Vakayagataki ni Suinivosa

LEVU era dau taqaya ni tukuni mera vakayagataka ga na suinivosa ena gauna era vosa kina. Era nuidei cake ke ra vola yadua sara ga na vosa mera cavuta, ra qai wilika se cavuqaqataka.

Ia, nida veivosaki e veisiga, e sega ni dua vei keda e dau vola na vosa yadua me cavuta. Se da veivosaki kei ira noda lewenivuvale, se da veivosaki kei ira noda itokani. Eda sega tale ga ni dau cakava oqo ena cakacaka vakavunau. Vaka kina nida talaucaka na lomada ena masu, se da masu taudua, se da matataka e dua na ilawalawa.

Ia, ni o vunau, na cava na duidui ni nomu vakayagataka na suinivosa kei na nomu vola yadua sara ga na vosa mo cavuta? De dua o na nuidei ni na dodonu na nomu ivakamacala, o na vakayagataka tale ga na vosa rogo vinaka ke o na wilika na nomu vunau. Ia, o na sega ni uqeta sara na lomadra na vakarorogo. Ni o sa na wiliwili tu ga, e sa na sega ni vaka na ivakarau ni veivosaki e veisiga na rorogo ni domomu, ena sega ni bulabula, ena sega ni veivakauqeti. Ke o sa raica tiko ga na nomu veva ena gauna o vosa tiko kina o sega ni raici ira na vakarorogo, levu era na sega ni vakarorogo vinaka nira vakila ni o sega soti ni vakasamataki ira tiko, o sega ni moica nomu ivakamacala me ganiti ira. E veivakauqeti duadua na vosa e tau sara ga mai na buturara, e sega ni volai me qai wiliki.

E vakarautaki na Koronivuli ni Vuli Vunau me yaga vei keda. Nida sotava noda itokani eda sega ni taura mai na pepa da qai wilika vei ira na ka eda via tukuna nida vinakata me rogo vinaka noda vosa. Nida lako ena cakacaka vakavunau, eda sega ni vola yadua na vosa meda lai cavuta vei ira na itaukeinivale nida sega ni vinakata meda guilecava e dua na ka eda via wasea. Ni vakatovotovotaki ena koronivuli na vunau ena ituvaki vaka oqo, me caka me vaka sara ga e yaco dina. Kevaka o vakavakarau vinaka, o na raica ni yaga sara nomu vola se nanuma e vica ga na vakasama me vakarawarawataka ga nomu nanuma lesu na veitikina o via vakamacalataka. Ia, na cava mo cakava mo rawa ni yavutaka ga mai kina ena dua na suinivosa na nomu ivakamacala?

Vakasamataka na Ka Mo Tukuna. E dodonu mo tuva vakavinaka ena nomu vakasama na veitaravi ni ka mo tukuna ke o vinakata me yavutaki nomu ivakamacala mai na suinivosa. Sega ni kena ibalebale oqo mo na digitaka rawa na vosa mo vakayagataka. Kena ibalebale ga mo na vakasama rawa e liu ni bera ni o vosa.

E so era dau vosa tu ra sega ni vakasama, era dau cavuta kina e so na vosa era qai veivutunitaka e muri. E so tale e dau baya na nodra ivakamacala, ra qai dau bosoka vata kece na ka era tukuna. Na iwali ruarua ga ni leqa oqo me na liu na vakasama qai muri na vosa. Kena imatai, me matata mada vei iko na nomu inaki, oti qai raica na veitaravi ni ka mo na tukuna mo rawata kina na inaki oqori, sa matata rawa oya qai vosa.

Vakacava ke o vakavakarau ina cakacaka vakavunau? Macala tu ga ni o dau vakarautaka e liu nomu iyaya ni vunau, ia mo vakarautaka tale ga na nomu vakasama. Ke o via vakayagataka e dua na ivakamacala e vakaturi ena Noda Cakacaka Vakaitalatala ni Matanitu, wilika vakavica me matata vei iko na vakasama e vakabibitaki kina. Oti mo qai tovolea mo cavuta na ka e vakabibitaki kina ena dua ga se rua na iyatuvosa lekaleka. Ni o lai vakamacala, vakayagataka ga na vosa e matau vei iko, moica nomu ivakamacala me ganita nomu yalava. O na raica ni yaga sara mo vakasamataka rawa na ka mo na tukuna. Na cava me okati kina? (1) Me na dua nomu ikaunivosa mo cavuta beka kina e dua na ka e vu ni veivosaki tiko ena itikotiko. Sureti itaukeinivale me vakaraitaka nona nanuma. (2) Vakasamataka e dua na tikina bibi me na tomani kina na veivosaki, me vakarautaki tale ga e dua se rua na tikinivolatabu e tukuni kina nona yalayala na Kalou me na kauta mai na vakacegu. Ke rawa ni o vakamacala tale, vakabibitaka ni na qai vakavatukanataka oqo na Matanitu vakalomalagi ni Kalou. (3) Uqeti itaukeinivale me raica vakabibi na ka drau veivosakitaka. Rawa ni o solia vua e dua na ivola, se sureti koya mo drau vuli iVolatabu qai lokuca sara ga na gauna me tomani kina na veivosaki.

E vinakati ga me nanumi na veika me tukuni ena veivosaki vaka oqo, e sega ni gadrevi me volai e dua na kena suinivosa. Ia, ke o via vakayagataka e dua na suinivosa ena cakacaka vakavunau, e dodonu me vica wale sara na ka o vola me nomu ikau ga ni vosa, dua se rua na tikinivolatabu, kei na dua na tikina o na via okata ena itinitini ni nomu ivakamacala. Na vakarautaki ni tikidua vaka oqo ena vukei keda me kua ni baya noda vosa, ena matata tale ga vei ira na itaukeinivale na noda itukutuku.

Ke veivosakitaki vakalevu tiko ena nomu yalava e dua na ulutaga se ile, ena yaga mo vakavakarau toka kina. Vakalevu e dau veirauti meda vakarautaka ga e rua se tolu na tikina bibi, kei na dui tikinivolatabu era tokona. De dua o rawa ni vakayagataka na ivola lailai na “Usutu Vakaivolatabu me Veivosakitaki” se ulutaga e so e tiko ena Reasoning From the Scriptures. O na via okata beka ena nomu ivakamacala e dua na itukutuku e volai ena niusiveva se dua tale na ivola. Vola ga vakalekaleka nomu suinivosa, kabira kina na vosa o lavetaka mai oqori, qai biuta vata kei na nomu iyaya ni cakacaka vakavunau. Ni qai taro mai o itaukeinivale se kauta cake mai na nona ile, o sa rawa ni tukuna vua ni o na marautaka mo wasea vua na ka o vakabauta. (1 Pita 3:15) Vakayagataka na suinivosa o vakarautaka mai me yavutaki kina nomu ivakamacala.

E bibi tale ga mo dau vakasamataka vinaka na ka mo na tukuna ke o masu ena vukudratou na nomu vuvale, masu ena vulivola, se masu ena ivavakoso. Macala mai na Luke 11:2-4 ni a vakatakila o Jisu vei ira nona tisaipeli e vica na ka bibi mera dau masulaka. A masu vakabalavu o Solomoni ena gauna e vakatabui kina na valenisoro mai Jerusalemi. Sega ni vakabekataki ni a vakasamataka sara vakavinaka na ka me masulaka. A vakamua rawa e liu na nona masu vei Jiova kei na nona vosa ni yalayala vei Tevita; tarava na valenisoro; oti sa qai masulaka na veika matailalai e so kei ira na lewenivanua. (1 Tui 8:22-53) Oqo e rua na ivakaraitaki vinaka vei keda.

Me Kua ni Vereverea Nomu Suinivosa. Ke o na vakayagataka ena nomu itavi ena ivavakoso na suinivosa o vakarautaka, na cava soti me lewena?

Kua ni guilecava ni inaki ni suinivosa me vakalesuya ga mai vei iko na vakasama se itukutuku o via talaucaka. De dua o na via vola e vica na iyatuvosa me nomu ikaunivosa. Ia na kena vo, mo kua ni vola na vosa yadudua, na vosa o vola me vakalesuya ga mai vei iko na vakasama. Ke o biuta vakaiyatuvosa na ka o vola, mera leleka ga na iyatuvosa. Ni o raica nomu suinivosa, e dodonu me rawarawa nomu dusia na ulutaga lalai o na vakabibitaka. Ena vinaka kina mo volai ira ena matanivola levu, se mo toqarukutaki ira, se boroi ira ena dua na roka. Me qai volai ena ruku ni ulutaga lalai oqori na veitikina era tokona. Vakatakilakilataka na tikinivolatabu o na wilika. Wilika sara ga mai na iVolatabu. Vakatakilakilataka na vosa vakatautauvata o na via vakayagataka. De o na via cavuta tale ga na nodra vosa e so na tamata rogo se itukutuku veiganiti o wilika ena dua na ivola. Me bau rabalevu toka na ka o okata ena nomu suinivosa mo rawa ni tukuna kina e so na itukutuku e dina qai matata. Ena rawarawa na vakayagataki ni suinivosa e vakarautaki vakamaqosa.

E so e lailai sara na ka era vola ena nodra suinivosa. Na suinivosa e rawa ni volai ga kina e vica na vosa bibi, vosa e so mai na tikinivolatabu o na via cavuqaqataka ga, kei na droini se iyaloyalo ena vakavotuya lesu vei iko na vakasama o via vakadewataka. Ena veisemati vinaka na nomu ivakamacala ke lailai ga na ka o vola ena nomu suinivosa, ena rogo matau tale ga na nomu ivakamacala. Oqo sara ga na inaki ni lesoni oqo.

O na raica ena taqana e 39 ina 42 ni ivola oqo na idusidusi me baleta na “Vakarautaki ni Suinivosa.” Ena yaga mo wilika na wase oya ena gauna o cakacaka tiko kina ena lesoni oqo, “Vakayagataki ni Suinivosa.”

iVakavakayagataki ni Suinivosa. E sega ni inaki wale ga ni lesoni oqo me vukei keda ena vakarautaki ni suinivosa. E kena inaki levu me vukei keda ena kena ivakavakayagataki.

E bibi mo vakavakarau e liu ni bera ni o lai talaucaka na lewe ni nomu suinivosa. Raica na ulutaga levu, wilika na ulutaga lalai, qai vakasamataka se veisemati vakacava na ulutaga levu kei na ulutaga lalai. Vakadeitaka na balavu ni gauna o na vakayagataka ena ulutaga lalai yadua. Sa qai kena gauna oqo mo vulica kina na imatai ni ulutaga lailai. Raica na ile era kau cake mai mera tokona, na tikinivolatabu, vosa vakatautauvata, kei na ivakaraitaki o na via cavuta mo vakamatatataka kina. Taleva vakavica na iwasewase oqo me yacova ni sa matata vei iko. Cakava tale ga oqo ina vo ni ulutaga lalai. Raica na ivakamacala e rawa mo vakalutuma mo vosa tiko ga kina ena loma ni gauna e soli vei iko. Oti mo qai railesuva taucoko. Me matata ga vei iko na vakasama, kua ni leqataka na vosa. Kua ni wiligusutaka.

Ni o sa lai vosa, raici ira na vakarorogo. Ni o wilika oti e dua na tikinivolatabu, tovolea mo cega tu ga qai vakamacala mai kina, mo kua ni raica tale tiko nomu tikidua. Vaka kina ke o cavuta e dua na vosa vakatautauvata, kua ni wilika mai, tovolea mo vakamacalataka sara ga me vaka ga o vakamacala tiko vua e dua nomu itokani. Ni o vosa, kua ni vuki rai tiko ina nomu tikidua ena iyatuvosa kece o cavuta. Me vu sara ga mai lomamu na ka o tukuna, ena sala oqo o na tara kina na lomadra na vakarogoci iko.

Ni o sa na kila vinaka na ivakavakayagataki ni suinivosa, oqori e sa idewadewa sara ga ni nomu yaco mo dua na dauvunau maqosa.