivu qaravi ira kina na tamata na 120 na tisaipeli. Ia me yacova na gauna o ya, e se sega na yalo tabu, e kena i balebale ni sega ni dua vei ira na tisaipeli i Karisito e lumuti ena yalo tabu, ka kacivi ki na bula vakalomalagi.

Ni rogoci na veivakatavulici i Jisu, sa ra qai vakatekivu me ra kaya e so: “Sa i koya dina oqo na Parofita,” e kena i rairai ni vakaibalebale tiko ki na parofita ka uasivi cake mai vei Mosese a yalataki oti me na lako mai. Sa kaya e so tani: “Sai koya oqo na Karisito.” Era tusaqata tale mai na so: “E na lako li mai Kalili na Karisito? E a sega li ni kaya na i Vola Tabu ni na tubu mai na kawa i Tevita na Karisito, ka ni na mai sucu mai Peceliema, na koro ka a tiko kina ko Tevita?”

Sa qai tubu me ra veisei na lewe vuqa. Era via vesuki Jisu e so, ia e sega ni bau dua e tarai koya rawa. Ni ra sa lesu tale na ovisa ka ra sega ni kauti Jisu yani, era sa qai taroga na bete i liuliu kei ira na Farisi: “A cava ko ni sega ni kauti koya mai kina?”

“E sega e dua na tamata sa vosa me vaka na tamata oqo,” era sauma yani na ovisa.

E curumi ira na i liuliu vakalotu na cudru katakataka ka ra tauca na vosa ni veivakalialiai, na lasu, kakase kei na vosa ni veibeci. Sa ra qai veivakadiloi: “O i kemuni tale ga o ni sa la’ki rawai? O ni sa bau kila li e dua li vei ira na i liuliu se vei ira na Farisi me vakabauti koya? O ira na lewe vuqa era tu ko ya era sega ni kila na Lawa i Mosese, o koya gona e sa na yaco kina vei ira na cudru ni Kalou.”

Ena ka oqo e dua talega vei ira na Farisi ko Nikotimo, e dua na nodra i liuliu na Jiu (a ya, e dua na lewe ni Sanadrini), sa qai douvaka me vosa ena vuku i Jisu. Rairai o nanuma lesu ena rua veimama na yabaki yani ki liu, a lako mai vei Jisu ko Nikotimo ena bogi ka vakaraitaka na nona vakabauti koya. Sa qai kaya ena gauna oqo ko Nikotimo: “E na vakatau lewa li na noda Lawa vua e dua na tamata ni sa bera ni rogoci koya mada e liu me kila na ka e a cakava?”

Era sa qai cudru ga vakalevu na Farisi ni bau dua vei ira e tokoni Jisu. “Ko iko talega na kai Kalili, ne?” era kaya ena dela ni veicavilaki. “Vakasaqara e na loma ni Vola Tabu ka raica ni sa sega mada ni bau dua na Parofita e tubu mai Kalili.”

E dina ni Vola Tabu e sega ni vosataka vakadodonu ni na lako mai Kalili na parofita, ia e dusimaki Karisito ga ni na lako mai kea, ni kaya kina “na rarama levu” ena laurai ena yasayasa oqo. Kuria o ya, a sucu ko Jisu mai Peceliema, a tubu o koya mai vei Tevita. E dina beka ni ra kila tiko oqo na Farisi, ia e rairai era vakavuna na kena vakatetei na vakanananu cala vei ira na tamata me baleti Jisu. Joni 7:32-52; Aisea 9:1, 2; Maciu 4:13-17.

▪ Na cava e dauyaco ena veimataka ni siga yadua ni solevu, ia ena vakamua tiko beka vakacava ko Jisu na rai ena ka oqo?

▪ Ena vuku ni cava era guce ni vesuki Jisu kina na ovisa, ka cava e nodra rai kina na i liuliu ni lotu?

▪ O cei ko Nikotimo, e vakacava mada na nona dikevi Jisu, ia na cava e nodra i valavala vua na nona i tokani Farisi?

▪ Na cava na i vakadinadina sa tu ni na lako mai Kalili na Karisito?