Marautaka na Vosa ni Kalou

“SA KALOUGATA na tamata . . . sa marau tiko e na vunau i Jiova.” Na tamata vaka oqo ena wilika na Vosa ni Kalou “e na siga kei na bogi.” (Same 1:1, 2) Vakacava, o sa vakila tiko na marau oqo? Na cava mo cakava mo vakila kina vakalevu na marau e vu mai na Vosa ni Kalou?

Vakarorogo ni Vosa o Jiova

Kua ni wilika ga na vosa. Raivakatayaloyalotaka na ka o wilika. Vakasamataka na domodra e lavetaki na nodra vosa. Ni o wilika na itekitekivu ni vica na wase ni iVolatabu, rogoca na domo i Jiova ni vakatakila yadua mai na ka e cakava, ena nona vakarautaka na vuravura meda bula kina. Rogoca ni tukuna vei Luvena, na nona liganicakacaka, ni sa kena gauna me buli kina na tamata. Raivakatayaloyalotaka mada: Rau sa talaidredre o Atama kei Ivi, tauca na kedrau itotogi na Kalou, rau vakatalai tani sara mai Parataisi. (Vakatekivu wase 1-3) O kurabui ni o wilika ni a rogoci e dua na domo mai lomalagi e tukuni Jisu Karisito ni Luve ni Kalou, na gonenitoko, o koya e tala mai na Kalou me mai mate ena vukuda. (Maciu 3:​16, 17) Vakasamataka se na vakacava na loma i Joni na yapositolo kei na kena irairai ni sa rogoci Jiova ni kaya: “Raica, au sa vakavouya na ka kecega.” (Vkta. 21:5) Io, e rawa ni ka maleka vei keda na noda wilika vaka oqo na Vosa ni Kalou!

Wilika tiko ga na Vosa ni Kalou, o na kilai Jiova vinaka kina, na Kalou lagilagi qai vakatubuqoroqoro. O na volekati koya na Kalou ni o koya e dau lomani keda, e dau vosoti keda, e dau tokoni keda ke da cakava ena yalomaloku na lomana, e dau dusimaki keda tale ga ena sala me vinaka kina na noda bula.​—Josua 1:8; Same 8:1; Aisea 41:10.

Na levu ga ni nomu wili iVolatabu na levu tale ga ni nomu lomavakacegu ni levu cake na ka o kila me baleta na loma ni Kalou vei iko. Ia, e sega ni yala ga e kea na marau o na vakila. Ni sa na vakavukui iko na ka o wilika mo rawa ni walia kina vakamaqosa na nomu leqa, o sa na vakataki koya na daunisame ni kaya: “A ka vakurabui na nomuni tukutuku, o koya sa vakabauta kina na yaloqu.” (Same 119:129) O na marau tale ga ni o na raica mai na Vosa ni Kalou na ivakavuvuli e so ena yaga sara ena nomu moica nomu vakasama kei na nomu gagadre me vakalou tiko ga.​—Aisea 55:8, 9.

E tu ena iVolatabu na idusidusi me baleta na noda ivalavala, oqo e taqomaki keda mai na leqa, qai vakaraitaka vei keda na sala dodonu. Nida wilika, eda na vakila ni o Jiova e Tamada, e kila na leqa ena basika ke da vakalaiva me rawai keda na gagadre ca vakayago. E sega ni vinakata meda beca na nona ivakatagedegede savasava baleta nida na sotava na kena ca. E kauaitaki keda o koya, e vinakata meda marautaka na noda bula. Nida wilika nona Vosa, eda raica ni ka ni veivakalougatataki dina na noda golevi koya me noda Kalou, me Tamada vakalomalagi tale ga.

Wilika e Veisiga na iVolatabu

E kaya na daunisame me baleti koya e wilika e veisiga na Vosa ni Kalou: “Na ka kecega sa cakava ko koya ena yaco.” (Same 1:3) Io, e dina nida tamata ivalavala ca, e dina nida bula tu ena ivakarau ni veika ca ni gauna oqo, e dina ni saga o Setani me tilomi keda, ia na noda wilika wasoma na Vosa ni Kalou kei na noda bulataka ena vukei keda meda tamata yaco ena ka kece eda cakava me salavata kei na noda veiwekani kei Jiova.

Eda vakatovolei vakalevu ena gauna oqo, ia e rawa ni vakaukauataki keda na noda tugana mada ga vakalalai e lomada e veisiga yadua e so na vakasama vakalou. E so era a vesu ena vuku ni nodra vakabauta era maroroya rawa e vica ga na tikinivolatabu era lavetaki ena niusiveva. Era kotiva mai, ra cavuqaqataka, ra vakananuma tale ga. E vakalougatataka na nodra sasaga o Jiova baleta nira cakava na ka era rawata ena ituvaki era tu kina, mera vulica kina na Vosa ni Kalou. (Maciu 5:3) Ia, e levu vei keda eda sega ni bula vesuki me vakataki ira. Meda kua ni nanuma ni na cakamana vei keda na noda wilika wale tu ga vakusakusa e veisiga e dua na tikinivolatabu. Eda na vakalougatataki ga ke da veiveisautaka na noda ituvatuva me rawa kina nida wilika e dua se vica na iwasewase ni iVolatabu e veisiga, da vakasamataka, da bulataka sara.

Ia, e rawa ni cala ena so na gauna na ka eda sa tuvana vinaka. Ke mani yaco oqo, eda na vakaliuca ga na ka e bibi dina. Me kena ivakaraitaki, e sega ni dua ena via nakita me kua tu mada ni gunuwai ena dua se rua taucoko na siga. Se mani cava gona eda cakava e veisiga, e dodonu tale ga me tiko na gauna meda gunuva kina na wai bulabula vakayalo.​—Caka. 17:11.

Wilika Taucoko na Vosa ni Kalou

Vakaevei, o sa bau wilika tasevu na iVolatabu? E so era raica ga na iVolatabu sa ra yalolailai, era sega ni vakabauta mera na wilika rawa na iVolatabu mai na Vakatekivu ina Vakatakila. O koya gona, e levu era via wilika taucoko na iVolatabu era tekivu ga ena iVolatabu Vakirisi Vakarisito. Ena vuku ni cava? De rawarawa nodra dikevi ira nira saga tiko mera muria na weniyava i Karisito nira wiliki ira na ivola ni iVolatabu oqo. Se vaka me ivola rawarawa na iVolatabu Vakirisi Vakarisito ni via mamare toka ga​—e dua beka ga na ikava ni iVolatabu. Ia, nira wilika oti na 27 na ivola oqo, sega ni bera nodra sa goleva na iVolatabu Vakaiperiu, ra tekivu wilika sara na 39 na kena ivola. Nira qai vakacavara na iVolatabu Vakaiperiu, sa tiki ni nodra bula na wili iVolatabu, oti era lesuva tale vakarua na iVolatabu Vakirisi Vakarisito, qai sega ni cegu nodra wili iVolatabu me yacova mai oqo. Me tiki tale mada ga ni nomu bula na nomu wilika e veisiga na Vosa ni Kalou.

E tiko beka e vale se nomu ivavakoso e dua e sega ni rawa ni wilivola? Vakacava mo dau wili iVolatabu vua? Ena yaga vei iko, ena yaga tale ga vua ni na vakananuma na ka e rogoca, bulataka sara.​—Vkta. 1:3.

Toso na gauna, o na via vakekeli tale beka me salavata kei na nomu wili iVolatabu. Nomu cakava oqo o na kila vinaka kina na veisemati ni so na ivola ni iVolatabu. Ke vakaidusi se marginal reference na nomu iVolatabu, oqo e rawa ni dusi iko ina so na itukutuku makawa, se so na itukutuku era tautauvata kei na kena o wilika tiko. De dua ona kila kina na vuna era volai kina e so na same kei na so na ivola era vola na yapositolo i Jisu Karisito. Na ivola na Insight on the Scriptures e vutucoqa ena kedra ivakamacala na veimatatamata, dui vanua, kei na itovo era volai ena iVolatabu. E tu kina na ivolasui se chart era vakaraitaki kina na yaco ni parofisai e so ena iVolatabu, tukuni ira na tui kei na parofita era bula ena dua vata na gauna, e vola tale ga na veitikinisiga e vakabauti nira yaco kina na veika era vakamacalataki.

Ni o vakananuma tiko na ka o vulica, o na raica na vuna e yaco kina e so na ka vei ira na tamata ni Kalou. O na kila tale ga na vu ni veimataqali ka e dau cakava o Jiova vei ira na nona tamata. Ena matata vei iko na rai i Jiova ena ka era cakava na veimatanitu, na lewenivanua, kei ira na tamata yadua. Oqo ena vakatitobutaka na nomu kila na nona vakasama.

Ena talei vei iko na veika e yaco ena itukutuku makawa ni iVolatabu ni o raivakatayaloyalotaka na vanua era yaco kina. Na mape ni vanua vakaivolatabu e vakaraitaka na dui vanua kei na kedra veiyawaki. Me kena ivakaraitaki, e vei sara mada na vanua ena Wasa Damudamu era a takoso kina na Isireli? E vakacava sara mada na levu ni Vanua Yalataki? E vakacava na levu ni vanua e vakalakova o Jisu ni mai cakacaka vakaitalatala voli e vuravura? Na cava soti e raica o Paula ena nona ilakolako ni kaulotu? Na mape kei na ivakamacala ni vanua ena rawa ni kauti iko sara ga ina vanua o wilika tiko. E vei o na raica kina na mape ni veivanua ena iVolatabu? O na raica e so ena New World Translation of the Holy Scriptures. Na ivola e rua na Insight e tiko kina e rauta ni 70 na mape qai tiko e dua na kena idusidusi se map index ena icavacava ni imatai ni ivola. Vakayagataka na Watch Tower Publications Index mo raica kina e so tale na mape. Ke ra sega vei iko na ivola oqo, vakayagataka na mape era dau taba ena Vale ni Vakatawa ni o wili iVolatabu tiko.

A kaya ena iVolatabu Vakaiperiu o Tui Tevita ni vakacaucautaki Jiova tiko: “Sa ka talei vei au na nanuma ni lomamuni na Kalou! A ka levu na kenai wiliwili!” (Same 139:17) Ena iVolatabu Vakirisi Vakarisito, e vakacaucautaki Jiova kina na yapositolo o Paula ena vuku ni Nona “vakacilava mai na nona rarama ki na lomada, me kauta mai vei keda na rarama ni kena kilai na i serau ni Kalou e na mata i Karisito.” (2 Kor. 4:​6, VV) Rau bula veiyawaki ena vica na senitiuri o Tevita kei Paula; ia erau marautaka ruarua na Vosa ni Kalou. O rawa ni vakila tale ga oqo ke o biuta vakatikitiki na gauna mo wilika kina na ka kece e sa vakarautaka vei iko o Jiova ena veitaqaniveva ni nona Vosa volai.