E Rawa ni Vinaka Cake Nomu Dau Nanuma na Ka

E BULIA na Kalou o Jiova na noda mona me cakava e dua na cakacaka vakasakiti, oya me dau nanuma na ka. E bulia me vaka e dua na tobu ni itukutuku e rawa ni vakayagataki, ia me dei tu ga na itukutuku era maroroi kina. E buli na mona me lako vata sara ga kei na inaki ni Kalou vei keda, meda bula tawamudu.​—Same 139:14; Joni 17:3.

Ia, o na vakila beka ni levu na ka o tawana e nomu mona era lai yali koso. E vaka me yali ena gauna o vinakata yani kina. Na cava mo cakava me vinaka cake kina nomu dau nanuma na ka?

Kauai

Ke da dau kauai, ena vinaka cake noda nanuma na ka. Ke da vakamatauni keda meda dau vakadidike, meda veikauaitaki, vaka kina noda kauaitaka na veika e yaco wavokiti keda, ena yavala kina na noda vakasama. Ena qai rawarawa meda kauai nida wilika se rogoca e dua na ka e yaga dina.

Levu e dau rawarawa nodra guilecava e so na yaca. Ia, nida lotu Vakarisito, eda kila ni bibi meda veikilai​—meda kilai ira na tacida vakayalo, o ira eda vunau vei ira, kei ira eda sota ena noda cakacaka e veisiga. Na cava meda cakava meda kua ni guilecava kina na yacadra o ira e dodonu meda nanumi ira? Na yapositolo o Paula e tukuna sara ga na yacadra e 26 na lewe ni dua na ivavakoso e volavola vei ira. Eda kila ni kauaitaki ira dina baleta ni sega ni cavuta wale ga na yacadra, e cavuta tale ga e so na ka matailalai e baleti ira. (Roma 16:3-16) Nikua, e so na ivakatawa dauveilakoyaki ni iVakadinadina i Jiova era sa kenadau sara ga ena nodra dau nanuma na yaca, e dina nira sega ni dau dede ena dua na ivavakoso. Era rawata vakacava? De ra saga sara ga mera cavuta vakalevu na yacana e dua ena imatai ga ni gauna era veivosaki kina. Ra qai saga mera vakasotara vata na yaca kei na irairai kei koya na itaukei ni yaca. Kena ikuri, era dau solia nodra gauna vei ira e so ena cakacaka vakaitalatala, kei na nodra dau kana vata. Ni o na sotava e dua, o na nanuma na yacana? Kena imatai, me dua na vuna vinaka o via nanuma kina na yacana; oti, qai tovolea e so na ka era vakaturi e cake.

E bibi tale ga mo dau nanuma na ka o wilika. Ia, o na rawata vakacava oqo? E bibi mo kauaitaka na ka o wilika, mo kila tale ga. Ke o sega ni kauaitaka na ka o wilika ena sega ni lako taucoko kina nomu vakasama. Ena sega ni rawa ni o katona ena nomu vakasama na ka o wilika ke duatani tale na vanua e tiko kina nomu vakasama. Ena matata cake na ka o kila ke o sema na ka o wilika tiko kei na ka e matau vei iko, se ka o sa kila rawa tu. Tarogi iko: ‘Ena sala cava, kei na gauna cava au rawa ni vakayagataka kina na ka au wilika oqo? Au na vakayagataka vakacava meu vukea kina e dua tale?’ Ena matata tale ga nomu kila na ka ke o wilika na matavosa, kua ni wilika na vosa yadua. Ena sala oqo o na taura kina na ka e via tukuni tiko se vakasama e vakabibitaki, ena rawarawa mo nanuma.

Dau Railesu

O ira na kenadau ena tabana ni vuli era kila na bibi ni kena dau railesuvi na ka. Ena dua na vakadidike, e vakaraitaka kina e dua na parofesa ni koliji ni nona railesuva vakatotolo e dua na ka e wilika ena loma ni dua mada ga na miniti ena vakaruataka na levu ni itukutuku e katona. O koya gona, ni o vakaotia taucoko na ka o wilika tiko se dua na kena iwasewase, vakasamataka lesu sara na veitikina era a vakabibitaki me kasa kina vei iko. Vakasamataka se o na vakamacalataka vakacava ena nomu vosa ga e dua na tikina vou o vulica. Ena dede cake sara na nomu nanuma tiko e dua na tikina bibi ke o railesuva tale ni o wilika oti ga.

Ena vica na siga e tarava, saga mo lesuva tale na ka o a wilika ena nomu vota vua e dua tale. O na via vota beka vua e dua e vale, dua ena ivavakoso, dua drau cakacaka vata, dua drau vuli vata, dua drau tiko veivolekati, se dua drau sota ena cakacaka vakaitalatala. Kua ni vakamacalataka wale ga na veitikina bibi, saga tale ga mo tukuna na yavu se ile vakaivolatabu e dui tokoni ira. Ena yaga vei iko na nomu vakayacora oqo​—ena kasa kina e lomamu na veika bibi​—ena yaga tale ga vei ira na tani.

Vakananuma na Veika Bibi

Me ikuri ni nomu railesuva na ka o wilika kei na nomu vota yani, o na raica ni yaga sara ga na nomu vakananuma na veika bibi o vulica. Oqo sara ga na ka erau vakayacora na dauvola iVolatabu o Esafa kei Tevita. E kaya o Esafa: “Au na nanuma na cakacaka i Jiova: au na nanuma na nomuni cakacaka mana mailiu. Au na veinanuyaka talega ki na nomuni cakacaka kecega, ka veivosakitaka na nomuni valavala.” (Same 77:11, 12) E vola tale ga o Tevita: “Ni’u sa . . . vakanananu vei kemuni e na veitiki ni bogi.” “Au sa nanuma na gauna makawa; au sa vakanananu ki na nomuni cakacaka kecega.” (Same 63:6; 143:5) Vakacava o iko, o dau cakava oqo?

Nomu vakananuma vakatitobu na veika e cakava o Jiova, na veika e kilai kina, kei na veika e dau vakaraitaka me baleta na lomana, ena sega wale ga ni kasa kina vei iko na ka o wilika, ena levu tale na kena yaga. Ke o vakamatauna na vakanananu titobu vaka oqo, ena kasa e lomamu e levu sara na ka titobu. Ena moica na ivakarau ni nomu vakasama kei na nomu rai. Na veika o katona ena tara sara ga na lomamu.​—Same 119:16.

Na iTavi ni Yalo Tabu ni Kalou

Nida saga meda nanuma na veika dina me baleta na cakacaka i Jiova kei na veika e tukuna o Jisu Karisito, eda sega ni sasaga duadua tiko. A kaya o Jisu vei ira nona imuri ena bogi ni bera nona mate: “Au sa tukuna vei kemudou na veika oqo ni’u se tiko vata tiko kei kemudou. E na qai vakatavulici kemudou e na ka kece ga na Dauveivuke, na Yalo Tabu, o koya e na tala mai ko Tamaqu e na yacaqu, ka na vakananuma lesu tale ga vei kemudou ko koya na veika kece ga au sa dau tukuna vei kemudou.” (Joni 14:25, 26, VV) Rau maliwai ira na tiko ena bogi oya o Maciu kei Joni. A vukei rau dina beka na yalo tabu? Me qai sega? Ni oti e walu tale na yabaki, sa vola vakaoti o Maciu na imatai ni itukutuku ni bula i Karisito, wili kina na itukutuku bibi me baleta na Vunau mai na Ulunivanua kei na ivakamacala matata ni ivakatakilakila ni tiko tawarairai nei Karisito kei na icavacava ni ivakarau ni veika ni gauna oqo. Oti e 65 na yabaki mai na mate i Jisu, a vola na yapositolo o Joni na nona Kosipeli, wili kina na itukutuku matailalai ni veika a kaya o Jisu ena iotioti ni bogi e tiko vata kina kei iratou na yapositolo, ni bera ni qai solia na nona bula. Sega ni vakatitiqataki ni rau se nanuma vinaka tu ga o Maciu kei Joni na veika a kaya o Jisu kei na veika a cakava ni ratou se tiko vata, ia, na yalo tabu e vakaitavi vakalevu ena kena vakadeitaki vei rau me rau kua ni guilecava na veitikina bibi e vinakata o Jiova me volai ena nona Vosa.

Vakacava nikua, e vukei ira tale ga na tamata ni Kalou na yalo tabu? Io! E macala ni na sega ni biuta i noda vakasama na yalo tabu na ka eda sega ni vulica, ia ena vukei keda me vakalesuya tale mai noda vakasama na veika eda a vulica ena gauna sa oti. (Luke 11:13; 1 Joni 5:14) Ena kena gauna, ena qai yavalati noda vakasama me “nanuma na veika era a kaya ni na yaco ko ira na parofita yalosavasava kei na veivakaro ni Turaga ka i Vakabula.”​—2 Pita 3:1, 2, VV.

‘Kakua ni Guilecava’

E vakadreti ira vakavica na Isireli o Jiova mera ‘kakua ni guilecava.’ Sega ni kena ibalebale oqo ni vinakata o Jiova mera nanuma sara ga vakamatailalai na ka kece. E vinakata ga mera kua ni lai ogataka vakasivia na veika e baleti ira ga, mera lai guilecava kina na veika a cakava vei ira o Jiova. Me matata tiko ga ena nodra vakasama na nona vakabulai ira o Jiova ena gauna e vakamatei ira kina na ulumatua ni Ijipita, vaka kina ena nona dolava na Wasa Damudamu, oti qai sogota tale, luvu kina o Fero kei na nona mataivalu. Mera nanuma tiko na Isireli ni Kalou ga a solia vei ira na nona Lawa ena Ulunivanua o Saineai, a kauti ira voli ena vanualiwa me yacova sara yani na Vanua Yalataki. Oqo na veika mera kakua ni guilecava​—me cakayaco ena nodra bula e veisiga.​—Vkru. 4:9, 10; 8:10-18; Lako 12:24-27; Same 136:15.

Meda qarauna tale ga o keda meda kakua ni guilecava. Nida vosota tiko na drakidrakita ni bula ni veisiga, meda nanumi Jiova tiko, meda nanuma tiko se Kalou vakacava o koya kei na loloma e vakaraitaka ena nona solia na Luvena, a vakarautaka na isoro ni noda ivalavala ca me rawa ni tawamudu kina noda vakila na bula uasivi. (Same 103:2, 8; 106:7, 13; Joni 3:16; Roma 6:23) Ena makare tiko ga vei keda na veika dina totoka oqo ke da dau wilika wasoma na iVolatabu, da vakaitavi vakabulabula ena soqoni vakaivavakoso kei na cakacaka vakaitalatala.

Nida vakatulewataka e so na ka lelevu se ka lalai, vakasamataki ira na veika dina bibi oya, laiva mera lewa na nomu vakasama. Kakua ni guilecava. Rai ga vei Jiova me dusimaki iko. Kua ni vakatamata na nomu rai se vakararavi ina lomamu ivalavala ca. Tarogi iko, ‘Na ivakasala cava se ivakavuvuli cava mai na Vosa ni Kalou meu vakasamataka mada ni bera niu vakatulewa?’ (Vkai. 3:5-7; 28:26) Sega ni rawa ni o nanuma e dua na ka o a sega ni wilika se rogoca. Ia, ni tubu nomu kilai Jiova kei na nomu lomani koya, ena tubu tale ga na nomu tobu ni kilaka e sa vukei iko kina na yalo tabu ni Kalou mo nanuma. Ena tubu na nomu lomani Jiova, oqo ena uqeti iko mo cakava na ka e dodonu.