Veitaratara ena iVola

SA VAKAVINAKATAKA nodra bula kei na nodra ivalavala e dua na iwiliwili levu na ivola a volai vei ira. Era dau veitaratara ena ivola na lotu Vakarisito taumada. Levu na nodra ivola oya sa lewe ni iVolatabu Vakirisi Vakarisito ena gauna oqo. Nikua, e rawa nida vola ivola tale ga meda vakaukauataki ira kina na vakabauta vou, meda veitaratara kei ira noda itokani, vakayaloqaqataki ira na tacida vakayalo e vakacolati vei ira e so na itavi bibi, vakayaloqaqataki ira era sotava tiko na veika dredre, meda vakadewataka tale ga kina na itukutuku bibi e so me qaravi vinaka tiko ga kina na ivavakoso.—1 Ces. 1:1-7; 5:27; 2 Pita 3:1, 2.

Rawa nida vunau tale ga ena noda volaivola. E vakatabui tu beka noda cakacaka vakavunau ena so na koro, ena veikoro vakavavalagi, e so e dredre sara na veivosaki kei ira ena itikotiko vakabai era tiko kina. E so e levu ga na gauna era sega ni tu e vale, eda sega kina ni dau sotavi ira ena noda cakacaka e veivale. E so tale era tu sara vakayawa.

So na gauna sa da dau tu ga e vale ena vuku ni tauvimate, draki ca, se vakatabui ni veilakoyaki. Sega beka ni gauna vinaka oqo mo volavola vua e dua na wekamu se dua o a vunau tawalokuci vua, mo tomana kina nomu vakamacalataka na itukutuku vinaka? Sa toki beka e dua nomu vuli iVolatabu? De dua ena lai vakacaudreva tiko na tataleitaki e se vo toka vua na nomu ivola. Se o na via wasea e so na vakasama vakaivolatabu vua e dua na nomu itokani se qai vakamau, dua se qai vagone, se dua se qai takali na wekana voleka.

Vakatetea na iTukutuku Vinaka ena iVola

Ke o volavola vua e dua drau se bera ni sota mo tukuna vua na itukutuku vinaka, vakamacalataki iko mada e liu. De o na via vakaraitaka ni o vakaitavi tiko ena dua na cakacaka e sa vakayacori tiko e vuravura raraba, era bole sara ga yani o ira era vakaitavi kina. Ke o nanuma ni vinaka mo cavuta ni o iVakadinadina i Jiova, cavuta, ke sega, kua. Ia, me kila o koya o volavola tiko vua na vuna o volavola ga yani kina o sega ni siko yani. Vola na nomu ivola me vaka sara ga o vosa dina tiko vua. Ia, mo “vuku me vaka na gata, ka yalovinaka me vaka na ruve.” O na vakayacora oqo ena nomu vakasamataka vinaka na levu ni kemu itukutuku o na vakaraitaka.—Maciu 10:16.

Vola ena ivola na ka sara ga o na tukuna ke o lai sikovi koya i nona vale. O na via vakayagataka beka e so na ikau ni vosa mai na ivola lailai Na Sala me Tekivu Qai Tomani Kina na Veivosaki ena iVolatabu, se dua na ivakamacala vakaivolatabu mai na Noda Cakacaka Vakaitalatala ni Matanitu. E rawa mo taroga vua e dua na taro o qai vakauqeti koya me vakasamataka. E so na dautukutuku era vakamacalataka nida dau sauma wale nodra taro vakaivolatabu o ira na dau via kila, ra qai dusia e so na ulutaga mai na dua na noda ivolanivuli. E tiko ena taqana e 73 e dua na sabolo ni ivola. Oqo me idusidusi wale ga, da qai veiveisautaka na lewe ni noda ivola me dui ganiti ira eda volavola vei ira. Ke sega ni veiveisau na lewe ni noda ivola, ena rawa ni taura vakarua se vakavica o itaukeinivale e dua tiko ga na mataqali ivola.

E so era sega ni dau via wilika na ivola era vola yani na tamata era sega ni kila, vakauasivi ke rui balavu. O koya gona, ena ka vakavuku me lekaleka ga na noda ivola. Me kua ni rui balavu de vakavucesa tale vei koya e wilika. Ena daumaka ke tawa toka ena loma ni ivola e dua na ivola ni veisureti ina soqoni ena Kingdom Hall. Rawa ni tawa tale ga e dua na ivolacebaceba, brochure, dua Na Vale ni Vakatawa se Yadra!, qai vakamacalataka ni rawa ni vakau tiko yani vua na ivola vaka oqo ke taleitaka. Se rawa mo taroga ke rawa mo sikovi koya sara ga yani e nona vale mo lai vakarabailevutaka na tikina o vola vua.

iTatau

Raica mada na sabolo ni ivola. Dikeva: (1) E rairai vinaka qai matau. (2) Ke mani yali na waqanivola, ena kila ga o koya o volavola vua na yacamu kei na nomu itikotiko se katonimeli. (3) E vakamatatataki na inaki ni ivola ena imatai ni parakaravu. (4) Era sega ni wakivata na dui vakasama ena dua na parakaravu, e dua ga na vakasama dua na parakaravu. (5) E inaki ni ivola me vakatetei kina na itukutuku vinaka, o koya gona, e tau vakarakorako na lewena, e biu tale ga vakamatau.

Ia, ena duatani tale na mataqali ivola me vaka beka na kena e dau vola na vunivola ni ivavakoso ina valenivolavola ni tabana, ena volai tale tiko ga na yaca ni ivavakoso, na yacana na vunivola, nona katonimeli, kei na tikinisiga. Ena volai tale ga na yaca ni tamata se isoqosoqo e volai kina na ivola. Oqo e dau qai muria yani e dua na vosa vakarokoroko ni vakabula. Ni tini na ivola, e levu era dau vola na vosa me vaka na “Nomuni dauveiqaravi” se “Nomuni itokani,” ni bera nira qai sainitaka na yacadra. Na saini e dodonu me volai sara ga e liga.

Se ivola vakacava eda vola, me qarauni na sipelitaki ni vosa, donu na tuvai ni yatuvosa, meda vakayagataka na ivakatakilakila dodonu, me kua tale ga ni guilecavi me savasava, me maqosa. Nida vakayacora oqo, ena dokai na noda ivola, ena dokai tale ga na itukutuku e lewena.

Dau vola ena daku ni waqanivola na nomu katonimeli se nomu itikotiko. Ke o nanuma ni sega ni vinaka mo vola na nomu itikotiko ni o vunautaka na itukutuku vinaka ena ivola vei ira o sega ni kila, kerei iratou na qase ke rawa ni o vakayagataka na katonimeli ni ivavakoso. Me kua vakadua ni vakayagataki na katonimeli ni iSoqosoqo ena inaki oqo, de nanumi ni nomu ivola e ivola ni valenitabana—oqo e rawa ni vakavu veilecayaki. Ke sega ni volai ena waqanivola na nomu katonimeli se itikotiko, o qai tawana tu e loma e dua na ivolacebaceba se ivoladraudrau, oqo e rawa ni nanumi tale ga kina ni nomu ivola e ivola ni iSoqosoqo.

Qarauna me veirauti na sitaba o vakabira ena nomu waqanivola, vakabibi ke tawa tiko e loma e so na ivola. Ke lailai na isau ni sitaba o vakabira, ena lai sauma mai na kena vo o koya o volavola vua, oqo ena rawa ni vakaleqa sara ga na nomu itukutuku. Kua ni guilecava ni na levu na isau ni sitaba kevaka o tawana tale e dua na brochure se ivoladraudrau ena nomu waqanivola.

Me Rogorogo Dodonu

Ni o sa volavola oti, wilika tale mo vakalewa. E vakacava na kena irogorogo? Veikauaitaki, rogo matau? Na loloma kei na yalovinaka e rua na itovo eda vinakata meda vakaraitaka ena noda veitaratara kei ira na tani. (Kala. 5:22, 23) Ke o raica ni vaka me votu mai vakalevu ena nomu ivola na itukutuku ni ca qai tau kaukaua, veisautaka na kena ibiubiu.

E rawa ni yacova na ivola na vanua o sega ni yacova rawa. O koya gona, na ivola e rawa ni yaga sara ena noda cakacaka vakaitalatala. Ena kilai ena nomu ivola se o tamata vakacava, ena kilai tale ga kina na veika o vakabibitaka, e bibi kina mo vakasamataka vinaka na ka e volai kina, kena irairai, kei na irogorogo ni kena vosa. De dua na nomu ivola ena rawa sara ga ni tekivutaka, vakaukauataka, se vakayaloqaqataka e dua me muria na sala ina bula.